2Ch 33 | BxrBBL2024 | STEP | Мэнашшээ арбан хоёртойдоо хаан болоод, Иерусалимда табин табан жэл соо хааншалба.

‏ 2 Chronicles 33

Мэнашшээ – Иудын хаан

(4 Хаан 21:1-10, 17-18)

1 Мэнашшээ арбан хоёртойдоо хаан болоод, Иерусалимда табин табан жэл соо хааншалба. 2 Тэрэ Эзэндэ таарамжагүй хэрэгүүдые хэбэ. Эзэнэй израильшуудта үгэһэн газар дээрэхи уул арадууд мэтээр тэрэ жэгшүүритэй муухай ябадалнуудые үйлэдэбэ. 3 Хэзэкияа эсэгынгээ һандаргаһан мүргэлэй обоонуудые дахин һэргээн бодхообо, Баалда зорюулһан үргэлэй шэрээнүүдые барюулба, Ашэраагай модон сэргэнүүдые бүтээлгэбэ, тэнгэриин наран, һара болон одо мүшэдтэ мүргэдэг, тэдээндэ алба хэдэг болобо. 4 «Иерусалимда хэтэ мүнхэдөө Минии нэрэ алдар оршохо» гэжэ Эзэнэй айладхаһан Һүмэ соо тэрэ үргэлэй шэрээнүүдые байгуулба. 5 Мэнашшээ Эзэнэй һүмын хоёр хашаа соо тэнгэриин наран, һара болон одо мүшэдтэ үргэл хэхэ үргэлэй шэрээнүүдые барюулба. 6 Бэн-Һинноомой хүндыдэ тэрэ хүбүүдээ галда шатаан үргэһэн байна. Мэдэлшэн, үзэлшэн, эльбэ жэльбэшэн болон тэрэ байгаа, үхэһэн зониие дуудадаг, эльбэ жэльбэ харуулдаг зонтой зүбшэдэг һэн. Эзэндэ таагүй юумэ олоор тэрэ хэжэ, Эзэнэй уур сухал хүдэлгэбэ. 7 – 8 «Минии захин заабарилһан, Моисейн дамжуулһан бүхы хуули ёһо, гурим, тогтоолнуудые тэдэнэй сахижа байбал, үбгэ эсэгэнэртэнь үгэһэн энэ орон нютагһаа холуур хариин газарта зайгуултажа байхыень израильшуудые дахин хэзээдэшье баалан хашахагүйб. Израилиин уг изагуурай эзэмшэдэг бүхы хото тосхонуудай дундаһаа шэлэн абаһан энэ Иерусалим хотодо, энэ Һүмэ соо Минии нэрэ алдар хэтэ мүнхэдөө алдаршан байха» гэжэ Эзэнэй Давидта, Соломоон хүбүүндэнь айладхаһан Бурханай һүмэ соо Мэнашшээ һиилэмэл хэмэл дүрсэ табиба. 9 Мэнашшээ Иудын болон Иерусалимай улад зониие харгы замһаань хадууруулжа, тэдэнэр израильшуудта газарыень үгэхэ гэжэ Эзэнэй хюдаһан арадуудһаа бүри дороор харатай хэрэгүүдые үйлэдэдэг болоо. 10 Эзэнэй Мэнашшээ болон арад түмэндэнь хандан ойлгуулаашье һаа, тэдэ үгыень дуулабагүй. 11 Эзэн Ассириин сэрэг тэдээн руу асаруулжа, тэдэ Мэнашшээ гэгшые хүлин уяжа, гэнжэлжэ, Вавилоон руу абаашаба. 12 Мэнашшээ зобохын ехээр зобожо, үбгэ эсэгэнэрэйнгээ Бурханай урда угаа даруу номхон боложо, Эзэн Бурхандаа эрьежэ, туһа эрижэ эхилбэ. 13 Мэнашшээ Тэрээндэ зальбаран мүргэжэ, Бурхан тэрэниие анхаржа, зальбаралынь дуулажа, Иерусалим руу, хаан шэрээдэнь бусааба. Иигэжэ Мэнашшээ Эзэн хадаа Бурхан мүн гэжэ ойлгобо. 14 Энээнэй удаа тэрэ Давидай хотын баруун талаһаа эхилээд, гадар хэрэм хана бодхоон, Гихооной хажуудахи хүндыһөө Загаһадай Үүдэнүүд хүрэтэр, Оопэлые тойруулан, угаа үндэрөөр бариба. Иудын бүхэлэгдэһэн бүхы хотонуудаар тэрэ сэрэгэй ноёдые ударидахыень табиба. 15 Хариин бурхадые болон онгониие Эзэнэй Һүмэ сооһоо тэрэ гаргаба, Эзэнэй Һүмын оршодог хада дээрэ болон Иерусалим соо түхеэрэгдэнхэй үргэлэй шэрээнүүдые хото соо тэрэ үгы болгобо. 16 Мэнашшээ Эзэнэй үргэлэй шэрээ һэргээн бодхоожо, амгалан байдалай болон Бурханда баяр баясхаланай үргэлнүүдые тэрээн дээрэ үргэбэ. Израилиин Эзэн Бурханда алба хэхыень Иудын арад түмэндэ тэрэ захирба. 17 Арад зон ондоо газарнуудта, обоонууд дээрэ үргэл хэжэ байгаашье хадаа, тэдэ үргэлнүүдээ Эзэн Бурхандаа зорюулан үргэжэ байгаа бэлэй.

18 Мэнашшээгэй хэһэн бусад хэрэг ябуулганууд, Бурхандаа шэбшэһэн зальбаралынь, Израилиин Эзэн Бурханай нэрэһээ тэрээндэ айладхаһан лүндэншэдэй үгэнүүд Израилиин хаашуулай ном соо бэшэгдэнхэй. 19 Тэрэнэй зальбаралга, Бурханай тэрэниие анхарһаниинь, бүхы нүгэл, гэм зэмынь, номхон даруу болохын урда тээ үргэлэй газарнуудые түхеэрһэниинь, Ашэраа бурханай болон онгонуудай дүрсэнүүдые табиһан газарнуудынь Хозай гэгшын бэшэгүүд соо зураглагданхай. 20 Мэнашшээ наһа баража, ордон соонь тэрэниие хүдөөлүүлбэ. Аммоон хүбүүниинь орондонь хаан шэрээдэ заларба.

Аммоон – Иудын хаан

(4 Хаан 21:19-24)

21 Аммоон хорин хоёртойдоо хаан боложо, хоёр жэлэй туршада Иерусалимда хааншалаа. 22 Мэнашшээ эсэгэдээл адляар тэрэ Эзэндэ таарамжагүй харата хэрэгүүдые хэжэ байгаа. Эсэгынгээ бүтээһэн онгонуудта тэрэ үргэл үргэжэ, тэдэниие шүтэжэ байгаа. 23 Харин эсэгэдээ орходоо тэрэ Эзэнэй урда номхон даруу болоогүй, бүри ехэ нүгэлнүүдые хээ. 24 Аммооной дүтын хүнүүд хаанай эсрэг нюуса хэлсээ зохёожо, хамтаран эсэргүүсэжэ, хаанай ордон соо тэрэниие алаба. 25 Арад зон нюуса хэлсээндэ хабаадагшадые бултыень барижа усадхаад, Аммооной хүбүүн Ёшияае хаан шэрээдэ һуулгаба.