‏ 2 Chronicles 36

Иудын хаан – Иохааз

(4 Хаан 23:31-35)

1Тэрэ орон нютагай арад зон Ёшияагай хүбүүн Иохаазые эсэгынь орондо Иерусалимда хаан шэрээдэ һуулгаба. 2Иохааз хорин гурба наһатайдаа хаан боложо, гурбан һарын туршада Иерусалимда хааншалба. 3Египедэй хаан тэрэниие Иерусалимай хан шэрээһээ хаһажа, яла болгожо зуун талаант мүнгэ, нэгэ талаант алта түлэхыень Иудын орон нютагта баадхаба. 4Египедэй хаан Нээхо Иохаазай дүү Элиакиимые Иудын болон Иерусалимай хан шэрээдэ үргэмжэлөөд, тэрээндэ Ёякиим гэжэ шэнэ нэрэ үгэбэ. Тиигээд Нээхо Иохаазые Египет руу абаашаба.

Иудын хаан – Ёякиим

(4 Хаан 23:36–24:6)

5Ёякиим хорин таба наһатайдаа хаан шэрээ эзэлжэ, арабан нэгэн жэлэй туршада Иерусалимда хааншалаа. Эзэн Бурханайнгаа урда тэрэ жэгшүүритэй муухай хэрэгүүдые үйлэдэдэг байгаа. 6Вавилооной хаан Навуходоносор орон нютаг руунь дайгаар добтолжо, Вавилоон руу абаашахаяа Ёякиимые гэнжэлээ бэлэй. 7Эзэнэй Һүмын үнэтэ хэрэгсэлнүүдэй зарим хубииень Вавилоон руу Навуходоносор абаашаад, ордон соогоо хэбэ. 8Ёякиимэй бусад хэрэг ябуулганууд, хэһэн жэгшүүритэй муухай үйлэнүүдынь Израилиин ба Иудын хаашуулай ном соо бэшээтэй. Тэрэнэй һүүлдэ Ехонияа хүбүүниинь орондонь хаан шэрээ эзэлбэ.

Иудын хаан – Ехонияа

(4 Хаан 24:8-17)

9Ехонияа арбан найма наһатайдаа хаан боложо, гурбан һара ба арбан үдэр Иерусалимда хааншалаа. Эзэнэй урда тэрэ жэгшүүритэй муухай хэрэгүүдые үйлэдэдэг байгаа. 10Нэгэ жэлэй үнгэрһэнэй удаа Навуходоносор хаан тэрэниие Эзэнэй һүмын үнэтэ хэрэгсэлнүүдтэй хамта Вавилоон руу асархыень захирба. Тиигээд тэрэ Цэдэкиия абгыень Иудын болон Иерусалимай хаан болгобо.

Иудын хаан – Цэдэкиия

(4 Хаан 24:18-20; Ер 52:1-3)

11Хорин нэгэ наһатайдаа Цэдэкиия хаан боложо, арбан нэгэн жэлэй туршада тэрэ Иерусалимда хааншалаа. 12Эзэн Бурханайнгаа урда тэрэ жэгшүүритэй муухай хэрэгүүдые үйлэдэдэг байгаа. Эзэнэй үгэ айладхадаг Ерэмияа лүндэншые номгохоноор тэрэ шагнажа шададаггүй һэн.

13Навуходоносорто үнэн сэхэ байхаб гэжэ Эзэнэй нэрээр тангариглахыень Цэдэкиияые Навуходоносор хаан баадхаһан юм. Теэд Цэдэкиия тэрэнэй урдаһаа буһалгаалба. Цэдэкиия үсэрхэжэ, Израилиин Эзэн Бурханда бусахаяа арсаба. 14Иудын удамаршад, санаартад, улад зон тойрон ажаһуугша ондоо арадуудай жэгшүүритэй муухай жэшээ даган, нүгэлөө олошоруулба, Иерусалимда Эзэнэй Өөрөө арюудхаһан Һүмые бузарлаба.

Иерусалим унаба

(4 Хаан 25:1-21; Ер 39:1-10; 52:4-27)

15Үбгэ эсэгэнэрэйнь Эзэн Бурхан һэргылхыень тэдээн руу лүндэншэдөө эльгээжэл-эльгээжэл байба, юундэб гэхэдэ, Тэрэ арадаа, нангин үргөөгөө хайрладаг байгаа. 16Теэд тэдэ Бурханай элшэдые наадалжа, Үгыень анхарангүй, лүндэншэдыень хараажа байба. Тиимэһээ арад зоной абарагдахын аргагүйгөөр Эзэн арадтаа уурлаба. 17Иигэжэ Эзэн тэдээндэ добтолхыень Вавилооной хааниие эльгээбэ. Вавилооной хаан Эзэнэй Һүмэ соо залуу хүбүүдые һэлмээр сабшан усадхаба. Тэрэ хэнииешье – эрэ, эмыешье, залуу, хүгшэншье зониие хайрлабагүй. Бурхан тэрэнэй мэдэлдэ бүхы зониие үгэһэн байба. 18Бурханай гэрэй ехэ, бага бүхы үнэтэ хэрэгсэлнүүдые, хаанай, түшэмэлнүүдэйнь үнэтэ зүйлнүүдые бултыень тэрэ Вавилоон руу абаашаба. 19Навуходоносорой сэрэгшэд Бурханай гэрые галдан шатааба, Иерусалимай хэрэм ханануудые һандаргаба, шухала ордон, самхагуудыень галдаба, бүхы баялигуудыень үгы хэбэ. 20Амиды үлөөшэ зониие тэрэ Вавилоон руу нүүлгэн абаашаба. Персиин улас түрын бии болотор тэдэ өөрынь болон үхи хүүгэдэйнь богоолнууд байгаа бэлэй. 21Иигэжэ «Далан жэлэй туршада энэ орон нютаг хооһон зандаа хэбтэхэ» гэжэ Ерэмияа лүндэншөөр Эзэнэй дамжуулһан үгэнүүд бүтэбэ.

Киир хаанай захиралта

(Эзр 1:1-3)

22Персиин хаан Киирэй түрүүшын жэлээ хааншалжа байхада Ерэмияагаар дамжуулһан үгэнүүдэйнгөө бэелүүлэгдэхын тула Эзэн Кииртэ нүлөө үзүүлжэ, тэрэ бүхы хаан түрөөрөө бэшэмэл аргаар болон үгэнүүдээр иигэжэ тунхаглахые захирба: 23«Персиин хаан Киир иимэ зарлиг буулгана: Огторгойн Эзэн Бурхан газар дэлхэйн бүхы хаан түрэнүүдые минии мэдэлдэ үгөө. Иудын Иерусалимда Тэрээндэ шүтэн мүргэдэг Һүмэ барихыемни Тэрэ захираа. Эзэн Бурханай арад зонһоо хэн байнаб, тэрэ тиишээ ошог лэ! Эзэн Бурханиинь тэрээнтэй хамта байхань болтогой!»