‏ 2 Chronicles 25

Амацияа – Иудын хаан

(4 Хаан 14:1-20)

1Амацияа хорин таба наһатайдаа хаан боложо, хорин юһэн жэлэй туршада Иерусалимда хааншалаа. Тэрэнэй эхэ Иерусалимһаа уг гарбалтай, Ёһаддаан гэжэ нэрэтэй байгаа. 2Тэрэ Эзэндэ таарамжатай хэрэгүүдые бүтээжэ байбашье, үнэнхэ зүрхэнһөө Тэрээндэ гүйсэд шүтэн байгаагүй. 3Хаан хүсэндөө ороходоо, хаан эсэгыень алаһан түшэмэлнүүдые саазалба. 4Гэбэшье тэрэ тэдэнэй хүбүүдые саазалбагүй. Ушар юуб гэхэдэ, Моисейн Хуули соо Эзэн иимэ захяа заабари үгэнэ: «Үхибүүдэйнь хэһэн гэмтэ ябадалай түлөө эсэгэнэрынь, эсэгэнэрэйнь хэһэн гэмтэ ябадалай түлөө үхибүүдынь саазалжа болохогүй. Харин өөрын хэһэн гэмтэ ябадалайл түлөө хүн үхэлэй саазада хүртэхэ зэргэтэй».

5Амацияа Иудын болон Бэньямиинэй обогуудай хори болон дээшэ наһатай бүхы эрэшүүлые суглуулаад, уг угаарнь мянганай болон зуунай бүлэгүүд болгон хубаарилаад, дээрэнь сэрэгэй ноёдые табиба. Иигэжэ эрхим, дайшалхы дүршэлтэй, жада, бамбай баридаг гурбан зуун мянган сэрэгшэд бии гэжэ тэрэ элирүүлбэ. 6Мүн үшөө Израилиин зуун мянган сэрэгшэдые зуун талаант мүнгөөр хаан хүлһэлэн абаба. 7Харин нэгэ лүндэншэ тэрээндэ ерэжэ:

– Үндэр түрэлтэ хаан! Израилиин эдэ сэрэгшэдтэй хамта байлдаанда бү гарагты. Эзэн израильшуудта, эпрааимай хүбүүдтэ туһалхагүй. 8Харин өөрын сэрэгтэй дайнда гаража, баатарлигаар дайлалдаа һаатнай, Эзэн танда туһалжа, илалта туйлахат. Үгы һаа, Эзэнэй шиидхэбэреэр таанад диилдэхэт. Илалта туйлуулха гү, али диилдүүлхэ гэжэ Эзэн лэ мэдэдэг, – гэжэ хэлэбэ.

9– Израилиин сэрэгтэ үгэһэн зуун талаант мүнгэеэ яаха болонобиб? – гэжэ Амацияа лүндэншэһөө асууба.

– Энээнһээ ехэ мүнгэ Эзэн танда үршөөхэл, – гэбэ тэрэнь.

10Эпрааимай обогһоо ерэһэн сэрэгтэ гэртээ һөөргөө ошохыень Амацияа захирба. Гэртээ бусан ябахадаа тэдэ угаа ехээр Иудын хан түрэдэ уурлажа ошоо бэлэй. 11Амацияа зоригжон, сэрэгээ ударидан гаража, Дабһата хүндыдэ Эдоомой арба мянган сэрэг хюдаа һэн. 12Иудын сэрэг арба мянган дайсадые амидыгаар барижа, хабсагай дээрэһээ хаяхадань, тэдэ хосорбо. 13Амацияагай һөөргэнь эльгээгшэ, байлдаанда хамта абаагүй тэрэ сэрэг Иудын Самари болон Бэт-Һороон хотонуудай хоорондо зайгуултажа, гурба мянган хүниие алаба, ехэ зөөри дээрмэшэлэн олзолбо. 14Эдоомой сэрэг диилэһэнэй удаа Амацияа һөөргөө гэртээ бусаба. Эдоом арадай онгонуудые тэрэ асаржа, өөрын бурхад болгон табижа, мүргэжэ, уталгануудые урдань ууюулжа байба. 15Эзэн Амацияада уурлажа, лүндэншые эльгээбэ.

– Танай добтолходо өөрын арадые абараагүй хариин бурхадта юундэ мүргэнэбта? – гэжэ лүндэншэ Амацияада хэлэбэ.

