‏ 1 Thessalonians 5

1Аха дүүнэрни, эдэ бүхэнэй ушарха саг, болзор тухай таанадта бэшэһэнэй хэрэггүй. 2Эзэн ерэхэдээ, һүниндөө гэтэжэ ороһон хулгайшандал хүлеэгөөгүй байхада ерэхэ гэжэ таанад өөһэдөө яһала һайн мэдэнэт. 3Хүнүүдэй «Амгалан тайбан, аюулгүй һуунабди» гэжэ байхада, тэдэниие гэнтэ һүйдхэхэ. Тэрэ һүйдхэл болбол түрэхөө байһан эхэнэрэй үбдэдэг мэтэ гэнтэ эхилхэ, тиимэһээ хүнүүд тэрээнһээ зайлажа шадахагүй. 4Харин таанад, аха дүүнэрни, харанхы бүрэнхы соо һуунагүйт. Тиимэһээ тэрэ Үдэр болбол хулгайшан мэтэ хүлеэгөөгүй байхадатнай ерэхэ ёһогүй. 5Таанад булта гэрэл туяа бэдэрһэн, үдэрэй харьяалай хүнүүд гээшэт. Бидэ болбол һүниин, харанхы бүрэнхыгэй хүнүүд бэшэбди. 6Тиимэһээ бидэ бэшэ зондо адли унтаха ёһогүйбди. Бидэ һэргэлэн, эрүүл байха ёһотойбди. 7Юундэб гэхэдэ, һүниндөөл хүнүүд унтадаг, һүниндөөл хүнүүд һогтотороо уудаг. 8Гэхэдээ бидэ үдэрэй харьяалай хүнүүд хадаа эрүүл байха ёһотойбди. Бидэ һүзэг ба дуран хоёроо хуяг мэтэ үмдэжэ, абарагдаха найдалгаа дуулга мэтэ углаад байха ёһотойбди. 9Бурхан хэһээхын тула бэшэ, харин Эзэн Иисүүс Христоосой туһаар абархын тула бидэниие шэлэжэ абаа юм. 10Иисүүс бидэнэй орондо үхөө, тиимэһээ Тэрэнэй ерэхэдэ, бидэ амиды гүбди, наһа бараа гүбди, Тэрээнтэй хамта амидарха ёһотойбди. 11Тиимэһээ таанад бэе бэеэ урмашуулдаг, бэе бэедээ туһалдаг заншалаа үргэлжэлүүлжэл байгты.

Һүүлшын захяа заабари ба амаршалга

12Аха дүүнэрни, таанадай дунда ажаллажа, Бурханда һайшаагдаха ажамидаралда таанадые хүтэлжэ, һургажа байһан хүнүүдые хүндэлжэ байгты гэжэ бидэ гуйнабди. 13Хэжэ байһан ажалайнь түлөө тэдэнээ хүндэлжэ, тэдээндээ дуратай байгты. Өөһэд хоорондоо эбтэй эетэй байгты.

14Аха дүүнэрни, залхуу хүнүүдтэ ухаан заагты, зориггүй хүнүүдые урмашуулжа байгты, һулахан хүнүүдтэ дэмжэлгэ үзүүлэгты, хүн бүхэндэ ехэ тэсэбэритэй хандажа байгты гэжэ бидэ баһа гуйнабди. 15Таанадта муу юумэ хэхэдэнь, харюудань муу юумэ бү хэгты, харин бэе бэедээ, хүн бүхэндэ ходо һайн юумэ хэхые оролдогты.

16Ходо баяртай байгты. 17Ходо зальбаржа ябагты. 18Ямаршье нүхэсэлдэ бүхы юумэнэй түлөө бүгэдэндэ баясхалан хүргэжэ байгты. Иисүүс Христоосой харуулһан ёһоор тиимэ юумэ хэжэ байхыетнай Бурхан таанадһаа хүсэнэ.

19Арюун Һүлдынгөө гэрэлыень бү унтараагты. 20Уридшалан хэлэгдэһэн юумэнүүдые бү доромжологты. 21Бүхы юумые шалгажа үзөөд, һайнииень баримталжа ябагты. 22Элдэб гэмтэ ябадалнуудые хэнгүй байхые хэшээгты.

23Бидэндэ амгалан тайбаниие үршөөжэ байһан Бурхан таанадые бүримүһэн арюун гэгээн болгог, Эзэн Иисүүс Христоосой ерэтэр танай һанал бодол, һүнэһэ һүлдэ, махабад бэе бүрин бүтэнөөрөө ямаршье зэмдэг дутагдалгүй хадагалагдажа байг. 24Таанадые дуудаһан Бурхан найдабаритай ушарһаа тэрэ бүхэниие бэелүүлхэ.

25Аха дүүнэрни, бидэнэй түлөө баһа зальбаржа байгты.

26Бүхы һүзэглэгшэдые арюунаар таалан амаршалагты. 27Бүхы һүзэглэгшэдтэ энэ бэшэгые уншажа үгэгты гэжэ би Эзэнэй нэрээр гуйнаб.

28Эзэн Иисүүс Христоосой үршөөл хайра та бүхэнтэй оршожо байхань болтогой.