1Ti 6 | BxrBBL2024 | STEP | Бурханай нэрэ алдарые, манай һургаалые хүнүүдэй муулахагүйн тула дарлалтада байһан барлагууд эзэдээ алишье талаһаань хүндэлжэ байха ёһотой.

‏ 1 Timothy 6

1 Бурханай нэрэ алдарые, манай һургаалые хүнүүдэй муулахагүйн тула дарлалтада байһан барлагууд эзэдээ алишье талаһаань хүндэлжэ байха ёһотой. 2 Христоосто һүзэглэдэг эзэнэй богоолшолгодо байһан барлаг нэгэ һүзэгтэй эзэнтэй байһан ушарһаа эзэндээ хайхарамжагүйгөөр хандаха ёһогүй. Тэрээнһээ гадна, һүзэгтэй, Бурханай хайра дурада хүртэһэн хүндэ алба хэжэ байһандаа бүришье оролдосотойгоор ажаллаха ёһотой.

Хуурмаг һургаал ба жэнхэни баялиг

Ши тиигэжэл хүнүүдые һургажа, идхажа байгаарай. 3 Ондоо юумэндэ һургажа байһан, Эзэн Иисүүс Христоосой үнэн үгые болон манай шажанай һургаалые баримталангүй байһан хүн 4 юушье мэдэхэгүй омог зантай хүн гээшэ. Тиимэ хүн арсалдаа гаргажа, үгэ буляалдажа һурашанхай. Тэдэнь атаа жүтөөн, хэрүүл ама, хорон үгэ ба хуурмаг һэжэг түрүүлдэг. 5 Тиимэ хүнүүд үнэн зүбһөө холодоһон, балартаһан ухаантай хүнүүдээр дэмы заргалдажа байдаг. Тэдэнэр зөөри баялигтайл болохын тула Бурханда шүтэдэг гэжэ бододог ^{▼▼ Зарим эхэ бэшэгүүдтэ «Тиимэ хүнүүдһээ зайсажа бай» гэжэ нэмэжэ бэшэгдэнхэй.}.

6 Бурханда һүгэдэхэ, бии юумээрээ сэдьхэл дүүрэн байха маанадай асари ехэ баялиг гээшэ. 7 Газар дэлхэйдэ бидэ юушье асараагүйбди, тиин эндэһээ юушье абажа ябаха аргагүйбди. 8 Тиимэһээ эдеэ хоол, хубсаһа хунар байбал, бидэндэ хангалтай бэшэ гү? 9 Харин баяжахаяа һанаһан хүнүүд хорхойтолгодо абтажа, тэдэниие гай зоболондо ба үхэлдэ хүргэдэг олон тэнэг ба хорото хүсэлэнгүүдэй һабарта ородог гээшэ. 10 Хамаг муу муухай юумэн алта мүнгэндэ шунаһанһаа болодог. Алта мүнгэндэ шунаад, зарим хүнүүд этигэлээ алдаа, өөһэдыгөө тон ехээр туляагаа.

Павел зүбшэл үгэнэ

11 Харин ши, Бурханай хүн, эдэ бүхэнһөө болгоомжоло. Ши Бурханай урда үнэн сэдьхэлтэй бай, Бурханай эрхэ хүсэлые гүйсэдхэ, Тэрээндэ һүзэглэжэ, хайра дура сэдьхэлдээ бадараа, тэсэбэритэй, номгон даруу зантай бай. 12 Христоосто һүзэглэн, ажамидаралдаа илалта туйлажа бай. Мүнхын амидаралай дээдын шагналда хүртэхэеэ зори. «Христоос болбол Эзэн гээшэ» гэжэ гэршэнэрэй урда хэлэхэдэшни, Бурхан шамайе мүнхын амидаралда дуудаа. 13 – 14 Бүхы юумэндэ ами хайрлажа байһан Бурханай урда, Понтий Пиладта һүзэгөө баталжа хэлэһэн Христоос Иисүүсэй урда Эзэн Иисүүс Христоосой ерэхэ үдэр хүрэтэр гэмнүүлхэгүйн тула заабариие үнэн сэхээр сахижа байхыешни би шамда захинаб. 15 Ори ганса Захирагша, хаануудай Хаан, эзэдэй Эзэн болохо үршөөлтэ Бурхан хэрэгтэй сагта Христоосой ерэхые харуулха. 16 Бурхан гансаараал мүнхэ юм, Тэрэ хэнээшье хүрэхэгүй гэрэл туяада байдаг. Нэгэшье хүн Тэрэниие хаража үзөөгүй, хаража шадахашьегүй. Тэрээндэ нэрэ хүндэ ба мүнхын һүр хүсэ байг лэ. Болтогой!

17 Баян хүнүүдэй зөөри зөөшөөрөө бүдүүрхэхэгүйень, иимэ мэтын найдабаригүй баялигта найдахагүйень захира, зүгөөр аяшаажа байха юумэ элбэг дэлбэгээр маанадта үршөөжэ байдаг амиды Бурханда найдажа байхыень заабаришалжа бай. 18 Дэмбэрэлтэ һайхан юумэ хэжэ, үлзы һайхан хэрэгүүдээрээ баяжажа, бардам гартай, бусад хүнүүдтэй юумээрээ хубаалсахада бэлэн байхыень заабаришалжа бай. 19 Тиигэжэл ерэдүйдэ мүнхын амидаралай бата һуури болохо баялигые тэдэ өөһэдтөө суглуулха.

20 Тимофей, шамда даалгаһан юумые сахижа бай. Хэрэггүй хооһон үгэнүүдһээ, «эрдэм ухаан» гэжэ зарим хүнүүдэй худалаар нэрлэһэн, Бурханиие буруушааһан арсалдаанһаа зайсажа бай. 21 Зарим хүнүүд тиимэ «эрдэм ухаантайбди» гээд, һүзэгөө алдаа.

Бурханай үршөөл хайра та бүхэнтэй оршожо байг лэ.