1Sa 22 | BxrBBL2024 | STEP | Давид тэндэһээ ябажа, Адуллаамай агы руу зугадаба. Аханарынь болон түрэл гаралынь бултадаа тэрээн тухай дуулаад, Давидай байһан газарта ерэбэ.

‏ 1 Samuel 22

Санаартадай үхэл

1 Давид тэндэһээ ябажа, Адуллаамай агы руу зугадаба. Аханарынь болон түрэл гаралынь бултадаа тэрээн тухай дуулаад, Давидай байһан газарта ерэбэ. 2 Зобоһон, үридэ ороһон, засагта дурагүй болоһон бүхы зон Давидай хажууда сугларба. Иигэжэ дүрбэн зуугаад хүн тэрээндэ хамтарба. Давид тэдэнэй ударидагша болоо һэн.

3 Давид тэндэһээ Моһаабай Мицпээ руу ошожо, Моһаабай хаанда:

– Бурханай намда юу хэхые мэдэтэрни эсэгэ эхэ хоёрни таанадтай байг лэ, – гэжэ гуйба. 4 Иигэжэ Давид тэдэниие Моһаабай хаанда орхижо, тэдэ Давидай бүхэлэлтэдэ хоргодон байһан хугасаа соо хаанайда байлсаа.

5 Лүндэншэ Гаад Давидта:

– Энэ бүхэлэлтэ соо бү бай. Иуда руу ябажа ошо, – гэбэ. Давид ябажа, Хээрэт гэдэг ой руу ерэбэ.

6 Давидай ба тэрээнтэй хамта байһан зон тухай нэгэтэ Саул дуулаба. Тэрэ үедэ Саул Гибаада, сухай модон доро, үндэр газарта гартаа жада баринхай һуужа байгаа. Бүхы зараса түшэмэлнүүдынь тэрэниие тойрон зогсожо байгаа һэн. 7 Саул тойрон байһан зарасанартаа:

– Шагнагты, Бэньямиинэй үринэр! Ишай гэгшын хүбүүн та бүгэдэндэ таряалангуудые ба уһан үзэмэй талмайнуудые үгэжэ, таанадые бултыетнай мянгатын болон зуутын дарганар болгохо юм гү?! 8 Ушарынь гэбэл, та бүгэдэ минии урдаһаа эсэргүү юумэ үйлэдэнэт. Минии хүбүүнэй Ишайн хүбүүнтэй хэлсээ байгуулхада намда дуулгаһан хүн байгаагүй, таанадай хэншье минии түлөө сэдьхэлээ үбдөөгүй, минии хүбүүн урдаһаамни богоолыемни эсэргүү болгоо, энээн тушаа хэншье намда дуулгаагүй! – гэжэ хэлэн зэмэлбэ.

9 Тиихэдэнь Саулай зарасанарай хажууда зогсожо байһан эдоом хүн Доһээг:

– Ишайн хүбүүнэй Нооб руу, Ахитуубай хүбүүн Ахимээлэхтэ ерэһые би хараа һэм. 10 Ахимээлэх тэрээн тухай Эзэнһээ асуужа, тэрээндэ хүнэһэ үгөө, пилишт Голиафай һэлмые үгөө, – гэбэ.

11 Хаан нэгэ хүниие эльгээжэ, Ахитуубай хүбүүн, санаартан Ахимээлэхые болон Нообто санаартан байһан тэрэнэй түрэлхидые дуудажа, тэдэ бултадаа хаанда ерэбэ. 12 Саул:

– Ахитуубай хүбүүн, шагна, – гэхэдэнь, тэрэ:

– Эзэмни, би эндэ байнаб, – гэбэ. 13 Саул тэрээндэ:

– Юундэ ши Ишайн хүбүүнтэй хамта минии урдаһаа эсэргүү хэрэг үйлэдэжэ, тэрээндэ хилээмэ, һэлмэ үгэжэ, минии урдаһаа мүнөө эсэргүү болоходонь, занга намда бэлдэхэдэнь туһалан, тэрээн тухай Бурханда мүргөөбши? – гэбэ. 14 Ахимээлэх хаанда харюусан:

– Танай бүхы зарасанарай дунда Давидтал адли үнэн сэхэ хүн хэн бииб? Давид танай, хаанай хүрьгэн, танай харуулшадай дарга, гэртэтнай хүндэтэй хүн ха юм. 15 Би тэрэнэй түлөө ганса мүнөөдэр лэ Бурханда мүргэжэ эхилээ юм гүб? Үгы даа, хаан, өөрынгөө богоолые, минии эсэгын бүхы гэр бүлые эндэ бү зэмэлэгты. Юуб гэхэдэ, танай богоол бага, ехэшье юумэ энэ бүхы хэрэгтэ огто мэдэхэгүй байна, – гэжэ хэлэбэ.

16 Гэбэшье хаан:

– Ахимээлэх, ши заабол үхэхэ ёһотойш. Ши болон шинии эсэгын бүхы гэр бүлэ, – гэбэ. 17 Хаан хажуудань зогсожо байһан харуулшадтаа:

– Ошоод, Эзэнэй санаартадые алагты. Юуб гэхэдэ, тэдэ Давидтай ниилээ, тэрэнэй тэрьедэһые мэдээшье һаа, намда дуулгаагүй, – гэбэ. Теэд хаанай зарасанар Эзэнэй санаартанда гар хүрэжэ алахаяа зүрхэсэбэгүй. 18 Тиихэдэнь хаан Доһээгтэ:

– Ши ошоод, санаартадые ала, – гэхэдэнь, Эдоомой Доһээг ошожо, санаартанда добтолжо, маалинга эфод үмдэһэн наян табан хүниие тэрэ үдэр алаба. 19 Тэрэ санаартанай хото Нообые, эрэшүүлһээ эхилээд эхэнэрнүүд хүрэтэр, эдиршүүлһээ эхилээд нарай нялха үхибүүд хүрэтэр, үхэр, элжэгэ болон хонидые һэлмын эреэр усадхаба.

20 Гэбэшье Ахитуубай аша, Ахимээлэхэй нэгэ хүбүүн Абиатаар тэрьедэжэ, амиды үлөөд, Давид руу ошобо. 21 Эзэнэй санаартадые Саулай һалгааһан тухай Абиатаар Давидта мэдээсэбэ. 22 Тиихэдэнь Давид тэрээндэ:

– Тэрэ үдэр эдоом хүн Доһээг гэгшын тэндэ байхадань, тэрэ лаб Саулда дуулгаха гэжэ би мэдэжэ байгаа һэм. Би шинии түрэлхидэй гээгдэһэндэ зэмэтэйб. 23 Намтай хамта бай. Бү ай. Юуб гэбэл, намайе алахаяа һанаһан хэн нэгэн шамайешье алахаа эрмэлзэхэ. Намтай хамта ши харууһан доро байхаш, – гэбэ.