1Sa 17 | BxrBBL2024 | STEP | Пилиштүүд дайлалдахаяа сэрэгээ суглуулба. Тэдэ Иудадахи Сохоодо сугларжа, Сохоо болон Азэкаагай дунда, Ээпэс-Даммиимда хотон хүреэнээрээ зогсобо.

‏ 1 Samuel 17

Голиаф израильшуудые байлдаанда дуудана

1 Пилиштүүд дайлалдахаяа сэрэгээ суглуулба. Тэдэ Иудадахи Сохоодо сугларжа, Сохоо болон Азэкаагай дунда, Ээпэс-Даммиимда хотон хүреэнээрээ зогсобо. 2 Саул болон Израилиин эрэшүүл сугларжа, Элаагай хүндыдэ хотон хүреэнээр тогтон, пилиштүүдтэй тулалдахаар жагсаба. 3 Пилиштүүд нэгэ хада дээрэ, Израиль нүгөө хада дээрэ зогсобо. Тэдэнэй дунда хүнды байгаа.

4 Тиигээд пилиштүүдэй хотон хүреэнһөө тулалдаашан гаража ерэбэ. Тэрэнэй нэрэнь Голиаф, тэрэ Гаатһаа, зургаа хахад тохой үндэр бэетэй хүн бэлэй. 5 Тэрэнэй толгойдо гуулин дуулга, табан мянга шээкэлэй шэгнүүртэй хайрһата хуяг бэедээ үмдэһэн байгаа. 6 Тэрэ хүлдөө гуулин үбдэгшэтэй, мүн дала мүртөө гуулин жадатай. 7 Тэрэнэй жадын эшэ нэхэдэг годоо модонтой адли бүдүүн, жадынь үзүүр зургаан зуун шээкэлэй шэгнүүртэй байба. Бамбай үргэгшэнь тэрэнэй урда ябаба. 8 Голиаф зогсожо, Израилиин жагсаал сэрэгшэдтэ хашхаран:

– Таанад юундэ жагсан ерээбта? Би пилишт хүмби, харин таанад Саулай богоолнууд бэшэ гүт? Өөһэдөө нэгэ хүниие шэлэжэ, нам руу ябуулагты. 9 Хэрбээ тэрэ хүн намтай тулалдан, намайе алаа һаань, бидэ таанадай богоол болохобди. Харин хэрбээ би тэрэниие диилэжэ алаа һаам, таанад маанадай богоол боложо, бидэндэ ажал хэхэт, – гэбэ. 10 Пилишт хүн саашань:

– Мүнөөдэр би Израилиин жагсаал сэрэгые доромжолжо байнаб. Нэгэ хүниие ябуулагты, хоюулаа туласалдая, – гэбэ. 11 Энэ пилишт хүнэй үгэ дуулахадаа, Саул болон бүхы Израилиин зоной зоригынь бууража, тэдэ ехээр айба.

Давид сэрэгэй жагсаалай дунда

12 Давид хадаа Иудадахи Бэтлэһээмэй эпраат яһанай Ишай гэжэ нэрэтэй хүнэй хүбүүн һэн. Ишай найман хүбүүдтэй бэлэй. Тэрэ Саулай хааншалгын үедэ үндэр наһатай үбгэн болоһон байгаа. 13 Ишай гэгшын гурбан ехэ хүбүүдынь Саулые дахан дайнда мордобо. Дайн дажарта ошоһон гурбан хүбүүдэйнь нэрэ гэбэл, ууган хүбүүниинь – Элиааб, удаадахинь Абинадааб, нүгөөдэнь Шаммаа бэлэй. 14 Давид одхон хүбүүниинь байгаа. Гурбан томо хүбүүдынь Саулые дахажа ябаа. 15 Харин Давид заримдаа Бэтлэһээмдэ эсэгынгээ хони адуулхын тула Саулһаа һөөргөө бусадаг байгаа.

16 Тэрэ пилишт хүн дүшэн үдэрэй туршада үглөө, үдэшэ бүри гаража, өөрыгөө харуулдаг байба.

17 Ишай Давид хүбүүндээ:

– Нэгэ эфаа хуураһан орооһо, энэ арбан хилээмэ абажа, хотон хүреэндэ байһан аханартаа гүйдэлөөрөө ошо. 18 Мүн энэ арбан үрмэ мянгатын даргада абаашажа үгөөд, аханарайнгаа мэндые мэдээд, һайн байһанайнь ямар нэгэн тэмдэг абажа ерэ. 19 Саул болон аханаршни, мүн бүхы Израилиин эрэшүүл Элаагай хүндыдэ пилиштүүдтэй тулалдажа байна, – гэбэ.

