‏ 2 Chronicles 15

Асаагай хубилалтанууд

(3 Хаан 15:13-16)

1Одээд гэгшын хүбүүн Азаарияа руу Бурханай Һүлдэ нэбтэрэн оробо. 2Тэрэ Асаада ерэжэ, иигэжэ хэлэбэ:

– Асаа болон Иудын, Бэньямиинэй улад зон, намайе шагныта! Эзэнтэй хамта байбалтнай, Тэрэ таанадтай хамта оршохо. Тэрэниие бэдэрээ һаа, олохот; харин Эзэниие орхиболтнай, Тэрэ таанадые орхихо. 3Олон үдэрэй туршада Израиль бодото үнэн бурхангүй, һургадаг санаартагүй, хуули ёһогүй байха. 4Харин гай тодхорой тохёолдоходо, тэрэ Израилиин Эзэн Бурханда эрьежэ, бэдэржэ эхилхэ. Тиихэдэнь Тэрэ Өөрыгөө олгуулха. 5Тэрэ үедэ гаража орожо байгааша зондо аюултай болоод байха. Юуб гэбэл, орон нютагуудай ажаһуугшадай байдалда ехэ гэгшын хёморолдоон болохо. 6Үндэһэ яһатан нүгөөдэ яһатаниие, хото нүгөө хотые мунсадаха, юуб гэбэл, Бурхан элдэб гай тодхор ушаруулан, тэдэниие хүлгөөн байха. 7Харин таанад шанга байха ёһотойт, зоригтнай бү мүхэг, юундэб гэбэл, хэһэн хэрэгэйтнай түлөө шагнал байха.

8Лүндэншэн Одээдэй хүбүүн Азаарияа гэгшын айладхаһан лүндэн шагнахадаа, Асаа зоригжон, Иудын болон Бэньямиинэй нютагуудһаа онгон хүрэгүүдые, Эпрааим гэдэг хадалиг газарта оршогшо хотонуудһаа онгонуудые үгы хэбэ. Һүмын досоо хорёо соо оршодог Эзэнэй үргэлэй шэрээ тэрэ заһабарилба. 9Эпрааимай, Мэнашшээгэй, Симеоной улад зон Эзэн Бурханай Асаа гэгшые дэмжэн байхые харахадаа, тэрээн руу олоороо ерэжэ ажаһуугаа. Асаа Иудын болон Бэньямиинэй бүхы зониие, мүн тэдээнтэй хамта ажаһуугааша Эпрааимай, Мэнашшээгэй, Симеоной зониие дуудаба. 10Тэдэ Иерусалимда Асаагай хааншалгын эхинһээ арабан табадахи жэлэй гурбадахи һарын ябажа байхада сугларба. 11Тэрэл үдэртөө тэдэ туужа асарһан долоон зуун бодо малаар, долоон мянган хонёор үргэл Эзэндэ үргэбэ. 12Үнэн зүрхэнһөө, бүхы сэдьхэлһээ Эзэн Бурханиие шүтэн хүндэлэн байха тухай хэлсээ тэдэ баталба. 13Израилиин Эзэн Бурханиие хүндэлэн шүтэдэггүй хүн бүхэн – бага, ехэшье, эрэ, эмэшье, бултадаа, хосорхо зэргэтэй. 14Үхэр бүреэ, эбэр бүреэ дуугаруулан, шанга шууяатайгаар тэдэ Эзэндэ үнэн сэхэ байха тухайгаа тангариглаа бэлэй. 15Иигэжэ Иудын улад зоной жэншэдгүй Эзэн Бурханда шүтэхэдэ, Тэрэ Өөрыгөө олгуулба. Зон үнэнхэ зүрхэнһөө Тэрээндэ тангариглажа, энээндээ ехэ баяртай байгаа. Эзэн иигэжэ тэдээндэ бүхы талаһаань энхэ тайбан байдал бэлэглээ һэн.

16Ашэраа бурханай хүрэг бүтээлгэһэнэйнь тула Маһахаа гэдэг нагаса эжыгээ хатанай нэрэ хүндэһөө буулгаа бэлэй. Асаа тэрэ хүрэгыень унагаалгажа, хэдэн хэһэг болгон бута сабшуулаад, Кидроон горхоной хажууда шатаалгаба. 17Израилиин газар дайдада мүргэлэй бүхы обоонуудые үгы хээгүйшье һаа, Асаа бүхы наһандаа Эзэндэ үнэн сэхэ байгаа. 18Өөрөө Бурханда зорюулжа, мүн эсэгынгээ Бурханда зорюулһан мүнгэ, алта болон Һүмын хэрэгсэлнүүдые Бурханай Һүмэ руу тэрэ оруулжа табяа һэн.

19Иудын орон дайдада энхэ тайбан байдал Асаа гэгшын хааншалгын гушан табадахи жэл хүрэтэр үргэлжэлөө бэлэй.
Copyright information for BxrBBL2024