‏ 2 Chronicles 28

Ахааз – Иудын хаан

(4 Хаан 16:1-20)

1Хаан шэрээдэ залархадаа Ахааз хори наһатай байгаа. Иерусалимда тэрэ арбан зургаан жэлэй туршада хааншалба. Элинсэг эсэгэнь болохо Давидтал адляар тэрэ Эзэндэ таатай хэрэгүүдые хэдэггүй һэн. 2Тэрэ Израилиин хаашуулай жэшээ даган ябаа. Баалай шудхамал хүрэгүүдые тэрэ бүтээдэг һэн. 3Һинноом хүндыдэ Ахааз уталгануудые ууюулдаг, Израилиин арадай хараһаар байтар Эзэнэй үлдэһэн арадуудай жэгшүүритэй муухай үйлэ хэрэгүүдые һажаалдан, хүбүүдээ галда шатаан бурхадта үргэдэг байба. 4Тэрэ нютагай обоонууд дээрэ, гүбээнүүд дээрэ, ямар нэгэ набшаһата модон доро тахилай үхэр мал шатаадаг, уталгануудые ууюулдаг байба. 5Араамай сэрэг тэрээндэ добтолон диилэжэ, олон зонииень баряанда туужа, Дамааск руу абаашаба. Мүн Израилиин хаанда тэрэ диилдэжэ, һамна бута сохюулба. 6Израилиин Рэмаалияагай хүбүүн Пээкаа нэгэ үдэр Иудын зуун хори мянган сэрэгшые бута сохёо бэлэй. Юуб гэбэл, тэдэ үбгэ эсэгэнэрэйнгээ Эзэн Бурханиие орхёо бшуу. 7Эпрааимай обогой баатар, Израилиин сэрэгшэ Зихрии Ахааз хаанай Маашэяа хүбүүе, хаанай ордоной захирагша Азрикаамые, хаанай удаа хоёрдохи хүн болохо Элканаае алаа. 8Израилиин сэрэг аха дүү болохо Иудын хоёр зуу мянган эхэнэр, хүүгэдые олзолон барижа, мүн угаа ехэ эд зөөри дээрмэшэлэн абажа, Самари руу эльгээгээ.

Иудын зоной баряанhаа бусалга

9Тэрэ Самарида Одээд гэжэ Эзэнэй лүндэншэ байдаг һэн. Тэрэ Самари руу бусажа байгааша Израилиин сэрэгэй урда гаража, иигэжэ хэлэбэ:

– Үбгэ эсэгэнэрэйтнай Эзэн Бурхан Иудын улад зондо уурлажа, таанадта тэдэниие диилүүлбэ. Теэд таанадай угаа хэрзэгы муухайгаар тэдэниие хюдаһан тушаа Тэрэ дуулаа. 10Мүнөө Иудын болон Иерусалимай улад зониие өөрын богоол болгохо һанаатай байнат. Иихэдээ таанад Эзэн Бурханайнгаа урда нүгэл хэнэбди гэжэ мэдэнэгүй аалта? 11Мүнөө намайе дуулагты! Аха дүү арадайнгаа дундаһаа баряанда гэжэ абааша тэдэ зоноо һөөргэнь эльгээгты! Үгы һаатнай, Эзэн таанадта уур хилэнсэгээ хүргэхэ.

12Эпрааимай обогой, Израилиин хан түрын дүрбэн удамаршад – Ёханаанай хүбүүн Азаарияа, Мэшиллэмоодой хүбүүн Бэрэхияа, Шаллуумай хүбүүн Хэзэкияа, Хадлайгай хүбүүн Амасаа дайн дажарһаа бусажа ябаашадай урдаһаа гаража, 13иигэжэ хэлэбэ:

– Баряанда абаһан зониие иишэнь бү оруулагты. Эзэнэй урда нүгэлтэй болохобди. Манай гэм зэмэ ехэ, Эзэн Израильда ехэ уурлаад байна. Нүгэл дээрээ нүгэл, гэм дээрээ гэм нэмээхэ гээ гүт?!