20 Давид эртэ үглөөгүүр бодожо, хонин һүрэгөө нүгөө хонишондо даалгаад, хүнэһэ абаад, Ишайн захирһанай ёһоор ошобо. Тэрэнэй хотон хүреэндэ ерэхэдэ, сэрэгшэд шууян, хашхаралдан, жагсажа байба. 21 Израильшууд болон пилиштүүд урда урдаһаа жагсан зогсобо. 22 Давид үргэжэ асарһан юумэеэ харуулшанда орхёод, жагсаал сэрэг руу гүйжэ ошоод, аханартаяа мэндэшэлдэбэ. 23 Давидай аханартаяа хөөрэлдэжэ байха үедэнь тулалдаашан, Голиаф гэжэ нэрэтэй Гаадай пилишт хүн өөһэдынгөө сэрэг жагсаалһаа гаража ерэн, урид хэлэһэн тэрэл үгэнүүдые хэлэхэдэнь, Давид тэрэниие дуулажархиба. 24 Израилиин бүхы эрэшүүл тэрэ хүниие хараад, ехэ айн зугадаба. 25 Израилиин эрэшүүл:

– Тэрэ ерэжэ байһан хүниие харана гүт? Израилиие доромжолхоёо тэрэ гаража ерэнэ. Тэрэниие алаһан хүниие хаан ехэ баялигаар шагнан, өөрынгөө басага тэрээндэ хадамлаха, эсэгынь гэр бүлые Израильда татабари түлэхэһөө сүлөөлхэ, – гэлдэбэ. 26 Тиихэдэнь Давид хажуудаа зогсожо байһан хүнүүдтэ:

– Энэ пилишт хүниие алажа, Израилиие доромжолхые болюулһан хүн ямар шагнал абахаб? Бэлгэеэ отолуулаагүй энэ пилишт хүн амиды Бурханай сэрэгые доромжолжо байха хэн гээшэб? – гэбэ. 27 Зон урид хэлэһэндэл адляар, тэрэниие алаһан хүн иимэ шагналда хүртэхэ гээд харюусаба. 28 Тэрэнэй ехэ аха Элиааб Давидай зонтой хөөрэлдэжэ байхые дуулаад, ехэ уурлан:

– Ши юундэ иишээ ерээбши? Талада байгаа хэдэн хонидоо хэндэ орхёобши? Би ехэрхүү зан, муу һанааешни мэдэнэб. Ши тулалдаа харахаяа ерээ бэзэш? – гэжэ зандарба. 29 Харин Давид:

– Би юу хээ юмбиб? Һуража болохогүй юм гү? – гэбэ. 30 Тиигээд тэрэ тэрээнһээ буруу харан, ондоо хүндэ эрьежэ, үнөөхил юумэеэ асууба. Зон урид хэлэһэндэл адли харюу үгөө һэн.

31 Давидай хэлэһэн үгэнүүдые зон дуулажа, Саулда мэдүүлбэ. Тиигээд Саул Давидые дуудан асаруулба. 32 Давид Саулда:

– Тэрэ хүнһөө боложо, хэншье зүрхэ сэдьхэлээ бү хүнтэрүүлэг. Танай богоол би ошожо, тэрэ пилишт хүнтэй тулалдахаб, – гэбэ. 33 Тиихэдэнь Саул Давидта:

– Ши тэрэ пилишт хүнтэй тулалдажа шадахагүйш. Юуб гэхэдэ, ши эдир залууш, харин тэрэ дүй дүршэлтэй сэрэгшэ, – гэбэ. 34 Гэбэшье Давид Саулда:

– Танай богоол болохо би эсэгынгээ хони адуулдаг байгааб. Арсалан гү, али баабгайн ерээд, хонин һүрэгһөө хурьга абан ябаа һаань, 35 би хойноһоонь ошожо, тэрээндэ добтолжо, хурьгаа абардаг һэм. Хэрбээ тэрэнэй минии урдаһаа бодон ороо һаань, би үһэнһөөнь шүүрэн абажа, тэрэниие сохижо аладаг байгааб. 36 Танай богоол болохо би арсалан, баабгайн али алинииньшье алаһан байхаб. Тэрэ бэлгэеэ отолуулаагүй пилишт хүндэ амиды Бурханай сэрэгые доромжолһонойнь түлөө тэдээндэл адли юумэн болохо, – гэбэ. 37 Давид саашань:

– Арсалан, баабгайн һабарһаа намайе абарһан Эзэн тэрэ пилишт хүнэйшье гарһаа намайе абарха, – гээ бэлэй. Саул Давидта:

– Ошо. Эзэн шамтай хамта байха болтогой, – гэжэ хэлэбэ. 38 Тиигээд Саул Давидта өөрынгөө хубсаһа үмдэхүүлжэ, толгойдонь зэд дуулга табиба, бэедэнь хуяг үмдэхүүлбэ. 39 Давид энээнһээ урда сэрэгэй хубсаһа нэгэшье үмдөөгүй хадаа үмдөөд, Саулай һэлмэ бүһэлэн зүүгээд, хүдэлжэ туршаба. Тиигээд Давид Саулда:

– Һураагүй һэн тула би энээниие үмдөөд ябажа шадахагүй байнаб, – гэбэ. Тиигээд Давид тэрэ хубсаһа тайлаа һэн. 40 Тэрэ модоёо гартаа барижа, горхонһоо табан мэлигэр шулуу өөртөө шэлэжэ абаад, хонишоной сумаа руугаа хэбэ. Тиигээд дүүгүүрээ гартаа баряад, тэрэ пилишт хүн тээшэ ошобо.

