‏ 1 Samuel 29

Пилиштүүд Давидые газаашална

1Пилиштүүд бүхы сэрэгээ Апээгтэ суглуулба. Харин израильшууд Езрээлдэхи булагай хажууда хотон хүреэнээр тогтобо. 2Пилиштүүдэй ноёдой зуута, мянгатаараа үнгэрэн ябахада, Давид болон тэрэнэй хүнүүд Ахииштай хамта тэдэнэй һүүлдэнь ябаба. 3Пилиштүүдэй ударидагшад:

– Эдэ юун еврейнүүд гээшэб? – гэлдэбэ. Ахииш пилиштүүдэй ударидагшадта:

– Энэ хадаа Израилиин хаан Саулай зараса Давид гэжэ мэдэхэгүй юм гүт? Тэрэ намтай хамта нэгэ хоёр жэл соо байлсана, намда ерэһэнһээнь хойшо мүнөө болотор би тэрээндэ ямаршье муу юумэ олоогүйб, – гэжэ хэлэбэ. 4Теэд пилиштүүдэй ударидагшад Ахиишта уурлажа, тэрээндэ:

– Энэ хүн бидэнтэй хамта байлдаанда бү ябаг, тэрэниие һуурижуулһан газар руунь бусаагты. Байлдаанай үедэ тэрэ маанадай дайсан боложо магад. Эндэ байһан манай хүнүүдэй толгойһоо бэшэ ондоо юугээр тэрэ эзэнэйнгээ үршөөл хайрада хүртэхэб даа? 5«Саул мянгые алажа, Давид үй түмэниие алаба» гэжэ бүжэглэн дуулалдадаг хүниинь энэ Давид бэшэ гү? – гэлдэбэ.

6Ахииш Давидые дуудан:

– Эзэнэй нэрээр тангаригланаб, ши үнэн сэхэ хүнши. Намтай хамта сэрэгые ударидажа ябалсахадашни дуратай байха байгааб. Юуб гэхэдэ, намда ерэһэнһээшни хойшо мүнөө болотор би шамда ямаршье муу юумэ оложо обёороогүйб. Гэбэшье эдэ ноёд шамда дурагүй байна. 7Тиимэһээ пилиштүүдэй ноёдой дура гутаахагүйн тула мүнөө эрьежэ, амгалан тайбан буса, – гэбэ. 8Давид Ахиишта:

– Би юу хээбиб? Танай урда ерэһэн үдэрһөө хойшо мүнөө хүрэтэр танай богоол ямар муу юумэ хэһэндээ эзэн хаанайнгаа дайсадтай тулалдахаяа гаража шадахагүй юм бэ? – гэбэ ха. 9Ахииш Давидта харюусан:

– Бурханай Эльгээмэлдэл адли минии урда зүб байһыешни би мэдэнэб. Теэд пилиштүүдэй ноёд «Тэрэ маанадтай хамта байлдаанда бү ошог» гэжэ хэлээ. 10Ши хамта ерэһэн зонтоёо, эзэнэйнгээ зарасанартай, үглөөдэр эртэ бодомсоороо бусагты, – гэжэ хэлэбэ. 11Иигэжэ Давид болон тэрэнэй зон үглөөгүүр пилиштүүдэй газарта бусахаяа эртэлэн бодобо. Харин пилиштүүд Езрээл руу ябаа бэлэй.
Copyright information for BxrBBL2024