‏ 1 Timothy 2

Һүзэглэгшэдэй бүлгэмэй зальбаралга

1– 2Бурханда һүгэдэн, үнэн зүбөөр өөһэдыгөө абажа, аажам тэнюун, амгалан тайбан ажамидархын тула бүхы зоной, бүхы хаануудай, бүхы зонхилжо захиржа байгаа хүнүүдэй түлөө таанар Бурханда зальбарагты, гуйлта үргэгты, мүргэгты, баясхалан хүргэгты гэжэ нэн түрүүн таанадые гуйнаб. 3– 4Хүн бүхэн абарагдажа, үнэн зүбые мэдэрэг гэжэ хүсэһэн манай Абарагша Бурханда эдэ бүхэн һайшаагдаха, таатай байха. 5– 6Ушарынь юуб гэхэдэ, Бурхан ори ганса юм. Тиихэдэ Бурханай болон хүнүүдэй хоорондо гансал зууршалагша бии. Тэрэнь бүхы хүн түрэлтэниие абарха гэжэ Өөрыгөө үргэл болгоһон Христоос Иисүүс гэдэг Хүн мүн. Бурхан Өөрынгөө тогтооһон сагта Тэрээниие харуулаа. 7Тиимэһээ һүзэг ба хайра дурын үгэ айладхахаар һургагша ба элшэнээр табигдан, би бусад арадуудта эльгээгдэһэн байгааб. Би худал юумэ хэлэнэгүйб, үнэниие хэлэнэб.

8Бурханда өөрыгөө зорюулһан хүн бүхэнэй ямаршье газарта уур сухалгүйгөөр, хэрүүлгүйгөөр гараа өөдэнь һарбайгаад, зальбаржа байхыень хүсэнэб. 9Эхэнэрнүүдшье хубсаһа хунартаа бодолтойгоор хандажа, даруухан, зохидоор хубсалжа байг. Үһэеэ гоёохо, алтан зүүдхэлээр гү, али эрдэни субадаар гү, али үнэтэй хубсаһаар өөһэдыгөө шэмэглэхэеэ оролдонгүй, 10харин шажан Бурханда зорюулһан эхэнэрнүүдтэл зохихо үлзытэй һайхан үйлэ хэрэгүүдээр өөһэдыгөө шэмэглэжэ байхыень хүсэжэ байнаб. 11Эхэнэр хүн абяагүй, номгоноор юумэндэ һуража байха ёһотой. 12Эхэнэрэй үбгэеэ һургахыень гү, али тэрээндээ захирхыень би хориноб. Эхэнэр хүн дуугүй байха ёһотой. 13Юундэб гэхэдэ, түрүүн Адаам, һүүлдэнь Ева бүтээгдээ. 14Тиихэдээ могой Адаамые мэхэлээгүй, харин эхэнэрыень лэ мэхэлээ, тиигэжэл эхэнэрынь Бурханай хуулиие эбдээ. 15Гэхэтэй сасуу эхэнэр хүн Бурханда һүзэглэжэ, бусад зондо дуратай, арюун нангин ажамидаралтай байбал, үхибүү түрэжэ, абарагдаха.
Copyright information for BxrBBL2024