‏ 2 Chronicles 19

Ёшапаат заргашадые томилно

1Иудын хаан Ёшапаат амиды мэндэ Иерусалим руу гэртээ бусажа ябаба. 2Ханааниин хүбүүн, лүндэншэ Еһүү тэрээндэ дайралдажа, иигэжэ хэлэбэ:

– Муу хүндэ туһалжа байһанайш тула, Эзэниие үзэн ядадаг зонтой үелжэ байһанайш тула Эзэн шамда угаа уурлажа байна! 3Гэбэшье бүхы хэрэгүүдшни муу бэшэ. Ашэраа бурханда мүргэдэг онгонуудые ши галдан үгы хээш, Бурханиие шүтэн хүндэлдэг байхаяа оролдонош.

4Ёшапаат Иерусалимда ажаһуудаг бэлэй. Гэбэшье тэрэ харьяата газар дайдаараа ябажа, Бэһээр-Шээбэһээ хадалиг Эпрааим хүрэтэр аяншалжа, үбгэ эсэгэнэрэйнгээ Эзэн Бурханда мүргэн шүтэдэг байхыень зониие һургажа эхилбэ. 5Иудын хэрэм ханануудтай бүхы хотонуудаар шүүбэрилэгшэдые табижа, 6тэдээндэ иигэжэ хэлээ һэн:

– Юу хэжэ байһанаа мэдэржэ байгты. Таанад зоной бэшэ, Эзэнэй зарга шүүбэри хэжэ байна гээшэт. Эзэн таанадай хэрэгтэтнай оролсоно. 7Эзэнһээ айжа байгты, болгоомжолжо зарга хэрэгүүдые шиидхэгты. Эзэн Бурхамнай үнэн бэшые, нюур илгажа шүүбэрилгые, эдилгэ абалгые эрид хоридог.

8Левидүүдэй, санаартадай болон уг унгинуудай ахамадые Ёшапаат шэлэжэ, Иерусалимда Эзэнэй зарга хэрэгүүдые шиидхэхэ уялгатай болгобо. Тиигээд тэдээнтэй хамта Иерусалим руу ерэжэ, 9иимэ захяа тэдээндэ тэрэ үгэбэ:

– Эзэндэ үнэн сэхээр албалагты. 10Шуһа урдахуулһан гү, хуули еһын, захяа гуримай, дүримэй, ёһо заншалнуудай гү – элдэб арсалдаата хэрэгүүд арад зонһоомнай орожо байха. Зүбөөр шиидхэжэ байгты, Эзэнэй урда нүгэлтэй тэдэниие бү болгогты. Уур хилэнгынь таанадта, мүн арад зондотнай бү хүрэг. Иигэжэ үйлэ ябуулбал, нүгэл абахагүйт. 11Ахамад санаартан Амарияа шажан мүргэлэй хэрэгые эсэслэн шиидхэхэ эрхэтэй. Ишмаһээлэй хүбүүн, Иудын обогой ахалагша Зэбаадьяа бусад хэрэгүүдые эсэслэн шиидхэхэ. Левидүүд таанадта туһалха. Шанга байгты, хэрэгүүдые эрхилэгты, Эзэн таанадта зүбөөр хэрэг эрхилхэдэ туһалха.
Copyright information for BxrBBL2024