‏ 2 Chronicles 35

Ёшияа Паасхын һайндэр тэмдэглэнэ

(4 Хаан 23:21-23, 28-30)

1Эзэнэй хүндэлэлдэ Иерусалимда Паасхын һайндэр Ёшияа хэбэ. Түрүүшын һарын арбан дүрбэдэхи үдэр Паасхын хурьган үүсэлэгдээ һэн. 2Ёшияа санаартадые Эзэнэй Һүмэ соо һууринуудтань томилон байгуулжа, албаяа һайнаар хэхыень дэмжэн-үргэн байба. Египедэй хаан Нээхо Евфрат мүрэнэй хажууда оршодог Кархемииш хото руу сэрэгээ ударидан, дайлалдахаяа ерэбэ. Ёшияа тэрэнэй урдаһаа ерэбэ. 3Израилиин арад зониие һургадаг, Эзэндэ бэеэ зорюулһан левидүүдтэ тэрэ иигэжэ хэлэбэ:

– Мүр дээрэ ашаа табяад бү ябагты. Давидай хүбүүн, Израилиин хаан Соломооной баригша Һүмэ соо тэрэ ханзые табигты. Мүнөө Эзэн Бурхандаа болон Израилиин арад зондо алба хэгты. 4Израилиин хаан Давидай болон Соломоон хүбүүнэйнь бэшэн зааһанай ёһоор, түрэл гаралаараа, хубаарилгануудаараа зогсон, бэлэн байгты. 5Арад зонойнгоо обогуудаар хубаардагай ёһоор, мүн левидүүдэй хубаарилгын ёһо зангаар Һүмэ соо зогсон байгты. 6Паасхын хурьга үүсэлэгты, Эзэнэй Моисейгээр дамжуулһан үгын ёһоор, Эзэндэ зорюулан үргэхэдэ арад зондо тэрэниие бэлэн болгогты, бэеэ арюудхагты.

7Тэндэ байгааша улад зондо Паасхын үргэл хэхыень Ёшияа хаан өөрынгөө адуу малһаа гуша мянган хони хурьга, эшэгэ, гурба мянган эбэртэ бодо мал үргэн үгэбэ. 8Түшэмэлнүүдынь һайн дураараа арад зондо, санаартадта болон левидүүдтэ мүн лэ мал үгөө һэн: Бурханай гэрэй эрхилэгшэд Хилкияа, Захарияа ба Ехиһээл Паасхын үргэлдэ гэжэ санаартадта хоёр мянга зургаан зуун хони хурьга, гурбан зуун эбэртэ бодо мал дамжуулба. 9Левидүүдэй удамаршад болохо Ханаанияа, тэрэнэй дүүнэр Шэмаяа ба Нэтанээл, мүн тиихэдэ Хашаабияа, Еиһээл, Ёзабаад гэгшэд Паасхын үргэлдэ гэжэ левидүүдтэ таба мянган хони хурьга ба табан зуун эбэртэ бодо мал үргэбэ.

