‏ 1 Samuel 31

Саул ба тэрэнэй хүбүүдынь наһа бараба

1Пилиштүүд Израильтай дайлалдан, Израилиин зон пилиштүүдһээ тэрьедэжэ, Гилбооһа уулада алдалан унаба. 2Пилиштүүд Саулые болон тэрэнэй хүбүүдые хүсэжэ, Саулай Ёнатаан, Абинадааб, Малхишууһа хүбүүдые алаба. 3Саулые тойроод ехэ байлдаан бужаганажа, һурша ном харбагшад тэрэниие харбажа, хүндөөр шархатуулба. 4Тиихэдээ Саул өөрынь зэр зэбсэгые үргэгшэдэ:

– Ши һэлмэеэ һугалаад, намайе хадхажа ала. Бэлгэеэ отолуулаагүй эдэ хүнүүд ерэжэ, намайе хадхан алажа, доромжолхол, – гэбэ. Теэд зэр зэбсэгынь үргэгшэ ехэ айжа, тэрэ захиралтыень дүүргэжэ шадабагүй. Саул һэлмэ абажа, дээрэнь унашаба. 5Зэбсэг баригшань Саулай үхэһые үзөөд, өөрынгөө һэлмэ дээрэ унажа, Саулай хажууда үхэбэ. 6Иигэжэ тэрэ үдэр Саул гурбан хүбүүдтэеэ, зэр зэбсэг үргэгшэтэйгөө болон бүхы сэрэгтэеэ хамта гээгдэбэ.

7Нюруу газарай нүгөө талада болон Иордан голой саада талада байһан Израилиин бүхы зон сэрэгэй тэрьедэһэн, Саулай болон хүбүүдэйнь үхэһые мэдээд, хотонуудаа орхижо, зугадаба. Пилиштүүд ерэжэ, тэндэ байрлаа бэлэй.

8Үглөөдэрынь пилиштүүд алагдаһан зониие тонохоёо ерэхэдээ, үхэһэн Саулай болон тэрэнэй гурбан хүбүүдэй бэенүүдые Гилбооһа уула дээрэ олобо. 9Тэдэ Саулай толгой отолжо, хуяг, дуулгыень тайлан абажа, өөһэдынгөө шүтээнүүдэй һүмэ соо, арад зондо мэдээ дуулгахаяа элшэнэрые Пилиштын бүхы нютагуудаар эльгээбэ. 10Саулай сэрэгэй зэмсэгые тэдэ Аштаартуудай һүмэ соо табижа, бэеыень Бэт-Шаанай ханада үлгэбэ.

11Ябээш-Галаадай ажаһуугшад пилиштүүдэй Саулда юу хэһые дуулаад, 12бүхы сэрэгшэдынь бодожо, бүхэли һүниин туршада алхаһаар Бэт-Шаан ерээд, Саулай болон тэрэнэй хүбүүдэй бэенүүдые хотын ханаһаа абажа, Ябээштэ асараад, шатааба. 13Тиигээд яһыень суглуулжа абаад, Ябээшдэхи сухай модон доро хүдөөлүүлбэ. Тэдэ долоон хоног масаглаа һэн.
Copyright information for BxrBBL2024