2Ch 24 | BxrBBL2024 | STEP | Ёһааш оройдоол долоо наһатайдаа хаан болоһон байна. Дүшэн жэлэй туршада тэрэ Иерусалимда хааншалба. Эхэнь Цибияа нэрэтэй, Бэһээр-Шээбэ хотоһоо бэлэй.

‏ 2 Chronicles 24

Ёһааш – Иудын хаан

(4 Хаан 11:21–12:21)

1 Ёһааш оройдоол долоо наһатайдаа хаан болоһон байна. Дүшэн жэлэй туршада тэрэ Иерусалимда хааншалба. Эхэнь Цибияа нэрэтэй, Бэһээр-Шээбэ хотоһоо бэлэй. 2 Ёядаа санаартанай амиды мэндэ байгаа сагта Ёһааш Эзэндэ таарамжатай хэрэгүүдые бүтээжэ ябаа. 3 Ёядаа санаартан Ёһаашда хоёр һамга шэлэн абажа, Ёһааш үхи хүүгэдтэй болоо һэн. 4 Нэгэ хэды сагай үнгэрһэнэй удаа Эзэнэй Һүмые заһабарилха гэжэ Ёһааш шиидэбэ. 5 Санаартадые болон левидүүдые тэрэ суглуулжа, иигэжэ хэлэбэ:

– Иудын хотонуудаар ябажа, Бурханайнгаа гэр заһабарилхада хэрэгтэй мүнгэ алта Израилиин бүхы арад зонһоо жэл бүри суглуулжа эхилэгты. Энэ хэрэгые удааруулангүй ябуулагты.

Теэд левидүүд яарабагүй. 6 Тиихэдэнь хаан тэдэнэй толгойлогшо Ёядаа гэгшые дуудажа асаруулаад, хэлэбэ:

– Иуда болон Иерусалимһаа мүнгэ татабари суглуулхыень юундэ левидүүдые эльгээнэгүйбши? Суглаанай майханиие заһабарилан байха хэрэгтэ мүнгэ суглуулдаг байха гээд Эзэнэй богоол Моисей болон израильшуудай суглаан шиидээ һэм шуу. 7 Нүгэлтэ муу Атаалияа болон хүбүүдынь Бурханай Һүмэ дээрмэшэлжэ, Баал бурханда мүргэхэеэ хэрэгсэлнүүдыень абаал.

8 Хаанай захиралтаар албатан нэгэ ханза дархалжа, Эзэнэй Һүмын үүдэнэй хажууда газааһаань табиба. 9 Эзэндэ алба татабари үгэдэг байха тухай Израилиин арад түмэндэ үшөө зэлүүд хооһон газараар ябахадаа Бурханай богоол Моисейн тогтооһон хуули гуримые сахин, Эзэндэ алба татабари үгэгты гэжэ Иудын болон Иерусалимай бүхы зондо зар тунхаг тараагдаба. 10 Арад зон, удамаршадынь дуратайгаар энээниие угтажа, Иерусалим руу мүнгэ асаржал-асаржал, ханзые дүүргэдэг байба. 11 Үдэр бүри левидүүд ханзые абажа, хаанай түшэмэлнүүдтэ асардаг байгаа. Алта мүнгэнэй ехээр сугларһан байхадань, хаанай бэшээшэ түшэмэл болон ахамад санаартанай этигэлтэ тушаалтан ерэжэ, мүнгэ ханзаһаа абажа тоолодог, тиигээд хооһон ханза һөөргэнь абаашажа табидаг һэн. Иигэжэ үдэр бүри хэжэ, алта мүнгэ ехээр нөөсэлбэ. 12 Тэрэ сугларһан мүнгые хаан болон Ёядаа санаартан Эзэнэй гэр заһабарилгын ажал эрхилэгшэдтэ үгэхэдэнь, тэдэ шулууша, модошо, түмэршэ дархашуулые хүлһэлжэ, Эзэнэй Һүмэ заһабарилха ажалда хүдэлүүлдэг байба. 13 Бултадаа тэдэ шууд хүдэлжэ, Бурханай гэр заһабарилжа, һайхан түхэлтэй, бата бэхи болгобо. 14 Ажалай дүүрэхэдэ, үлөөшэ мүнгэ алтые тэдэ хаанда болон Ёядаада тушааба. Тэрэ алта мүнгөөр Эзэнэй Һүмын хэрэгсэлнүүд, тахил табагууд бүтээгдэбэ. Ёядаагай амиды мэндэ сагта Эзэнэй Һүмэ соо түгэс шатаалта үргэл хододоо үргэгдэжэ байгаа. 15 Ёядаа үбгэржэ, ехэ үндэр – зуун гуша наһатай болоод, наһа бараа бэлэй. 16 Израилиин улад зоной, Бурханай ба Һүмын түлөө угаа оролдон байһандань тэрэниие хаашуултай хамта Давидай хото соо хүдөөлүүлээ һэн.

