‏ 1 Samuel 30

Давид амалээгүүдтэй тулалдана

1Давидай болон зонойнь гурбан хоногой удаа Циклааг руу ерэхэдэнь, амалээгүүд Нээгэб болон Циклаагта добтолһон байба. Тэдэ Циклаагые эзэлжэ, галдан шатааһан байгаа. 2Тэрэ эхэнэрнүүдые ба тэндэ байһан бүхы зониие – бага, ехэшье зониие алангүйгөөр олзолон абажа, өөрынгөө нютаг руу ябаһан байба. 3Давидай болон зонойнь хото руу ерээд харахада, тэрэ галдагданхай, һамгадынь, хүбүүд, басагадынь баряанда абтан ошонхой байгаа. 4Тиихэдэнь Давид ба тэрээнтэй хамта байһан зон шангаар уйлалдан, хүсэ шадалгүй болотороо бархиралдаба. 5Давидай хоёр һамгад Езрээлэй Ахинооһам ба Набаалай һамган байһан Кармээлэй Абигааһил гэгшэдшье олзолон абтагдаһан байгаа.

6Арад зоной бултадаа өөһэдынгөө хүбүүд, басагад тухай гашуудажа, Давид руу шулуу шэдэн алахаяа хэлсэжэ байһан ушарһаа Давид ехэ зобобо. Гэбэшье Давид өөрын Эзэн Бурханаар өөрыгөө зоригжуулба.

7Удаань Давид Ахимээлэхэй хүбүүн, санаартан Абиатаарта:

– Эфод намда асара, – гэбэ. Абиатаар Давидта эфод асарба. 8Давид Эзэнһээ:

– Энэ дээрмэшэ бүлэгые мүрдэхэмни гү? Би тэдэниие хүсэхэ гүб? – гэжэ асуухадань, Эзэн тэрээндэ:

– Мүрдэ. Юуб гэбэл, ши тэдэниие хүсэхэш, өөрын юумэ бусаажа шадахаш, – гэжэ харюусаба. 9Тиигээд Давид зургаан зуун хүнтэй хамта ябажа, Бэсоор горхон руу хүрэжэ ерээд, зарим зониие тэндэ үлээбэ. 10Бэсоор горхониие гаталжа шадахагүй болотороо эсэһэн хоёр зуун хүн тэндээ үлэжэ, Давид өөрөө, мүн дүрбэн зуун хүн саашаа мүрдэн ошобо.

11Тэдэ хээрэ нэгэ египет хүниие оложо, тэрэниие Давид руу асарба. Тэрээндэ хилээмэ үгэхэдэнь, эдибэ, ундалба. 12Тэрээндэ инжирэй боолтын хэһэг, хоёр боолто үзэм үгэхэдэнь, тэрэ эдижэ, тэнхээ оробо. Ушар гэхэдэ, гурбан үдэр, гурбан һүни тэрэ эдеэ эдеэгүй, уһа уугаагүй байгаа. 13Давид тэрээндэ:

– Хэнэйбши, хаанаһаабши? – гэжэ асуухадань, тэрэ:

– Би египет хүнэй хүбүүмби, амалээг хүнэй богоол гээшэб. Гурбан үдэрэй урда тээ минии үбдэхэдэ, эзэмни намайе хаяад ошоо. 14Бидэ хэрээдүүдэй, Иудын харьяата газар болон Халээбэй урда зүгүүд руу шуумайн добтолжо, Циклаагые галдан шатаагаабди, – гэжэ хэлэбэ.

15Давид тэрээндэ:

– Дээрмэшэдэй бүлэг руу газаршалан абаашажа шадаха гүш? – гэхэдэнь, тэрэ:

– Намайе алахагүй, эзэнэймни гарта үгэхэгүй тухай Бурханаар намда тангариглагты. Тиигэбэл, би таниие тэрэ дээрмэшэдэй бүлэг руу абаашахаб, – гэжэ харюусаба. 16Тиигээд тэрэ Давидые дахуулан абаашаба. Харахада, амалээгүүд газараар дүүрэн таранхай, пилиштүүдэй болон Иудын газарһаа олзолон абаһан ехэ олзоһоо боложо, һайндэрлэжэ, эдижэ, уужа байба. 17Давид боро гэгээнһээ үглөөдэрэй үдэшэ хүрэтэр тэдэниие хюдаба. Тэмээ унажа тэрьедэһэн дүрбэн зуун сэрэгшэдһээ бэшэ тэдэнэй хэншье амиды мэндэ үлэбэгүй. 18Иигэжэ амалээгүүдэй буляаһан бүхы юумые Давид тэхэрюулэн абаба, өөрынгөө хоёр һамгадыешье абарба. 19Тэдэнэй юуншье – бага, ехэшье зон, хүбүүд, басагадшье, олзолуулһан юумэншье, буляалгаһан зүйлһөө нэгэншье үгы болоогүй. Давид бултыень тэхэрюулжэ бусааба. 20Иигээд Давид бүхы хони, үхэрые абажа, сэрэгшэдынь урдаа мал һүрэг туужа:

– Энэ хадаа Давидай олзо, – гэжэ хэлэн байгаа һэн. 21Бэсоор горхоной хажууда орхиһон, Давидые дахажа шадахагүй болотороо эсэһэн хоёр зуун хүн руу хүрэжэ ерэхэдэнь, тэдэ Давидые болон тэрээнтэй ерэһэн хүнүүдые угтажа, урдаһаань ерэбэ. Давид тэдэ зондо дүтэлэн, мэндэшэлбэ. 22Тиихэдэнь Давидтай хамта ябаһан хүнүүдэй дундаһаа муу, хара һанаатай зон:

– Тэдэ бидэнтэй хамта ябаагүй, тиимэһээ өөһэдынгөө һамга, хүүгэдээл абажа ошог. Бидэ эрьюулжэ абаһан олзоһоо тэдэнтэй хубаалдахагүйбди, – гэлдэбэ. 23Теэд Давид:

– Аха дүүнэрни, маанадые хамгаалжа, урдаһаамнай ерэһэн дээрмэшэ бүлэгые бидэнэй гарта Эзэнэй үгэн иигэжэ байхада, тиигэжэ болохогүй. 24Иигэжэ хэхые хэншье таанадай үгэ дуулахагүй. Тулалдаанда ябаһан хүнүүдэй хубинь ашаа бараанай дэргэдэ байһан хүнүүдэй хубитай адли байха ёһотой. Бултанда адляар хубаарилха хэрэгтэй, – гэбэ. 25Тэрэ үдэрһөө хойшо Давидай энээниие Израилиин сахиха хуули, тогтоол болгоһониинь мүнөө болотор дамжан ерэнхэй.

26Давид Циклаагта ерээд, нүхэдынь болохо Иудын аха захатанда олзын юумэнһээ эльгээн:

– Харагты, энэ хадаа Эзэнэй дайсадһаа абаһан олзоһоо таанарта бэлэг, 27Бэт-Ээл, урда Рамоот болон Яттииртэ байһан зондо, 28Ароһээр, Сипмоот болон Эштэмооһада байһан зондо, 29Рахаал, Ерахмээлэй хотонууд болон хээнүүдэй хотонуудта байһан зондо, 30Хормаа, Бор-Ашаан болон Атаахда байһан зондо, 31Хэброондо байһан зондо, Давидай өөрынь ба зонойнь ороһон гараһан бүхы һууринуудай зондо, – гэжэ хэлээ бэлэй.