2Ch 12 | BxrBBL2024 | STEP | Рэхобаамай хан түрын батажахада, өөрөө хүсэ шадалтай болоходоо, тэрэ болон албата бүхы зониинь Эзэнэй һургаал орхижорхёо бэлэй.

‏ 2 Chronicles 12

Шишаак Иерусалимда добтолно

(3 Хаан 14:21-31)

1 Рэхобаамай хан түрын батажахада, өөрөө хүсэ шадалтай болоходоо, тэрэ болон албата бүхы зониинь Эзэнэй һургаал орхижорхёо бэлэй. 2 Эзэндэ урбаһанайнь ушарһаа Рэхобаамай табадахи жэлээ хааншалжа байха үедэ Египедэй хаан Шишаак Иерусалимда добтолжо, 3 нэгэ мянга хоёр зуун дайшалхы тэргэтэй, жара мянган морин сэрэгтэй юумэн угаа олон сэрэг Египедһээ асарба. Тэрэ тоодо Ливиин, Суккоодой, Эфиопиин сэрэгшэд ерэлсээ. 4 Шишаак Иудын хан түрын хэрэм хотонуудые эзэлэн абажа, Иерусалимда тулан ерэбэ.

5 Лүндэншэ Шэмаяа гэгшэ Рэхобаамда болон Шушаагһаа хорон Иерусалимда сугларагша Иудын удамаршадта ерэжэ, иигэжэ айладхаба:

– Эзэн иигэжэ айладхал буулгана: Намайе орхиһонойтнай түлөө Би мүнөө таанадые Шушаагай һабарта орхихоб!

6 Хаан болон удамаршад үгэнүүдэй зүб байһые мэдэржэ, иигэжэ хэлэбэ:

– Эзэнэй мэдэлээр лэ болохо.

7 Тэдэнэй буруугаа ойлгоһониие Эзэн хаража, дахин Шэмаяа гэгшэдэ иигэжэ айладхаба:

– Тэдэ буруугаа мэдэрээ. Тиимэһээ Би тэдэниие хюдахагүйб, һаяар сүлөө болгохоб, Иерусалим дээрэ уур сухалаа Шушаагай гараар хүргэхэгүйб. 8 Гэбэшье тэдэ Шишаагай зарасанар болохо. Тиихэдээ Намда алба хэхэ гээшые дэлхэйн хаан түрэнүүдтэ алба хэхэ гээшэһээ илгаруулан ойлгохо.

9 Египедэй хаан Шишаак Иерусалимые эзэлэн орожо, Эзэнэй Һүмын болон хаанай ордоной баялигуудые олзолон абаба. Бүхы юумэ тэрэ хуряан абаа, Соломооной хэһэн бүхы алтан бамбайнуудыешье абаа. 10 Тэрэ алтан бамбайнуудай орондо Рэхобаам гуулин бамбайнуудые бүтээлгээд, хаанай ордоной үүдэ харууһалагша сэрэгэй ноёдто үгэбэ. 11 Хаанай Эзэнэй Һүмэ руу ошоходонь, харуулшад тэдэ бамбайнуудые абаад ябадаг һэн, удаань харуулай таһаг руу дахин абаашагша бэлэй. 12 Хаанай буруугаа мэдэрэн байхадань Эзэн тэрээндэ уураа хүргэнгүй, эсэслэн тэрэниие хюдабагүй, тиигээдшье Иудын хан түрэдэ һайншье юумэнүүд ушараа бэлэй.

Рэхобаамай засаглалай эсэс

(3 Хаан 14:21-24, 29-31)

13 Рэхобаам Иерусалимда зонхилон, хаан засагаа батадхан байба. Хаан шэрээдэ залархадаа Рэхобаам дүшэ нэгэтэй байгаа. Израилиин обогуудһаа Эзэнэй шэлэн абажа, алдар солоёо дуудуулан байһан Иерусалим хотодо тэрэ арбан долоон жэлэй туршада хааншалаа. Эхынь нэрэ Наһамаа, аммоон арадай бэлэй. 14 Эзэниие дахан бэдэрэн байха һэдэлгэ хэдэггүй байһандаа тэрэ муу юумэ хэжэ байгаа гээшэ.

15 Эхинһээ эхилээд эсэс хүрэтэр Рэхобаамай бүхы хэрэгүүд Шэмаяа лүндэншын болон Иддоо мэдэлшын бэшэһэн угай бэшэгүүд соо зураглагданхай. Рэхобаам Еробоһаам хоёр хоорондоо саг үргэлжэ дайлалдажа байгаа. 16 Рэхобаам наһа баража, Давидай хото соо уг удамайнгаа агы нүхэн хуурсаг соо хүдөөлүүлэгдэбэ. Абияа хүбүүниинь орондонь хаан шэрээ эзэлбэ.