2Ch 26 | BxrBBL2024 | STEP | Иудын бүхы улад зон Амацияагай хүбүүн Уззияае хаан болгон табиба.

‏ 2 Chronicles 26

Уззияа – Иудын хаан

(4 Хаан 14:21-22; 15:1-7)

1 Иудын бүхы улад зон Амацияагай хүбүүн Уззияае ^{▼▼ Уззияа – олон газарта энэ нэрэ «Азаарияа» гэжэ ондоо маягаар үгтэнэ} хаан болгон табиба. 2 Элинсэг хулинсагайнгаа булаша соо эсэгынгээ хүдөөлүүлэгдэһэнэй удаа тэрэ Элоот гэжэ хотые заһабарилан бодхоогоод, һөөргэнь Иудын мэдэлдэ оруулба. 3 Уззияа арбан зургаа наһатайдаа хаан боложо, табин хоёр жэлэй туршада Иерусалимда хан шэрээдэ һууба. Тэрэнэй эхэ Иерусалимһаа уг гарбалтай Ехоолия гэжэ нэрэтэй байгаа. 4 Тэрэ Амацияа эсэгэдээл адляар Эзэндэ таарамжатай зүб хэрэгүүдые эрхилдэг байгаа. 5 Захарияа лүндэншэнэй заабаряар тэрэ Бурханиие хүндэлдэг һэн. Бурханшье тэрээндэ амжалта туйлуулдаг байгаа. 6 Уззияа хаан пилишт арадай сэрэгтэй дайлалдажа, Гаат, Ябнээ, Ашдоодой хэрэм ханануудые бута сохибо. Тиигээд тэрэ Ашдоодой хажуугаар болон Пилиштын бусад газарнуудта хото һууринуудые баряа бэлэй. 7 Пилишт арадые, Гуур-Бааһалда ажаһуудаг арааб, мүн тиихэдэ мэүүншүүдые диилэхэдэнь Бурхан тэрээндэ туһалаа. 8 Аммоон арад зон Уззияада ясаг түлэдэг һэн. Уззияагай угаа хүсэ шадалтай болоходонь, нэрэнь Египедэй хилэ хүрэтэр мэдээжэ болоо бэлэй. 9 Иерусалимда Булангай, Нюруугай үүдэнүүд дээгүүр болон углуу тохойгоор самхагуудые тэрэ барижа, хотые бүхэлбэ. 10 Зэлүүд хооһон газарташье самхагуудые тэрэ баряа, олон худагуудые малтаа. Тэрэ нюруу газараар бэлшээшэ олон малтай, газар элдүүрилхэ ажалда дуратай, тиимэһээ хада уулааршье сэсэрлиг ургуулааша, газар элдүүрилэгшэ олон албатантай бэлэй. 11 Дүй дүршэлтэй сэрэгшье Уззияада байгаа. Еиһээл бэшээшэ болон хинадаг дарга Маашэяа гэгшэд хаанай түшэмэл Ханаанияагай хүтэлбэри доро сэрэгэй тоо бүридхэл барижа байгаа. 12 – 13 Уг удамуудай хоёр мянга зургаан зуун удамаршын хүтэлбэри гурбан зуун долоо мянган табан зуун эрэлхэг сэрэгшэ дайсантай дайлалдагша бэлэй. 14 Уззияагай захиралтаар бүхы сэрэгтэ бамбай, жада, дуулга, хуяг, һурша ном, шулуу шэдэдэг түхеэрэлгэнүүд олоор бүтээгдэбэ. 15 Иерусалимай дархашуул годли, томо шулуу шэдэдэг оньһон түхеэрэлгэнүүдые бүтээжэ, самхагууд, углуунуудаар табиба. Хотонуудые эрхимээр аршалһан, хүсэ шадалтай болоһон Уззияа тушаа һураг суу али холуур тараа бэлэй.

Уззияагай доройтолго ба хэһээлтэ

(4 Хаан 15:5-7)

16 Уззияа хүсэ шадалтай болоходоо, бардамлажа эхилбэ, энэнь тэрэниие хосоруулаа. Нэгэ үдэр тэрэ Эзэнэй Һүмэ руу орожо, үргэлэй шэрээ дээрэ уталга ууюулба. Иигэжэ тэрэ нүгэл хээ һэн. 17 Эзэндэ үнэн сэхээр алба хэдэг наян санаартантай хамта тэрээн руу Азаарияа санаартан ерэжэ, 18 Уззияа хаанда иигэжэ хэлэбэ:

– Үндэр түрэлтэ хаан! Иигэжэ болохогүй. Эзэндэ уталга ууюулха гээшэ Аһарооной үри санаартадай хэрэг. Эндэһээ гарагты! Буруу юумэ хээт, Эзэн Бурханай урда алдар солотой байхагүйт.

19 Уталгын ууюур баряад байгша Уззияа угаа уурлаба. Санаартадай хараһаар байтар, Эзэнэй Һүмэ соо, үргэлэй шэрээгэй хажууда зогсоод байгааша Уззияагай нюур дээрэ һэлхэ бузар үбшэнэй тэмдэгүүд гаража эхилбэ. 20 Ахамад санаарта Азаарияагай болон бусад санаартадай харахада, духа дээрэнь һэлхэ бузар үбшэн харагдаад байба. Тэндэһээ гарахыень тэдэ баадхаба, Уззияа өөрөөшье гарахаяа шамдаба. 21 Иигэжэ Уззияа хаан наһа баратараа һэлхэ бузар үбшэндэ даруулаад, амяараа гэртэ ажаһуугаа. Эзэнэй Һүмэ руу орохо эрхэгүй һэн. Ётаам хүбүүниинь хаанай ордон соо ажаһуужа, улас түрөө зонхилон байгаа.

22 Амооцой хүбүүн Исай лүндэншэн Уззияа хаанай бусад хэрэг ябуулганууд тухай ном соогоо бэшэһэн юм. 23 Уззияагай наһа барахадань, тэрэниие үбгэ эсэгэнэртэйнь зэргэлүүлжэ, хаашуулай хүүрнүүд соо хүдөө тэрэниие хүдөөлүүлээ һэн. Юуб гэбэл, тэрээн тушаа «һэлхэ бузар үбшэнтэй» гэжэ хэлэдэг байгаа бшуу. Тэрэнэй орондо хаан шэрээень Ётаам хүбүүниинь эзэлбэ.