2 Chronicles 17
Ёшапаат – Иудын хаан
1Ёшапаат хүбүүниинь орондонь хаан болобо. Тэрэ Израилиин урдаһаа эсэргүүсэхэ хүсэ шадалтай болоо бэлэй. 2Иудын бүхы хэрэм хотонуудые аршалха сэрэг тэрэ табиба, Иудын газар дайдаар болон Асаа эсэгынгээ эзэмдэн абагша Эпрааимай хотонуудаар мүн лэ тэрэ сэрэг табяа бэлэй. 3Элинсэг хулинсаг болохо Давидай жэшээ даган ябажа, Баалда зальбардаггүй байһандань Эзэн тэрэниие үреэгөө һэн. 4Тэрэ эсэгынгээ Бурханда шүтэдэг, захяа заабаринуудыень дүүргэдэг, израильшуудай хэрэгүүдые һажаадаггүй бэлэй. 5Эзэн Тэрэнэй хааншалга үреэжэ, Иудын улад зон Ёшапаадта бэлэг сэлэг үргэдэг байгаа. Иигэжэ тэрэ угаа баян, алдар солотой болоо һэн. 6Эзэндэ алба хэжэ байһандаа тэрэ омогорхон, Иудын хан түрэдэ ондоо бурхадта мүргэдэг газарнуудые тэрэ үгы хээ бэлэй. 7Хан түрэ зонхилжо эхилһэнһээ хойшо гурбадахи жэлэйнгээ ябажа байхада тэрэ Иудын хотонуудаар улад зониие һургахын тула тусхай зоноо – Бэн-Хайилые, Обадияа, Захарияа гэгшэдые, Нэтанээлые, Михайяа гэгшые эльгээбэ. 8Мүн лэ левидүүдые: Шэмаяа, Нэтаанияа, Зэбаадьяа, Асаһээл, Шэмирамоот, Ёнатаан, Адонияа, Тобиия, Тооб-Адонияа гэгшэдые, мүн тэдэнтэй хамта Элишамаа, Ёраам гэдэг санаартадые эльгээлсэбэ. 9Эзэнэй ёһо гуримуудай ном баринхай, тэдэ Иудын бүхы хотонуудаар ябажа, зониие һургаба. 10Иудын хажуугаар оршодог хан түрэнүүдые Эзэн Иудаһаа айдаг болгобо. Тиимэһээ тэдэ Ёшапаадтай дай үүдхэдэггүй бэлэй. 11Пилиштын зон Ёшапаадта мүнгэ, бэлэг баридаг һэн. Мүн лэ Араабай зон тэрээндэ долоон мянга долоон зуун хони, долоон мянга долоон зуун ямаа бэлэг үгэбэ. 12Иигэжэ Ёшапаат бүри хүсэтэй болон, Иудын хан түрэ соо хэрэмүүдые болон нөөсэнүүдэй хотонуудые барюулаа бэлэй. 13Тэрэ хаан түрэ соогоо олон гэгшын нөөсэтэй, Иерусалим хото соо эрэлхэг сэрэгтэй һэн. 14Түрэл түтимэйнь ёһоор бүридхэлынь гэбэл, Иудын обогой түмэн сэрэгэй дарганар: гурбан зуун мянган эрхим сэрэгтэй Һаднаа, 15удаань хоёр зуун наян мянган сэрэгтэй Ёханаан жанжин, 16удаань Зихриигэй хүбүүн, эзэндэ үнэн сэхэ Амацияа хоёр зуун мянган эрхим сэрэгтэй; 17Бэньямиинэй обогой Элиадаа гэдэг эрхим сэрэгшэ һурша номтой, бамбайтай хоёр зуун мянган сэрэгтэй, 18удаань зэр зэбсэгтэй нэгэ зуун наян мянган сэрэгтэй Ёзабаад. 19Эдэ зон хаанда алба хээ. Тэдэнһээ гадна Иудын хэрэм хотонуудаар үшөө сэрэг байгаа һааб даа.
Copyright information for
BxrBBL2024