2Ch 21 | BxrBBL2024 | STEP | Ёшапаат наһа баража, элинсэг хулинсагтаяа хамта Давидай хото соо хүдөөлүүлэгдөө һэн. Тэрэнэй орондо Иораам хүбүүниинь хаан шэрээдэ заларба.

‏ 2 Chronicles 21

Иораам – Иудын хаан

(4 Хаан 8:16-24)

1 Ёшапаат наһа баража, элинсэг хулинсагтаяа хамта Давидай хото соо хүдөөлүүлэгдөө һэн. Тэрэнэй орондо Иораам хүбүүниинь хаан шэрээдэ заларба. 2 Израилиин Ёшапаат хаан долоон хүбүүтэй байгаа: Иораам, Азаарияа, Ехиһээл, Захарияа, Азаарияа, Михаээл, Шэпаатияа. 3 Тэрэ хүбүүдтээ алта, мүнгэ болон бусад үнэтэй олон бэлэгүүдые, Иудын хэрэм хотонуудые үгөөд, ууган хүбүүн Иораамаа хаан болгоо бэлэй.

4 Эсэгынгээ хан түрые бахим барихадаа, Иораам бүхы дүүнэрээ болон арадай зарим удамаршадые һэлмээр сабшан усадхаба.

5 Тэрэ гушан хоёр наһатайдаа хаан боложо, найман жэлэй туршада Иерусалимда хаан шэрээдэ һуугаа. 6 Иораам Ахаабай гэр бүлын ябадалаар, Израилиин хаашуулай замаар ябаба. Тэрэнэй һамган Ахаабай басаган байгаа. Тиимэһээ тэрэ муу жэшээ халан абажа, Эзэнэй урда нүгэлтэ хэрэгүүдые хэдэг байба. 7 Харин Эзэн Давидтай баталһан хэлсээнһээ боложо Давидай уг удамые хосороохогүйб гэһэн шиидхэбэри гаргаа һэн. Ушар юуб гэхэдэ, үеын үедэ уг удамынь хааншалан байха гэжэ Эзэн Давидые найдуулһан байгаа.

8 Иораамай хааншалха үедэ Эдоомой арад зон буһалгаалжа, Иудын эрхэ мэдэлһээ гаража, өөрын хааниие һунгаба. 9 Иораам сэрэгэй ноёдтоёо, дайшалхы морин тэргэнүүдтэеэ хамта добтолгондо орохоёо Эдоом руу нэбтэрэн оробо. Тэдэниие Эдоомой сэрэг бүһэлбэ, гэбэшье тэдэ һүниин туршада эдоомуудай сэрэгүүдэй хүреэниие бүһэлэн хүреэлөөд, тэдэниие, тэдэнэй дайшалхы тэргэнүүдэй дарганарые хюдан даража шадаа һэн. 10 Тиигээд лэ эдоомууд иудынхидһаа таһараад, мүнөө болотор мэдэлдэнь ороогүй юм. Тиихэдэ Либнаа мүн лэ Иораамай эсрэг буһалгаалба, юуб гэхэдэ, Иораам үбгэ эсэгэнэрэйнгээ Эзэн Бурханиие орхёод байгаа бшуу. 11 Тэрэ Иудын хадалиг газарнуудаар мүргэлэй газарнуудые байгуулжа, Иудын болон Иерусалимай зониие Эзэнэй урдаһаа нүгэл хэхэ харгы руу түлхибэ.

12 Элияа лүндэншэнһөө бэшэг тэрээндэ ерээ һэн. Тэрэ бэшэг соо иигэжэ бэшээтэй байгаа:

– Элинсэг хулинсаг Давид эсэгыншни Эзэн Бурханай айладхал дуулгахам. Абынгаа, Ёшапаат хаанай, хүгшэн абынгаа, Иудын Асаа хаанай, жэшээ халан абангүй, 13 Израилиин хаашуулһаа жэшээ абажа, Ахаабай болон уг удамайнь хэдэгтэл адляар, Иудын болон Иерусалимай ажаһуугшадые Эзэнһээ буруу харуулһанайш түлөө, шамһаа үлүү һайн дүү хүбүүдээ усадхаһанайш түлөө 14 Эзэн арад түмэнииеш, үхи хүүгэдыеш, һамгадыеш, зөөри хогшолыеш угаа ехээр хюдаха. 15 Тэрэ өөрыеш гэдэһэ доторой шанга үбшэндэ нэрбүүлжэ, үдэр бүри үбшэнииеш доройтуулжа байха.

16 Эзэнэй түсэблэһэнэй ёһоор, Эфиопиин арад түмэнтэй дүтэ ажаһуудаг пилишт болон арааб арадууд Иораамда ехэ уурлаба. 17 Тэдэ Иудын хан түрэ руу добтолон орожо, хаанай ордоной баялиг дээрмэшэлбэ, хүбүүдыень болон һамгадыень баряанда туун абаашаба. Гансал хаанай бага хүбүүн Иохааз үлөө бэлэй. 18 Энээнэй удаа Эзэн Иораамые эдэгэшэгүй доторой үбшэндэ нэрбүүлбэ. 19 Хоёр жэлэй туршада үбшэн үдэрһөө үдэртэ улам һүжэржэ, эсэсэй эсэстэ тэрэ угаа ехээр зобожо наһа бараа һэн. Үбгэ эсэгэнэрэйнь наһа барахада арад түмэн гашуудалай түүдэг носоодог аад, тэрэнэй наһа барахада түүдэг носообогүй.

20 Иораам гушан хоёр наһатайдаа хаан шэрээ эзэлжэ, найман жэлэй туршада Иерусалимһаа хан түрэеэ зонхилон байгаа. Тэрэнэй наһа барахада хэншье гашуудаагүй. Тэрэниие Давидай хотодо хүдөөлүүлбэшье, хаанай бунхан руу оруулаагүй бэлэй.