‏ 2 Chronicles 11

Эзэн Израилиин арадтай дайлалдахыень Рэхобаамые хорино

1Рэхобаам Иерусалим руу ерэжэ, Иудын болон Бэньямиинэй обогуудһаа дайнда дүрэтэй зуун наян мянган эрхим эрэшүүлые суглуулба. Тэдэ Израильда добтолжо, бүхы орон нютагые Соломооной хүбүүн Рэхобаамай мэдэлдэ оруулха ёһотой байгаа. 2Гэбэшье Бурхан лүндэншэ Шэмаяада иигэжэ айладхал буулгаба:

3– 4– Өөрын аха дүүнэртэй, Израилиин арад зонтой, дайн дажар бү үүдхэгты, гэр гэртээ харигты, юуб гэхэдэ, эдэ бүгэдые Эзэн ушаруулаа гэжэ Соломооной хүбүүн, Иудын хаан Рэхобаамда болон Иудын ба Бэньямиинэй бүхы зондо ойлгуулан хэлэ. Тэдэ Эзэнэй үгэ дуулажа, Еробоһаамай урдаһаа дайлалдахаяа ошожо ябаһанаа бусажа, гэр гэртээ хариба.

5Рэхобаам Иерусалимда ажаһуухадаа, Иудын хотонуудые тойруулан хэрэм ханануудые барюулаа бэлэй. 6Тэрэ Бэтлэһээм, Этаам, Тэкооһа, 7Бэт-Цуур, Сохоо, Адуллаам, 8Гаат, Марэшаа, Зиип, 9Адорааим, Лахииш, Азэкаа, 10Цораа, Аялоон, Хэброон гэдэг Иудын болон Бэньямиинэй обогуудай ажаһуудаг хотонуудые иигэжэ бүхэлөө һэн. 11Иигэжэ тэрэ эдэниие хэрэм ханануудаар бүхэлжэ, харюусалгата зониие табин, орооһо таряа, тоһо, үзэмэй дараһан архи хадагалдаг амбаарнуудые зохёобо. 12Тиихэдэ жада, бамбануудаар угаа шангаар тэдэниие бүхэлөөд, Иудын болон Бэньямиинэй харьяата газарнуудые өөрын хиналта доро байлгаа һэн.

13Израилиин газар уһан дээрэ байгааша санаартад болон левидүүд тэрээн руу сугларба. 14Юуб гэбэл, Еробоһаам болон хүбүүдынь Эзэнэй санаартад байхаһаань тэдэниие болюулһан байгаа. Тиихэдэнь тэдэ левидүүд өөһэдын хото байра орхижо, Иуда руу, Иерусалим руу, ерээ һэн. 15Еробоһаам мүргэлтэ газарнуудта, тэхэ ямаануудай, буруун тугалнуудай дүрсэнүүдтэ мүргэдэг газарнуудта өөрын санаартадые табяа бэлэй. 16Израилиин бусад обогуудай зон Эзэн Бурханда мүргэхэеэ хүсэбэл, иишээ ерээ һэн. Иигэжэ санаартадай болон левидүүдэй хойноһоо зарим зон Иерусалим руу ерэжэ, үбгэ эсэгэнэрэйнгээ Эзэн Бурханда үргэл хэхэеэ ерэдэг байгаа. 17Тэдэ Иудын хан түрэдэ гурбан жэл соо ажаһуужа, Давид болон Соломоондо үнэн сэхэ байһанаа элирхэйлэн, Соломооной хүбүүн Рэхобаамые дэмжэн гурбан жэл байгаа.

18Давидай хүбүүн Еримоодой басага Махалаадые, мүн Ишайн хүбүүн Элиаабай басаган Абиһааилые Рэхобаам һамга абаа бэлэй. 19Тэдээнһээ тэрэ Еһүүш, Шэмаарияа, Заһаам гэдэг хүбүүдтэй болоо һэн. 20Удаань Абшалоомой басага Маһахаа гэгшые тэрэ һамган болгон абажа, тэрэнь Абияа, Аттай, Зизаа, Шэломиит гэдэг хүбүүдые түрөө бэлэй. 21Рэхобаам арбан найман һамгатай, жаран бага һамгантай, тэдээнһээ хорин найман хүбүүтэй болон жаран басагатай байгаа. Абшалоомой басага Маһахаада тэрэ бусад һамгад, бага һамгадһаа үлүү дуратай һэн. 22Тиигээд тэрэ Маһахаагай хүбүү Абияа гэгшые аха дүүнэрэйнь удамаршаар табиба. Юуб гэбэл, тэрэ иигэжэ Абияае хан шэрээдэ удаань һуулгаха гэһэн түсэбтэй байгаа. 23Рэхобаам сэсэн мэргэнээр хэрэг ябуулжа, бусад хүбүүдээ Иудын болон Бэньямиинэй газар нютагуудаар, бүхэлэгдэһэн хотонуудаар байрлуулжа, мүнгэ алта тэдээндээ ехээр үгэжэ, олон һамгадые абуулаа бэлэй.
Copyright information for BxrBBL2024