‏ 1 Samuel 23

Давид Кэилаае сүлөөлнэ

1Давидта:

– Пилиштүүд Кэилаада добтолон, тоогуудые дээрмэдэнэ, – гэжэ дуулдаба. 2Давидай Эзэнһээ:

– Би ошожо, эдэ пилиштүүдые хюдаха гүб? – гэжэ асуухадань, Эзэн Давидта:

– Яба, ши пилиштүүдые хюдахаш, Кэилаае абархаш, – гэжэ айладаба. 3Гэбэшье Давидай хүнүүд өөртэнь:

– Харагты, бидэ эндэ Иудада байһан мүртөө айжа байнабди. Яагаад Кэилаа руу, пилиштүүдэй сэрэгэй урдаһаа ошохо гээшэбибди? – гэлдэбэ. 4Тиихэдэнь Давид дахин Эзэнһээ асууба. Эзэн тэрээндэ харюусажа:

– Бодоод, Кэилаа руу ошо. Юуб гэхэдэ, Би пилиштүүдые шинии гарта үгэжэ байнаб, – гэжэ айладаба. 5Иигэжэ Давид өөрын хүнүүдтэй хамта Кэилаа руу ошожо, пилиштүүдтэй тулалдан, тэдэнэй мал һүрэгые буляан туужа, пилиштүүдые угаа олоор алаба. Иигээд Давид Кэилаагай ажаһуугшадые абараа бэлэй.

6Ахимээлэхэй Абиатаар хүбүүн Давидта Кэилаа руу тэрьедэн ерэхэдээ, гартаа эфод барин асарһан байгаа.

7Давидай Кэилаа руу ерэһэн тухай Саулда мэдээжэ болоходонь, тэрэ:

– Бурхан тэрэниие минии гарта үгэбэ. Юуб гэбэл, Давид хаалга, суургатай хотодо орожо, өөрөө өөрыгөө хаагаа, – гээ. 8Иигэжэ Саул Кэилаа руу ябахые, Давидые болон хүнүүдыень бүһэлхые бүхы арад зониие дуудажа суглуулба.

9Саулай өөртэнь хоро хэхэ гэжэ байһые Давид мэдээд, Абиатаар санаартанда:

– Эфод абажа ерэ, – гэжэ хэлэбэ. 10Тиигээд Давид:

– Израилиин Эзэн Бурхан! Саулай Кэилаа руу ерэжэ, намһаа боложо энэ хотые усадхахаяа байһые Танай богоол лаб дуулаад байна. 11Кэилаагай зон намайе тэрэнэй гарта үгэхэ гү? Танай богоолой дуулаһандал Саул хүрэжэ ерэхэ гү? Израилиин Эзэн Бурхан, богоолдоо мэдүүлжэ хайрлыт, – гэхэдэнь, Эзэн:

– Тэрэ ерэхэ, – гэжэ айладхаба. 12Давид:

– Кэилаагай зон намайе болон минии хүнүүдые Саулай гарта үгэхэ гү? – гэхэдэнь, Эзэн:

– Үгэхэ, – гэжэ айладхаба. 13Тиихэдэнь Давид болон тэрэнэй зургаан зуугаад зон, Кэилааһаа гаража, энэ тэрээгүүр түгэншэлэн амидарба. Кэилааһаа Давидай гаран гүйһые Саулда дуулгахадань, тэрэ тиишээ ошохоёо болибо.

Давид хада уулата нютагта хоргодоно

14Давид элһэн сүл губида бүхэлэлтэнүүдтэ хоргодожо, Зиип гэдэг элһэн сүл губиин хада уулаар байба. Саулай үдэр бүри тэрэниие бэдэржэ байбашье, Бурхан Давидые тэрэнэй гарта үгэбэгүй.

15Саулай өөрыень алахаяа бэдэржэ байһые Давид мэдэжэ байгаа.

Давид Зиипэй элһэн губида, Хорээштэ байба. 16Саулай хүбүүн Ёнатаан бодожо, Хорээш руу Давидта ерээд, Бурханда этигэлыень бүри шанга болгобо. 17Тэрэ Давидта:

– Бү ай. Юуб гэбэл, минии эсэгэ Саул шамайе олохогүй. Ши Израилиин хаан боложо, би шинии һүүлээр зогсохо хүн болохоб. Минии эсэгэ Саулшье энээн тухай мэдэжэ байна, – гэбэ. 18Иигээд тэдэ хоёр Эзэнэй урда хэлсээ баталба. Давид Хорээштэ үлэжэ, Ёнатаан өөрынгөө гэр руу бусаба.

19Зиипшүүд Гибаа руу Саулда ерэжэ:

– Давид Ешимооной урда зүгтэхи Хахилаагай гүбээдэ, Хорээштэхи бүхэлэлтэдэ, манай эндэ хоргодожо байна. 20Одоол иигэжэ, хаан, сэдьхэлэйнгээ хүсэл бэелүүлжэ, хүрэжэ ерэгты. Харин манай хэрэг – тэрэниие хаанай гарта тушааха гээшэ болоно, – гэжэ хэлэбэ. 21Саул:

– Эзэн таанарые үреэхэнь болтогой. Юуб гэхэдэ, таанад намайе хайрлабат. 22Ошыт даа, бүри эли тодорхой болгон, тэрэнэй ошодог газар болон тэндэ тэрэниие хараһан хүн тухай һайса шалгажа үзэгты. Юуб гэхэдэ, тэрэниие угаа мэхэтэй хүн гэжэ би дуулааб. 23Тиимэһээ хаража, тэрэнэй хоргодожо байһан бүхы газарнууд тухай мэдэжэ, лаб үнэн мэдээ абаад бусажа ерэгты. Тиихэдэтнай би таанартай хамта ябахаб. Хэрбээ тэрэнэй энэ орон нютагта байгаа һаань, би Иудын бүхы зон соогуур тэрэниие бэдэрэн олохоб, – гэбэ.

24Иигээд тэдэ бодожо, Саулһаа урид Зиип руу ябаба. Давид болон тэрэнэй хүнүүд Ешимооной урда зүгтэхи хүндыдэ, Маһоон гэдэг элһэн губида байгаа. 25Саул ба тэрэнэй хүнүүд Давидые бэдэржэ гараба. Энээн тухай Давидта мэдээсэхэдэнь, тэрэ Маһооной элһэн губида үлэн, хадатай газар руу ерэжэ бууба. Саул энээниие дуулаад, Давидай хойноһоо Маһоон элһэн губи руу мүрдэн ошобо. 26Саул уулын нэгэ талаар, Давид болон тэрэнэй хүнүүд уулын нүгөө талаар ябаба. Давид Саулһаа зайлаха гэжэ яаража ябаба, Саул өөрынгөө хүнүүдтэй Давидые зонтойнь хамта барихаар бүһэлжэ байба. 27Теэд нэгэ элшэ Саулда ерэжэ:

– Түргөөр ерэгты. Пилиштүүд орон нютаг руу добтолон ороо, – гэжэ дуулгаба. 28Иигэжэ Саул Давидые мүрдэн ябахаяа болижо, пилиштүүдэй урдаһаа ошобо. Тиимэһээ энэ газарые зон «Хубаарилгын хада» гэжэ нэрлээ бэлэй.