‏ 1 Samuel 8

Израиль өөһэдтөө хааниие эринэ

1Самуил үндэр наһатай боложо, өөрынгөө хүбүүдые Израилиин удамаршад болгон табиба. 2Ууган хүбүүнэйнь нэрэ Ёһээл, хоёрдохи хүбүүнэйнь нэрэ Абияа бэлэй. Тэдэ Бэһээр-Шээбэдэ удамаршад бэлэй. 3Харин хүбүүдынь эсэгынгээ замаар ябаагүй, эдилгэ тээшэ эрьежэ, бэлэгүүдые абан, ёһо гурим хазагайруулдаг байба.

4Израилиин бүхы аха захатан сугларан, Рамаа руу Самуилда ерэбэ. 5Тиигээд тэрээндэ тэдэ:

– Та үбгэрөөт. Хүбүүдтнай танай замаар ябанагүй. Тиимэһээ мүнөө бусад арадуудтал адли бидэниие зонхилхо хааниие маанадта табин томилжо үгыт, – гэжэ хэлэбэ. 6Тэдэнэй:

– Бидэниие зонхилхо хааниие маанадта үгэгты, – гэжэ хэлэһэниинь Самуилда һайшаагдабагүй. Самуил Эзэндэ мүргэн зальбарба. 7Эзэн Самуилда:

– Арад зоной шамда хэлэһэн бүхы юумэ дуула. Юуб гэхэдэ, тэдэ шамайе буруушаана бэшэ, харин тэдэниие зонхилон хаан байхыемни Намайе буруушаажа байна! 8Минии тэдэниие Египедһээ гаргаһан үдэрһөө хойшо мүнөө болотор тэдэ Намайе орхин, ондоо бурхадта алба хэһэндэл адляар тэдэ мүн лэ шамда иимэ юумэ хэжэ байна. 9Зай, тэдэнэй үгые дуула. Гансал ши тэдээндэ һайса һануулжа, зонхилхо хаанайнь эрхэнүүдые соносхо, – гэжэ айладхаба.

10Тэрээнһээ хааниие эрижэ байгааша арад зондо Самуил Эзэнэй бүхы үгэнүүдые хэлэжэ үгэбэ. 11Тэрэ хэлэхэдээ:

– Таанадые зонхилхо хаанай эрхэ мэдэлынь иимэ байха: хүбүүдыетнай тэрэ сэрэгэй албанда татан, морин тэргэнүүдтээ һуулгаха, мориндоо мордуулан байха, морин тэргэнүүдэйнь урдуур хэрэгтэй юумээрнь хангажа тэдэ гүйдэг байха. 12Хаан өөртөө мянгаад болон табин хүнэй дарга болгон тэдэниие томилхо, газараа тэдэнээр хахалуулхын, таряагаа хуряалгахын, сэрэгэй зэр зэбсэг болон тэргын хэрэгсэлнүүдые өөртөө хүүлэхын тула тиихэ юм. 13Басагадыетнай тэрэ абажа, хоншуу үнэртэй түрхилгэ дом бэлдүүлхэ, эдеэ хоол шануулха, хилээмэ болгуулха. 14Таанадай таряалан, үзэмэй болон олива модоной таряалангуудайтнай эгээл эрхимыень тэрэ абажа, өөрынгөө зарасанарта үгэхэ. 15Таряанайтнай үрэһөө болон үзэмэй таряаланһаатнай арбанай нэгэ хубиие тэрэ абажа, түшэмэлнүүдтээ ба зарасанартаа үгэхэ. 16Эрэ, эмэ богоолнуудыетнай, эгээл һайн, залууень, элжэгэнүүдыетнай тэрэ абажа, өөрынгөө ажал хэрэгүүдтэ хэрэглэхэ. 17Жэжэ бодо малайтнай арбанай нэгэ хуби тэрэ абаха, таанад өөһэдөө тэрэнэй богоолнууд болохот. 18Тиихэдээ таанад өөһэдтөө шэлэһэн хаанһаа боложо, хашхаран ёолон байхат. Теэд Эзэн таанадые дуулахагүй, – гэбэ.

19Гэбэшье арад зон Самуилай үгэ дуулахаһаа татагалзан:

– Үгы, маанадые зонхилхо хаан байха ёһотой. 20Бидэ бусад бүхы арадуудтал адли болохобди, манай хаан бидэниие зонхилхо, маанадай урда ябажа, байлдаануудтамнай маанадые ударидаха, – гэлдэбэ. 21Самуил арад зоной бүхы үгэнүүдые шагнаад, тэдэниие Эзэндэ дабтан хэлэбэ. 22Эзэн Самуилда айладан:

– Тэдэнэй үгэ дуулажа, хааниие тэдээндэ томило, – гэбэ.

Тиигээд Самуил Израилиин зондо:

– Хүн бүхэн өөр өөрынгөө хото руу бусагты, – гэжэ хэлэбэ.
Copyright information for BxrBBL2024