‏ 2 Chronicles 29

Хэзэкияа – Иудын хаан

(4 Хаан 18:1-3)

1Хэзэкияа хорин таба наһатайдаа хаан боложо, Иерусалимда хорин юһэн жэлэй туршада хааншалаа. Тэрэнэй эхэнь Захарияагай басаган Абияа бэлэй. 2Үбгэ эсэгэ Давидтал адляар тэрэ Эзэндэ таатай хэрэгүүдые эрхилдэг һэн.

Хэзэкияа Һүмые сэбэрлэнэ

3Хааншалжа эхилһээр түрүүшын һарадаа тэрэ Эзэнэй Һүмын үүдэнүүдые нээжэ, заһабарилба. 4Тиигээд тэрэ санаартадые болон левидүүдые ерэхыень захиржа, Һүмын зүүн талада суглуулаад, 5иигэжэ айладхаба:

– Левидүүд, намайе шагныта! Мүнөө өөһэдөө бузаргүй арюун боложо, үбгэ эсэгэнэрэйнгээ Эзэн Бурханай Һүмые арюудхагты! Һүмэһөө бузартай юумэ гаргажа хаягты. 6Манай үбгэ эсэгэнэр муу юумэ үйлэдэн, Эзэн Бурхандамнай таагүй хэрэгүүдые хэдэг байгаа. Тэдэ Бурханаа орхижо, Эзэнэй Һүмэһөө буруу хаража, 7үүдыень хаагаад, дэнгүүдыень унтараагаад, уталгануудые ууюулангүй, Израилиин Бурханай Һүмэ соо түгэс шатаалта үргэлнүүдые үргэнгүй байба. 8Эзэн Иуда болон Иерусалимда угаа ехэ уурлажа, тэдэниие усадхаха талаар хэрэг ябуулхадань, бүхы зон һүрдэн айжа, сошожо байгаа бэлэй. Энээниие таанад өөһэдөө хараат. 9Иигэжэ манай үбгэ эсэгэнэр байлдаануудта алуулаа, үхибүүднай, һамгаднай баряанда байһаар. 10Мүнөө би Израилиин Эзэн Бурхантай хэлсээ баталха гэжэ шиидээб, тиихэдэм Тэрэ бидэндэ уурлахаяа болихо аалам. 11Хүбүүдни! Сагаа дэмы гээжэ бү байгты, юуб гэхэдэ, Өөрэйнь урда зогсожо, алба хэжэ, уталгануудые ууюулхыетнай, албалхыетнай Эзэн Таанадые шэлээ бшуу.

12Эдэ левидүүд үгыень дуулажа, үйлэ хэрэг ябуулхаар бэлэн байһанаа гэршэлбэ: Кэһаадай уг унгиин Амасайн хүбүүн Махаат, Азаарияагай хүбүүн Ёһээл; Мэрариин уг унгиин Авдиигай хүбүүн Кииш, Еһаллэлээлэй хүбүүн Азаарияа; Гэршооной уг унгиин Зиммаа гэгшын хүбүүн Ёһаа, Ёһаагай хүбүүн Ээдэн; 13Элицапаанай уг унгиин Шимрии ба Еиһээл; Асаапай уг унгиин Захарияа ба Маттаанияа; 14Һэмаанай уг унгиин Ехиһээл ба Шимэй; Едүтүүнэй уг унгиин Шэмаяа ба Үззиһээл. 15Тэдэ бусад левидүүдые хамта суглуулжа, бэе арюудхалгын ёһолол хэбэ. Тиигээд тэдэ хаанай захиралта дүүргэн, Эзэнэй һургаалай ёһоор Эзэнэй Һүмэ арюудхахаяа ошобо. 16Санаартад Эзэнэй Һүмэ руу сэбэрлэхэеэ оробо. Эзэнэй Һүмэ соо ологшо бузартай бүхы юумэ тэдэ Эзэнэй Һүмын хашаа руу гаргаба. Левидүүд энээнииень Кидрооной хүнды руу абаашахаяа абаа һэн.

17Арюудхалгын ажалые тэдэ түрүүшын һарын түрүүшын үдэр ябуулжа эхилбэ. Наймадахи үдэрынь тэдэ Эзэнэй үүдэнэй хажуудахи таһалга руу оробо. Иигэжэ тэдэ Эзэнэй Һүмые найман үдэр соо арюудхажа, түрүүшын һарын арбан зургаадахи үдэр ажалаа түгэсхэбэ. 18Хэзэкияа хаанда тэдэ ерэжэ иигэжэ дуулгаба:

– Бидэ Эзэнэй Һүмэ арюудхаабди. Түгэс шатаалта үргэлэй шэрээ амһарта хэрэгсэлнүүдтэйнь, нангин хилээмэнэй шэрээ хэрэгсэлнүүдтэйнь хамта. 19Ахааз хаанай хааншалгынгаа үедэ, Эзэндэ шүтэнгүй байхадаа хаяаша амһарта хэрэгсэлнүүдые бидэ суглуулжа арюудхаабди. Тэдэ мүнөө Эзэнэй үргэлэй шэрээгэй урда байна.