17 Теэд Ёядаагай наһа бараһанайнь удаа Иудын удамаршад ерэжэ, хааниие бараалхахадань, хаан тэдэнэй үгөөр хэрэгүүдые ябуулдаг болобо. 18 Иигэжэ улад зон үбгэ эсэгэнэрэйнгээ Эзэн Бурханиие орхижо, онгонуудта, Ашэраа бурханда мүргэжэ эхилбэ. Тэдэнэй гэм зэмэй түлөө Эзэн Иудада болон Иерусалимда уурлаба. 19 Өөртэнь эрьен ерэхыень лүндэншэдыешье Тэрэ арад түмэндэ эльгээгээ. Тэдэнь зондо ойлгуулан хэлээ, гэбэшье зон анхарбагүй. 20 Ёядаагай хүбүүн Захарияада Бурханай Һүлдэ халин оробо. Тэрэ арад зоной өөрыень харахаар добо дээрэ гараад, иигэжэ хэлэбэ:

– Эзэнэй захяа заабаринуудые юундэ таанад алхан гаранат? Өөһэдтөө муу юумэ хэнэт. Таанадай Эзэниие орхиһондол, Тэрэ таанадые орхихол!

21 Зон Захарияагай урдаһаа эсэргүүсэн нэгэдэжэ, Ёһааш хаан тэдээнтэй хамтарба. Хаанай зарлигай ёһоор, Эзэнэй Һүмын хашаа соо Захарияае зон шулуугаар шэдэн алаа һэн. 22 Ёядаа эсэгынь өөртэнь хэһэн һайн хэрэгүүдые хаан мартажа, иигэжэ хүбүүень алаа бэлэй. Захарияа амияа табижа байхадаа, «Эзэн хараг, үһөөгөө абаг лэ!» гэжэ хэлээ һэн.

23 Энээнэй удаа жэл үнгэрөөд байхада, Араамай сэрэг Иуда болон Иерусалимда добтолжо, эзэмдэн абаад, удамаршадые бултыень хюдаба, олзолһон бүхы зөөри хогшолые Дамааск руу хаандаа эльгээбэ. 24 Араамай сэрэгэй үсөөншье һаань, угаа ехэ сэрэгтэй Иудые Эзэн тэдээнэй диилэхыень зүбшөөгөө бшуу. Юуб гэхэдэ, тэдэ үбгэ эсэгэнэрэйнгээ Эзэн Бурханиие орхёо. Ёһаашые тэдэ шархатуулаа. 25 Шархануудһаа боложо, угаа үбдэжэ зобожо байхадань, албатаниинь Ёһаашай урдаһаа эсэргүүсэжэ, Ёядаа санаартанай хүбүүе алаһанайнь түлөө өөрыень хэбтэри дээрэнь алаба. Ёһаашые Давидай хото соошье һаа, харин хаашуулай булаша бунхан соо бэшэ хүдөөлүүлээ һэн. 26 Хаанай урдаһаа хэд эсэргүүсэн хэлсээб гэбэл, аммоон арадай Шимаат гэжэ нэрэтэй эхэнэрэй хүбүүн Забаад, моһааб арадай Шимриит гэжэ нэрэтэй эхэнэрэй хүбүүн Ёзабаад. 27 Ёһаашай хүбүүд тухай, Ёһааш тушаа хэлэгдэһэн олон лүндэн ба Бурханай гэр заһабарилха тушаа хаашуулай ном соо бэшэгдэнхэй. Амацияа хүбүүниинь орондонь хаан шэрээдэ залараа һэн.