‏ 1 Samuel 5

Бурханай ханзые пилиштүүд олзолбо

1Пилиштүүд Бурханай ханзые олзолон абаад, Ээбэн-Ээзэрһээ өөрын Ашдоод хото руу абаашаба. 2Тэндэ тэдэ Бурханай ханзые Дагооной дуганда оруулаад, Дагооной хажууда табиба. 3Ашдоодойхидой үглөөдэрынь бодоод харахада, Дагоон Эзэнэй ханзын урда нюураараа газарта унанхай байба. Тэдэ Дагоониие абаад, байрадань дахин табиба. 4Удаань үглөө үглөөгүүр тэдэнэй бодоод харахада, Дагоон Эзэнэй ханзын урда нюураараа газарта дахин унанхай байба. Дагооной толгой ба хоёр гарынь отолоотой богоһо дээрэ, тиихэдэ бэень лэ үлэнхэй байгаа. 5Тиимэһээ Дагооной санаартад ба дугандань ерэгшэд булта Ашдоодто байдаг Дагооной дуганай богоһо дээрэ мүнөө хүрэтэр гэшхэдэггүй.

6Эзэн ашдоодойхидые шангаар хэһээжэ, Ашдоодой болон тэрэнэй хаяагаар ажаһуугшадые һалгажа, һэлхэн үбшөөр дайраба. 7Энээниие Ашдоодой зон хараад, иигэжэ хэлсэбэ:

– Израилиин Бурханай ханза бидэнэй дунда үлөөжэ болохогүй. Юуб гэхэдэ, тэрэ маанадта болон манай бурхан Дагоондо гай тодхор ушаруулжа байна.

8Хүнүүдые тэдэ эльгээжэ, Пилиштын бүхы ноёдые суглуулжа асууба:

– Израилиин Бурханай ханзые яахабибди?

– Гаат руу эльгээхэ хэрэгтэй, – гэһэн шиидхэбэри абтаа һэн. Тиигээд Израилиин Бурханай ханзые тэдэ Гаат руу абаашаба. 9Гаат руу абаашаһанайнь удаа Эзэн энэ хотые хэһээжэ, айха хүлгэхэ ушарнууд угаа олоор гараба. Тэрэ энэ хотын зониие хүгшэн, залуугүй зобоожо, һэлхэн үбшэ халдахуулба. 10Бурханай ханзые тэдэ Экроон руу эльгээбэ. Хэлсээнэй ханзын ерэхэдэнь, Экрооной зон хашхаралдаба:

– Бултыемнай алахын тула Израилиин Бурханай ханзые иишэнь асарба!

11Тиигээд тэдэ хүнүүдые эльгээжэ, Пилиштын бүхы ноёдые суглуулжа, иигэжэ хэлэбэ:

– Маанадые болон гэр бүлэнүүдыемнай һалгаахагүйн тула Израилиин Бурханай ханзые байһан газар руунь бусаан ябуулагты.

Бурханай тэдэниие угаа шэрүүнээр хэһээһэнһээ хүлгөөн бүхы хотоор боложо байгаа. 12Үхэхэнь үхэжэ, үхөөгүй зон һэлхэ үбшэндэ баригдажа, хотын оог бархираан тэнгэридэ тулама дэгдэжэ байгаа бэлэй.
Copyright information for BxrBBL2024