‏ 2 Chronicles 31

1Эдэ бүгэдын удаа тэндэ байгааша Израилиин бүхы зон Иудын хотонууд руу ошожо, хариин бурхадай хүрэгүүдые бута сохибо, Ашэраагай модон сэргэнүүдые таһар сабшан унагааба, бүхы Иудын газараар болон Бэньямиинэй, Эпрааимай, Мэнашшээгэй обогуудай харьяата газарнуудаар үргэлэй обоонуудые болон үргэлэй шэрээнүүдые үгы болоторынь һандаргааба. Тиигээд хүн бүхэн гэртээ бусаа һэн. 2Хэзэкияа санаартадые болон левидүүдые уялгануудайнь ёһоор хубаарилжа, түгэс шатаалта болон амгалан байдалай үргэлнүүдые үргэхэ ажалда, Эзэндэ магтаал үргэхэ, алдар соло дуудаха хэрэгтэ, мүн Эзэнэй Һүмын үүдэнүүдэй хажууда табиба. 3Хаан өөрын зөөриһөө түгэс шатаалта үргэлдэ гэжэ хуби тодорхойлон үгэбэ. Эзэнэй хуули ёһо соо бэшэгдэһэнэй ёһоор, үглөөнэй болон үдэшын, амаралтын үдэрэй, Шэнэ һарын, һайндэрнүүдэй түгэс шатаалта үргэлнүүдтэ гэжэ тэрэ хуби үгөө һэн. 4Санаартадай болон левидүүдэй Эзэндэ албаяа һаадгүй хэжэ байхын тула тэдээндэ тэдхэмжэ үгэжэ байхыень Иерусалимай улад зондо тэрэ захирба. 5Энэ захиралтын тунхаглагдаһанай удаа Израилиин улад зон бүхы юумэнэй арбанай нэгэ хубиие – орооһо таряанай, үзэмэй дараһан архиин, оливын тоһоной, зүгын балай, элдэб ургасын угаа ехэ дээжэ асарба. 6Иудын хотонуудаар ажаһуугааша иудын болон израилиин зон эбэртэ бодо болон жэжэ малай арбанай нэгэ хубиие, Эзэн Бурхандаа зорюулһан бэлэгүүдые олоор асаржа, обоо-хүбөө ябталан табиба. 7Гурбадахи һарада тэдэ бэлэгүүдые асаржа эхилээ һэн, долоодохи һарада асаржа дүүргэбэ. 8Хэзэкияа түшэмэлнүүдтэеэ хамта ерэжэ, энэ обоо-хүбөөе хаража, Эзэндэ болон Тэрэнэй арад Израильда баяр баясхалан хүргэбэ. 9Хэзэкияа санаартадһаа болон левидүүдһээ энэ обоо-хүбөө тушаа һанамжыень асууба. 10Ахамад санаартан, Цадоогой үри һадаһан Азаарияа тэрээндэ иигэжэ хэлэбэ:

– Эзэнэй Һүмэ руу улад зоной үргэл хэжэ эхилһэн сагһаа хойшо бидэ садатараа эдеэлжэ эхилээбди, үшөө олон эдеэ хоол үлэнэ. Эзэнэй арадаа үреэһэнэй ашаар лэ эдэ бүгэдые бидэ хараа гээшэлди.

11Хэзэкияа хаанай захиралтаар Эзэнэй Һүмэ соо зөөри нөөсэлхэ таһалганууд бэлдэгдэбэ. 12Тиишээ бүхы бэлэгүүдые, арбанай нэгэ хубиин үргэлнүүдые наринаар тоолон абаашаба. Энэ зөөриин дарга Ханаанияа левит һэн, Шимэй дүүнь хоёрдохи дарга болобо. 13Хэзэкияа хаанай болон ахамад санаартан Азаарияа гэгшын захиралтаар Ханаанияа ба Шимэй дүүгэйнь туһамаршад гэбэл, Ехиһээл, Азаазияа, Наахат, Асаһээл, Еримоот, Ёзабаад, Элиээл, Исмаахия, Махаат ба Бэнайяа гэгшэд болоо һэн. 14Имнаагай хүбүүн Корээ левит Эзэнэй Һүмын зүүн зүгэй үүдэнүүдэй харуулшан бэлэй. Тэрэ Эзэндэ үргэгдэһэн зүйлнүүдэй эрхилэгшэ, хэрэгтэй, шухала юумэ хубаажа үгэдэг бэлэй. 15– 16– 17– 18Санаартадай ажаһуугша бусад хотонуудаар уялгануудайнь ёһоор левидүүдтэ эдеэ хоол, зөөри хубаарилхада, тэрээндэ Ээдэн, Миньямиин, Ешууһа, Шэмаяа, Амарияа, Шэханьяа гэгшэд туһалдаг байгаа. Левидүүдтэ уг удамаарнь бэшэ, тушаалайнь, ажалайнь ёһоор, Эзэнэй Һүмэдэ үдэр бүри алба хэгшэ эдэнэртэ – гурба наһатайһаа эхилээд дээшээ зондо; данса руу бэшэгдэһэн санаартадта уг удамаарнь, хоринһоо дээшэ наһатай левидүүдтэ уялгануудайнь ёһоор, бүлэгүүдыень хараада абан; данса соо бэшэгдэһэн зондо бага хүүгэдтэйнь, һамгадтайнь хамта, бултандань эдеэ хоол, зөөри үгтэдэг һэн. Юуб гэбэл, эдэнэр нангин ажалда өөһэдыгөө дууһан зорюулаа шуу. 19Хото бүхэндэ тусхай зон табигдажа, хото соо, мүн хажуугаарнь оршодог һууринуудта ажаһуугша Аһарооной угай эрэ зондо, мүн левидүүдэй данса соо бэшүүлэгдэнхэй зондо газар хубаарилжа үгэдэг байгаа.

20Бүхы Иудын газар дайдаар Хэзэкияа зүб хэрэгүүдые эрхилээ, Эзэн Бурхандаа таатай юумэ хээ. 21Бурханай Һүмын, мүн хуули ёһо, захяа заабаринуудые сахиха хэрэгүүдтэ тэрэ өөрын Бурхан тушаа һанан, үнэнхэ зүрхэнһөө оролдоо. Тиимэһээ тэрэ амжалта туйлаа.
Copyright information for BxrBBL2024