Давид Голиафые алаба

41 Тиихэдэ пилишт хүншье бамбай баригшаяа урдаа табин, Давид руу дүтэлжэ ерэбэ. 42 Пилишт хүн шэртэжэ хараад, Давидые голобо. Юуб гэхэдэ, Давид ягаа улаахан, һайхан түһөөтэй залуухан хүбүүн байгаа. 43 Тэрэ Давидта:

– Ши юундэ нам руу модо барижа ерэбэш? Би нохой юм гүб? – гэбэ. Пилишт хүн өөрынгөө бурхадые дурдан, Давидые харааба шэрээбэ. 44 Тиигээд Давидта:

– Ерэ наашаа, би шинии бэе огторгойн шубуу шонхорто, хээрын ан арьяатанда үгэхэб, – гэжэ занаба. 45 Давид пилишт хүндэ:

– Ши һэлмэ, бамбай, жада баринхай нам руу ерэжэ байнаш. Харин би шинии доромжолһон Израилиин сэрэгэй Бурхан, Түмэн Сэрэгтэ Эзэнэй нэрээр шам руу ерэжэ байнаб. 46 Мүнөөдэр Эзэн шамайе минии гарта үгэхэ. Би шамайе алаад, толгойешни бэеһээшни таһалхаб. Мүнөөдэр би пилишт сэрэгшэдэй һэенүүдые огторгойн шубуу шонхорто, хээрын ан арьяатанда үгэхэб. Бүхы улад Израильда Бурхан бии гээд мэдэдэг болохо. 47 Энэ сугларһан олоншье Эзэн һэлмэ, жада хэрэглэнгүй абардаг гээшые мэдэдэг болохо. Энэ байлдаан хадаа Эзэнэй байлдаан, тиигээд Тэрэ таанадые манай гарта үгэхэ, – гэбэ.

48 Пилишт хүнэй бодожо, Давидтай тулалдахаар урдаһаань дүтэлжэ байхадань, Давид тэрэнэй урдаһаа тулалдаанай газар руу түргэн гүйбэ. 49 Давид гараа сумаада хэжэ, нэгэ шулуу абаад, дүүгүүрээр дүүгүүрдээд буудахадаа, пилишт хүнэй сохо онобо. Шулуун сохо руунь зоогдон орожо, тэрэ нюураараа газар шаажа унаба.

50 Иигэжэ Давид һэлмэгүй, гансал дүүгүүр болон нэгэ шулуугаар пилишт хүниие илаба. 51 Давид гүйжэ ошоод, тэрэ пилишт хүн дээрэ гаража, һэлмыень хуйһаань һугалан абажа, тэрэниие алаад, толгойень һэлмээр таһа сабшаба.

Баатарайнгаа алуулһые пилиштүүд хараад, тэрьедэбэ. 52 Израиль болон Иудын зон бодожо хашхаралдан, пилиштүүдые хүнды, Экрооной хаалга хүрэтэр намнаба. Шаарааһим тээшэ, Гаат болон Экроон хүрэтэр харгы замаар алуулһан пилиштүүд унажал байба. 53 Израильшууд пилиштүүдые намнахаяа болин бусажа, тэдэнэй хотон хүреэниие дээрмэдэбэ. 54 Удаань Давид пилишт хүнэй толгойе абажа, Иерусалимда абаашаба, харин зэр зэбсэгыень майхан соогоо табиба.

Саул Давидые сэрэгэй даргаар томилно

55 Саул Давидай пилишт хүнэй урдаһаа гаража байхыень хараад, сэрэгэй дарга Абнээрһээ:

– Абнээр, энэ залуу хүн хэнэй хүбүүн бэ? – гэжэ асууһан байгаа. Абнээр:

– Минии хаан, танай ами наһаар тангаригланаб, би мэдэнэгүйб, – гээ. 56 Хаан:

– Ши тэрэ залуу хүнэй хэнэй хүбүүн байһые асуугыш, – гэжэ захирба. 57 Давидай тэрэ пилишт хүниие алаад, бусажа ябахада, Абнээр тэрэниие Саулай урда дахуулан абаашаба. Давидай гарта пилишт хүнэй толгой байгаа. 58 Саул Давидһаа:

– Эдир хүбүүн, ши хэнэй хүбүүн бэлэйш? – гэжэ асууба. Давид:

– Би танай богоол Бэтлэһээмэй Ишай гэгшын хүбүүмби, – гэжэ харюусаа һэн.