1Sa 7 | BxrBBL2024 | STEP | Кирьяат-Еариимэй зон ерэжэ, Эзэнэй ханза абажа, гүбээ дээрэхи Абинадаабай гэртэ асарба. Тэрэнэй хүбүүн Эльазаар Эзэнэй ханза хинажа байха гэһэн ёһолол үнгэргөө һэн.

‏ 1 Samuel 7

1 Кирьяат-Еариимэй зон ерэжэ, Эзэнэй ханза абажа, гүбээ дээрэхи Абинадаабай гэртэ асарба. Тэрэнэй хүбүүн Эльазаар Эзэнэй ханза хинажа байха гэһэн ёһолол үнгэргөө һэн.

Самуил – Израилиин хүтэлбэрилэгшэ

2 Ханзын Кирьяат-Еариимдэ үлэһэнһөө хойшо удаан саг үнгэрбэ, хорин жэл үнгэрөө. Израилиин бүхы арад зон Эзэндэ бултадаа хандан, зальбардаг болобо.

3 Самуил Израилиин бүхы арад зондо иигэжэ хэлэбэ:

– Хэрбээ таанад бүхы ухаан бодолоороо Эзэндэ эрьен хандажа байгаа һаа, өөһэд хоорондоһоо хариин бурхадай болон Аштаартуудай дүрсэнүүдые зайлуулагты, үнэнхэ зүрхэнһөө бэеэ Эзэндэ зорюулагты, гансал Тэрээндэ мүргэгты. Тиихэдэ Эзэн таанадые пилиштүүдэй һабарһаа абарха.

4 Тиигэжэ Израилиин зон Баалнуудай болон Аштаартуудай дүрсэнүүдтэй хахасажа, ганса Эзэндэ мүргэдэг болобо.

5 Самуил зондо соносхобо:

– Бүхы Израилиин зон Мицпаада суглараг! Би таанадай түлөө тэндэ Эзэндэ мүргэн зальбархаб.

6 Тэдэ Мицпаада сугларжа, уһа удхан, Эзэнэй урда сасан, тэрэ үдэр масаглан:

– Бидэ Эзэнэй урда нүгэл хээбди, – гэбэ. Самуил Мицпаада Израилиин зониие ударидан байгаа.

7 Израилиин арад зоной Мицпаада сугларһан тухай пилиштүүд дуулаад, ноёдынь Израилиин урдаһаа добтолхоёо гараба. Израильшууд тэрээн тушаа дуулажа, пилиштүүдһээ һүрдэбэ. 8 Израилиин арад зон Самуилда хэлэбэ ха:

– Пилиштүүдэй һабарһаа маанадые абархын тула Эзэн Бурхандамнай һайса зальбаржал байгты.

9 Самуил нэгэ нарай хурьга абажа, тэрэниие дууһан шатаан, түгэс шатаалта үргэл болгон Эзэндэ үргэбэ. Тэрэ Израилиин түлөө Эзэндэ һайса зальбаржа, Эзэн тэрэниие анхарба. 10 Самуилай түгэс шатаалта үргэл үргэжэ байхада, пилиштүүд Израильтай тулалдахаар дүтэлэн ерэбэ. Гэбэшье Эзэн тэрэ үдэр пилиштүүд дээрэ хүсэтэ аянга буулгажа, тэдэниие ухаа алдуулба, тиигээд тэдэ израильшуудта һамна бута сохигдоо һэн. 11 Израилиин зон Мицпааһаа пилиштүүдые намнан, Бэт-Каарай оршон хүрэтэр тэдэниие алан хюдан мүрдэбэ.

12 Удаань Самуил нэгэ шулуу абаад, Мицпаа Шээн хоёрой дунда табяад, тэрэнээ Ээбэн-Ээзэр ^{▼▼ Ээбэн-Ээзэр – еврей хэлэн дээрэ «туһаламжын шулуун» гэһэн удхатай.} гэжэ нэрлэбэ.

– Эзэн энэ газар хүрэтэр бидэндэ туһалаа, – гэжэ тэрэ хэлээ бэлэй. 13 Иигэжэ пилиштүүд илагдажа, Израилиин хилэнүүд руу дахин нэбтэрэн орохоёо болибо. Самуилай амиды байха сагта Эзэн пилиштүүдые даран байгаа. 14 Пилиштүүдэй буляажа абаһан Экроонһоо Гаат хүрэтэр хотонууд Израильда бусаагдаба. Пилиштүүдэй һабарһаа газар нютагаа иигэжэ Израиль сүлөөлөө. Тэрэнэй болон эмооршуудай хоорондо амгалан байдал тогтоо бэлэй.

15 Самуил бүхы наһаараа Израилиие зонхилон ударидаа. 16 Тэрэ жэлһээ жэлдэ Бэт-Ээл, Гилгаал, Мицпаагаар тойрон, Израилиин удамарша тула тэндэхи бүхы газарнуудые зонхилоо. 17 Удаань тэрэ Рамаада бусадаг һэн. Юуб гэхэдэ, гэрынь тэндэ бэлэй. Мүн лэ тэрэ Рамааһаа Израилиие зонхилдог байгаа. Самуил Эзэндэ үргэлэй шэрээ тэндэ баряа һэн.