‏ 1 Samuel 3

Бурхан Самуилые дуудана

1Балшар хүбүүн Самуил Элиин хажууда Эзэндэ алба хэжэл байба. Тэрэ үедэ Эзэнэй үгэ хомор, үзэгдэлнүүдшье үсөөн бэлэй. 2Элиин нюдэдынь муудажа эхилһэн, һайнаар хаража шадахагүй болоһон байгаа. Нэгэтэ тэрэнэй өөрын таһалга соо хэбтэжэ, 3Бурханай ханзын оршодог Эзэнэй һүмэ соо Самуилай хэбтэжэ, мүн тиихэдэ Бурханай дэнгэй унтараадүй байхада, 4Эзэн Самуилые дуудаба.

– Би эндэ байнаб, – гэжэ тэрэ харюусаба. 5Тиигээд Элиидэ гүйжэ ошоод:

– Намайе дуудахадатнай би эндэ ерээб, – гэжэ тэрэ хэлэбэ. Харин Элии:

– Би шамайе дуудаагүйб. Һөөргөө ошоод хэбтэ, – гэхэдэнь, Самуил бусажа хэбтэбэ. 6Эзэн дахин Самуилые дуудаба. Тиихэдэнь Самуил бодожо, Элиидэ ошоод, хэлэбэ:

– Намайе дуудахадатнай би эндэ ерээб.

Гэбэшье Элии харюусаба:

– Би дуудаагүйб. Хүбүүмни, бусаад хэбтэ даа.

7Самуил Эзэниие тиихэдэ үшөө мэдэдэггүй, Эзэнэй үгэшье тэрээндэ үшөө дуулдаагүй байгаа.

8Эзэн гурбадахияа Самуилые дуудаба. Самуил бодожо, Элии руу ошоод, хэлэбэ:

– Намайе дуудахадатнай би эндэ ерээб.

Тиихэдэнь балшар хүбүүе Эзэн дуудана гэжэ Элии ойлгобо. 9Элии Самуилда хэлэбэ ха:

– Ошожо хэбтэ. Хэрбээ Тэрэнэй шамайе дуудабал, «Эзэн, айладхажа хайрлыт, Танай богоол шагнажа байна» гэжэ хэлээрэй.

Самуил бусажа, хэбтэһэн газартаа хэбтэбэ. 10Эзэн ерэжэ зогсоод, урид дуудаһандал адляар дуудаба:

– Самуил, Самуил!

Самуил харюусаба:

– Айладхажа хайрлыт. Танай богоол шагнажа байна.

11Эзэн Самуилда иигэжэ айладхаба:

– Хараарайгты, Би Израилиин зондо нэгэ юумэ хэхэмни. Тэрээн тухай дуулаһан хүн бүхэнэй хоёр шэхэн соонь ханхинаха. 12Тэрэ үдэр Би Элиин гэр бүлэ тухай Өөрынгөө хэлэһэн юумые бултыень эхинһээнь эсэс хүрэтэр гүйсэдхэхэб. 13Хүбүүдэйнгээ Намайе, Бурханиие, хараадагые мэдэжэ байгаад, тэдэниие баридаггүй байһанайнь түлөө, иимэ гэм зэмэй түлөө тэрэнэй гэр бүлые хэтэ мүнхэдөө хэһээхэб гэжэ Би тэрээндэ айладхаа бэлэйб. 14Тиимэһээ Элиин гэр бүлын гэм зэмэ ямаршье үргэлөөр, ямаршье бэлэгээр хэзээдэшье сагааруулагдахагүй гэжэ Би Элиин гэр бүлэдэ тангаригланаб.

15Иигээд Самуил үглөө болотор хэбтэбэ. Удаань Эзэнэй үргөөгэй үүдэнүүдые тэрэ нээбэ. Самуил энэ үзэгдэлые Элиидэ хэлэхэеэ айжа байгаа. 16Элии Самуилые дуудаба:

– Минии хүбүүн, Самуил!

Самуил харюу үгэбэ:

– Би эндэ байнаб.

17– Эзэн шамда юун гэжэ айладхааб? Намһаа бү нюу. Шамда айладхаһан үгэһөө гансыеньшье намһаа нюугаа һаашни, Бурхан ехээр хэһээхэ, – гэжэ Элии хэлэбэ. 18Самуил юушье нюунгүй бүгэдыень тэрээндэ хөөрэбэ. Тиихэдэнь Элии иигэжэ үгүүлээ һэн:

– Тэрэ хадаа Эзэн мүн. Һанаһаараа Тэрэ юумэ үйлэдэхэл.

19Самуил ехэ болоо, Эзэн тэрээнтэй хамта байлсаа, Самуилай айладхаһан бүхы юумэнь бэелдэг байба. 20Тиимэһээ Даанһаа Бэһээр-Шээбэ хүрэтэр бүхы Израилиин зон Самуил Эзэнэй лүндэншэ болоо гэжэ мэдэбэ. 21Тиигээд Эзэн Самуилда Өөрыгөө элирхэйлһэн, хөөрэлдэһэн Шилоо һууриндаа үзэгдэжэл байгаа.
Copyright information for BxrBBL2024