10Паасхын һайндэртэ бүхы юумэнэй бэлэн болоходо, санаартад болон левидүүд хаанай захирһанай ёһоор, хубаарилгануудаараа һуурияа эзэлбэ. 11Паасхын хурьгад, эшэгэдэй үүсэлэгдэхэдэ, левидүүд арһыень үбшэжэ абажа, санаартад үргэлэй шэрээ дээрэ шуһа сүршэжэ байба. 12Моисейн ном соо бэшэгдэһэнэй ёһоор, Эзэндэ зорюулагдаһан түгэс шатаалта үргэлэй мал түрэл гаралнуудаарнь улад зондо левидүүд хубаарилба. Эбэртэ бодо малые мүн лэ тиимээр тэдэ хубаарилба. 13Заабарилагдаһанай ёһоор, Паасхын хурьга, эшэгэдые гал дээрэ тэдэ шаража, нангин үргэлэй мяха элдэб тогоон соо шанажа, бүхы арад зондо түргөөр абаашан үгэбэ. 14Удаань тэдэ өөһэдтөө болон санаартадта Паасхын мяха бэлдэбэ, юуб гэбэл, Аһарооной үри һадаһад болохо санаартад һүни болотор түгэс шатаалта үргэл, өөхэ үргэжэ сүлөөгүй байгаа. 15Давидай, Асаапай, Һэмаанай, мүн хаанай мэдэлшэн Едүтүүнэй захяа заабариин ёһоор, дуушад, Асаапай үри һадаһад, өөрынгөө һуури орхихо ёһогүй һэн. Үүдэн бүхэнэй харуулшад мүн лэ һуурияа орхихо ёһогүй бэлэй. Тиимэһээ левидүүд тэдээндэшье Паасхын мал бэлдээ бэлэй. 16Иигэжэ Ёшияа хаанай заабариин ёһоор, тэрэ үдэр Эзэнэй хүндэлэлдэ Паасхын һайндэр боложо, түгэс шатаалта үргэлнүүд Эзэнэй үргэлэй шэрээ дээрэ үргэгдэбэ. 17Тэндэ байгааша Израилиин улад зон тэрэ сагта Паасхын болон Эһээгээгүй Хилээмэнэй һайндэрнүүдые долоон хоногой туршада үнгэргэбэ. 18Паасхын иимэ һайндэр Самуил лүндэншын үе сагһаа нааша болоогүй бэлэй. Ёшияагай, санаартадай, левидүүдэй, Иудын бүхы зоной, тэндэ байгааша Израилиин улад зоной, мүн Иерусалимай ажаһуугшадай хэһэн Паасхын иимэ ехэ һайндэрые Израилиин бэшэ ямаршье хаан хээгүй бэлэйл. 19Ёшияагай арбан наймадахи жэлээ хааншалжа байха сагта тэрэ Паасхын һайндэр болоо һэн.

Ёшияагай наһа баралга

(4 Хаан 23:28-30)

20Ёшияагай Бурханай һүмэ соо хурал тахилай ажалые һэргээһэнэй удаа Египедэй хаан Нээхо Кархэмиишдэ добтолхоёо Евфрат мүрэн тээшэ ошобо. Ёшияа хаан тэрэниие угтахаяа урдаһаань ошобо. 21Нээхо тэрээндэ элшэнэрые эльгээжэ, иигэжэ дуулгахыень захирба:

– Иудын хаан, шинии урдаһаа бэшэ, дайсадайнгаа урдаһаа добтолноб. Бурхан намда яарахыем айладхаа. Бурхан минии талада байна, тиимэһээ урдаһаань бү һөөргэдэ, үгы һааш, Тэрэ шамайе усадхаха!

22Харин Ёшияа тэрээнһээ хотиржо ошобогүй, дайлалдахаяа бэлдэбэ, Бурханай Нээхоор дамжуулһан айладхалые дуулабагүй. Тэрэ Мэгиддоо гэдэг нюруу газарта дайлалдахаяа гараба.

23Байлдаанай үедэ Ёшияа хаан дайсадта харбуулжа, шархатаба. «Намайе абаашагты, би хүндөөр шархатааб», – гэжэ тэрэ зарасанартаа хэлэбэ. 24Зарасанарынь тэрэниие дайшалхы тэргэһээ үргэн гаргажа, ондоо морин тэргэдэ һуулгажа, Иерусалим руу абаашаба. Ёшияа үнгэржэ, тэрэниие үбгэ эсэгэнэрэйнь булаша бунханууд соо хүдөөлүүлбэ. Иудын ба Иерусалимай бүхы улад зон тэрэнэй хойноһоо гашуудаа бэлэй.

25Ерэмияа лүндэншэ Ёшияа хаан тушаа гашуудалай дуу зохёоһон гээшэ. Дууша эрэшүүл ба эхэнэрнүүд гашуудалай дуунууд соогоо Ёшияа тушаа мүнөө болотор хэлэдэг байгаа, тиигээд Израилиин арад түмэн тэдэниие дууладаг болоо. Иигэжэ тэдэ дуунууд Гашуудалай дуунай согсолбори соо бүридхэгдэһэн гээшэ.

26Ёшияагай бусад хэрэгүүд, Эзэнэй һургаалнуудые сахин байһан дэмбэрэлтэй үйлэнүүдынь, 27эхинһээ эхилээд эсэс хүрэтэрөө Израилиин болон Иудын хаашуулай ном соо бэшээтэй юм.