‏ 1 Timothy 4

Хуурмаг һургагшад тухай һургаал

1Һүүлшын үдэрнүүдтэ зарим хүнүүд һүзэгөө алдаха, ада шүдхэрнүүдэй альбанда орохо, шолмосой һургаалые анхарха гээд Арюун Һүлдэ элеэр хэлэнэ. 2Тэрэ хуурмаг һургаал халуун түмэртэ хайруулжа, һэшхэлээ алдаһан билдагууша худалшадай оролдолгоор тараха. 3Тэдэ зон гэрлэхые, зарим юумэ эдихые хорихо. Зүгөөр Бурхан тэрэ эдеэ хоолые баясхалан хүргэһэн зальбаралай һүүлдэ һүзэглэгшэдтэ, үнэн зүбые мэдэрһэн хүнүүдтэ эдихыень бүтээгөө. 4Бурханай бүтээһэн бүхы юумэн һайн, тиимэһээ ямаршье юумэнһээ арсангүй, харин баясхалангай зальбарал хүргэн абаха ёһотойбди. 5Ушарынь гэхэдэ, Бурханай үгөөр, зальбаралаар тэдэ юумэнүүд арюудхагдана.

Иисүүс Христоосой һайн албатан

6Иимэ заабаринуудые һүзэглэгшэдтэ үгэжэ байбал, өөрыгөө зорюулһан үнэн зүб һургаалаар ба һүзэгэй үгэнүүдээр һанал бодолоо дүүргэжэ, ши Христоос Иисүүсэй һайн албатан болохош. 7Бурханиие буруушааһан үльгэр зугаануудһаа холодожо, Бурханай мэдэлдэ байжа һура. 8Бэеын һорилго бага зэргэ туһатай, гэхэдэ оюун ухаанай дадалга алишье сагта туһатай, ушарынь хэлэбэл, тэрэ эндэ газар дэлхэй дээрэшье, ерээдүйдэ тэнгэридэшье амидарал найдуулна. 9Минии хэлэһэн үнэн зүб юм, тэрээндэ этигэжэ болохо. 10Амиды Бурханда найдажа байһан хадаа бидэ тэмсэжэ, хүндэ ажал хэжэ байнабди. Ушарынь юуб гэхэдэ, амиды Бурхан бүхы хүнүүдэй, илангаяа һүзэглэгшэдэй Абарагша мүн.

11Эдэ бүхэниие хүнүүдтэ захи, эдэ бүхэндэ хүнүүдые һурга. 12Залуухан байнаш гээд шамда хайхарамжагүйгөөр бү хандаг. Ши хэлэһэн үгөөрөө, амидаралаараа, хайра дураараа, һүзэгөөрөө, арюун сэбэрээрээ һүзэглэгшэдтэ жэшээ харуулжа байгаарай. 13Шамда ошоторни, ши хүнүүдтэ Нангин Бэшэг уншажа, номножо, тайлбарилжа байгаарай. 14Бүлгэмэй хүтэлэгшэдэй уридшалан хэлээд, дээрэшни гараа табихадань, шамда абьяас бэлиг үгтөө. Тэрэ абьяас бэлигээ хэрэглэжэ байгаарай. 15Хүн бүхэндэ амжалтануудайшни элеэр харагдажа байхынь тула ши эдэ үүргэнүүдээ дүүргэжэ бай, өөрыгөө бүрин тэдэндэ зорюула. 16Ажабайдалдаа, һургажа байһан юумэндээ анхаралаа хандуула. Тиигэжэ байбал, ши өөрыгөөшье, өөрынгөө шагнагшадыешье абархаш.
Copyright information for BxrBBL2024