20Тэрэ дары Хэзэкияа хаан хотын удамаршадые суглуулжа, Эзэнэй Һүмэ руу ошобо. 21Захиралтын ёһоор, хаан угай, Иудын хан түрын нүгэл сагааруулгын ба нангин үргөө сэбэрлэхын тула долоон буруун, долоон хуса, долоон хурьган, долоон тэхэ асарагдаба. Эзэнэй үргэлэй шэрээ дээрэ түгэс шатаалта үргэл үргэхэ тухай хаан Аһарооной үри һадаһадта, санаартадта, захирба. 22Буруудые, удаань хусануудые, хурьгадые санаартад үүсэлжэ, шуһыень үргэлэй шэрээдэ түрхибэ. 23Тиигээд тэхэнүүдые хаанай болон сугларагша зоной урда тэдэ асаржа, хаан ба улад зон дээрэнь гарнуудаа табиба. 24Санаартад тэдэ тэхэнүүдые үүсэлжэ, бүхы Израилиин нүгэл арюудхахын тула шуһаарнь үргэлэй шэрээ сэбэрлэбэ. Юуб гэхэдэ, бүхы Израилиин түлөө хаан түгэс шатаалта үргэл болон нүгэл сагааруулгын үргэл хэхые захираа һэн шуу. 25Эзэнэй Давидта дамжуулһан һургаал заабариие хаанай лүндэншэ Гаад ба Натаан лүндэншэ һануулжа, хаан Эзэнэй Һүмэ соо ятага, хэнгэрэг гартаа баринхай левидүүдые табиба. 26Давидай хүгжэмтэ зэбсэгүүдые баринхай левидүүд болон санаартад үхэр бүреэнүүдтэеэ зогсобо. 27Хэзэкияа түгэс шатаалта үргэл үргэхэ тушаа захиржа, энэ ёһололой эхилхэдэнь, Эзэндэ магтаал үргэһэн дуу хүгжэм үхэр бүреэгэй болон Израилиин хаан Давидай хүгжэмтэ зэбсэгүүдэй дууряалга доро эхилбэ. 28Түгэс шатаалта үргэлэй дууһан үргэгдэтэр сугларагша бүхы зон мүргэн зальбаржа, дуушад дуулажа, үхэр бүреэнүүд дуугаралдажа байгаа бэлэй. 29Энэ ёһололой дүүрэхэдэнь, хаан болон бүхы байгааша зон доро дохин Эзэндэ мүргэбэ. 30Давидай болон Асаап лүндэншын бэшэһэн дуунуудые дуулажа, Эзэндэ магтаал үргэхыень Хэзэкияа хаан болон түшэмэлнүүд левидүүдтэ захирба. Тэдэнь баяртайгаар магтаал үргэжэ, һүгэдэн, доро дохин мүргэн байгаа бэлэй. 31Хэзэкияа зондо иигэжэ хэлэбэ:

– Таанад мүнөө Эзэндэ өөрыгөө зорюулаат. Үргэлнүүдые үргэжэ, баяр баясхалангай бэлэгүүдые Эзэнэй Һүмэ руу асаран байгты.

Зон үргэлнүүдые, баяр баясхалангай бэлэгүүдые асаржа эхилбэ. Һүзэг ехэтэйшүүл түгэс шатаалта үргэлнүүдыешье асараа һэн. 32Эзэндэ зорюулһан түгэс шатаалта үргэлэй тоо гэбэл, далан үхэр, зуун хуса, хоёр зуун хурьган бэлэй. 33Эзэнэй үреэлдэ хүртэхын тула үргэхэ үргэлэй бусад тоо хадаа зургаан зуун үхэр, гурбан мянган хонин бэлэй. 34Бэеэ арюудхалгын ёһолол гараһан санаартад үсөөн байжа, түгэс шатаалта үргэлэй малые бултыень тэдэнэй гаргажа байха хүсэгүй һэн тула тэдээндэ левидүүд туһалаа бэлэй. Юуб гэхэдэ, санаартадта орходоо левидүүд бэеэ арюудхалгын ёһололые ехэ наринаар сахиһан байгаа. Тиигээд тэдэ бусад санаартадай бэеэ арюудхатар, хэрэгэй дүүрэтэр түгэс шатаалта үргэл үргэлгэдэ туһалаа һэн. 35Тарган малаар түгэс шатаалта үргэлнүүд, жэмэсэй архяар үргэлнүүд мүн лэ угаа олон байгаа.

Иигэжэ Эзэнэй Һүмэ соо мүргэлэй ёһолол дахин һэргээгдээ һэн. 36Иимэ түргөөр арад түмэнөө Эзэнэй анхаржа, баяр баясхалан зохёоһондонь Хэзэкияа болон бүхы зон баясан байгаа бэлэй.