16– Минии зүбшэгшөөр шамайе табяагүйб. Хүрөө, боли! Үгы һаа, усадхагдахаш, – гэжэ хаан харюу үгэбэ.

Лүндэншэ аниргүй болобо, гэбэшье иигэжэ хэлээ бэлэй:

– Нүгэл хээт, мүн минии зүбшэл дууланагүйт. Бурхан таниие хюдахал гэжэ шиидэнхэй.

17Иудын хаан Амацияа зүбшэгшэдтэеэ хөөрэлдөөд, Еһүүгэй аша, Ёахаазай хүбүүн болохо Израилиин хаан Ехоһаашда иимэ мэдээ эльгээбэ: «Дайлалдахаяа гара! Нюур нюураараа тулалдая!» 18Израилиин хаан Ехоһааш Иудын хаан Амацияада иимэ харюу эльгээбэ:

– Хэзээ нэгэтэ Ливаанда ургажа байгааша үүргэнэ Ливаандахи хуша модондо: «Хүбүүнэйм һамган болгон басагаяа үгыш» – гэжэ хэлээ бэлэй. Теэд Ливаанай ан арьяатан тэрэнэй хажуугаар үнгэржэ ябахадаа, тэрэ үүргэные хуха нуга дэбһэн гараа. 19Эдоомые диилэһэн илалта шинии толгойе эрьюулээ. Сэдьхэлдээ гансал энэ илалтаараа омогорхо. Юундэ өөртөө гай тодхор бэдэрбэш? Магад, өөрөө хүлөө алдажа, Иудатай хамта унажа болохош!

20Амацияа тэрэнэй хэлэһэн энэ үгые дуулабагүй, ушарынь хэлэбэл, Эдоомой бурхадта мүргэжэ эхилһэнэйнь түлөө тэдэниие Ехоһаашаар диилүүлхэ гэжэ Бурхан шиидэһэн байгаа бшуу. 21Иигэжэ Израилиин хаан Ехоһааш ба Иудын хаан Амацияа Иудын Бэт-Шээмэштэ нюур нюураараа уулзажа, дайлалдаба. 22Израилиин сэрэг Иудын сэрэгые бута сохибо. Амиды үлөөшэнь гэр руугаа тэрьедэн гүйбэ. 23Израилиин хаан Ехоһааш Бэт-Шээмэш шадархи тулалдаанда Иохаазай аша, Ёһаашай хүбүүн болохо Иудын хаан Амацияае баряанда абажа, Иерусалим руу абаашаба. Тэндэ тэрэ Иерусалимай хэрэм ханануудые Эпрааимай хаалта үүдэнһээ Булангай хаалта үүдэн хүрэтэр дүрбэн зуун тохой ута ханые сүмэ сохижо, хотодо оробо. 24Тиигээд тэрэ Бурханай гэр соо байгааша, Обээд-Эдоомой үри һадаһадай харууһалагша алта, мүнгэн хэрэгсэлнүүдые, хаанай ордоной һангуудта байһан алта мүнгэ, үнэтэй сэнтэй бүхы хэрэгсэлнүүдые тоножо, улад зониие баряанда абаад, Самари руу бусаа һэн.

Амацияагай үхэл

(4 Хаан 14:17-20)

25Ёахаазай хүбүүн болохо Израилиин хаан Ехоһаашай наһа бараһанай удаа үшөө арбан табан жэл үлүү Иудын хаан Ёһаашай хүбүүн Амацияа ажаһууһан гээшэ. 26Амацияагай бусад хэрэг ябуулганууд тухай «Иудын болон Израилиин хаашуулай ном» соо бэшээтэй юм. 27Амацияагай Эзэнһээ буруу хараһан сагһаань эхилжэ, тэрээндэ эсэргүү нюуса хэлсээ Иерусалимда эмхидхэгдэбэ. Теэд Амацияа Лахииш руу тэрьедэн хороо һэн. Гэбэшье нүгөөдэ зон Лахииш руу ошожо, тэрэниие олоод, алаба. 28Тэрэнэй бэеые морид дээрэ тээгээд, Иерусалимда асаржа, үбгэ эсэгэнэртэйнь хамта Иудын хотодо хүдөөлүүлээ бэлэй.