14Тиигэжэ сэрэгшэд баряанда абаһан зониие, олзоёо удамаршадай болон бүхы улад зоной урда табин орхибо. 15Тэдэ нэрлээшэ дүрбэн удамарша нюсэгэн зониие олзын хубсаһа хунарһаа, гуталһаа хубсалуулба, гуталтай болгобо. Тиигээд тэдэниие эдеэлүүлээд, ундалуулаад, шархануудтань оливын тоһо түрхеэд, бүхы муудаһан һуларһан зонииень элжэгэнүүд дээрэ һуулгаад, Иудын хан түрэ руу һөөргэнь, пальмануудай хото Ерихоон руу эльгээбэ. Удаань тэдэ Самари руу бусаа бэлэй.

Ахаазай засаглалай эсэс

(4 Хаан 16:7-20)

16– 17Эдоомуудай Иудын хан түрэ руу дахин дайлажа, олон зониие хюдажа, олониие баряанда абахадань, энэ үедэ Ахааз хаан Ассириин хаашуулда туһа эрин хандаба. 18Энэ үедэ пилиштүүд Иудын нюруу газарай болон урда зүгэй хотонуудаар таран ябажа, Бэт-Шээмэш, Аялоон, Гэдэроот, Сохоо, Тимнаа, Гимзоо хотонуудые һууринуудтайнь хамта эзэлжэ, һуурижаба. 19Иудын хаан Ахаазай улад зоноо буруу тээшэнь хүтэлжэ, Эзэнэй урда ехэ нүгэл хэһэндэнь, тэрээнэй түлөө Эзэн бүхыдэнь Иудын хан түрэдэ гай гасалан тохобо. 20Ассириин хаан Тиглаат-Пилэсээр ерээшье хадаа тэрээндэ туһалхын орондо түбэг ушаруулжа байба. 21Юуб гэхэдэ, Ахааз Эзэнэй Һүмэ сооһоо, өөрын ордонһоо болон удамаршадһаа алта мүнгэ абажа, өөрын аша туһада хэрэглэхын орондо Ассириин хаанда үгөө бэлэй.

22Гай гасаланта үе сагай тохёолдоодшье байхада Ахааз хаан Эзэнэй урда гэм зэмэ хэһээр зандаа байба. 23Тэрэ иигэжэ хэлэгшэ һэн:

– Дамааскын бурхад Араамай хаашуулда туһалаа, минии тэдээндэ үргэл үргөө һаа, тэдэ намдашье туһалха.

Иигэжэ тэрэ өөрыень дайлажа байгааша Дамааскын бурхадта үргэл үргэдэг байба. Гэбэшье энэнь өөртэнь болон Израилиин бүхы улад зондо гай тодхор ушаруулба. 24Ахааз Бурханай гэрэй амһарта хэрэгсэлнүүдые суглуулжа, бута сохибо. Тиигээд тэрэ Эзэнэй гэрэй үүдэнүүдые хаажа, Иерусалимай бүхы газарнуудаар үргэлэй шэрээнүүдые байгуулба. 25Иудын хото бүхэндэ хариин бурхадта үргэл үргэхэ газарнуудые тэрэ зохёожо, үбгэ эсэгэнэрэйнгээ Эзэн Бурханай уур хилэн өөр тээшээ татаба.

26Ахаазай хэһэн бусад хэрэг ябуулганууд тухай эхинһээ эсэс хүрэтэр Иудын болон Израилиин хаашуулай ном соо бэшээтэй. 27Ахааз хаан наһа баража, Иерусалимда, гэбэшье Израилиин хаашуулай булаша бунханһаа гадуур хүдөөлүүлэгдэбэ. Хэзэкияа хүбүүниинь орондонь хаан шэрээдэ заларба.