‏ 2 Chronicles 8

Соломооной бусад хэрэгүүд

(3 Хаан 9:10-28)

1Эзэнэй Һүмэ болон хаанай ордон хорин жэлэй туршада бариһанайнгаа удаа 2Соломоон Хураам хаанай үгэһэн хотонуудыешье барижа, Израилиин улад зониие тэндэ байрлуулба. 3Тэрэ Хамаат-Цобаагай газар уһанда дайлажа, эзэлээ бэлэй. 4Зэлүүд хооһон газарта Тадмоор гэжэ хото, мүн эдеэ хоол нөөсэлһэн хотонуудые Хамаадта тэрэ баряа һэн. 5Бүхэ хэрэмтэй, зузаан ханатай, бүхэ үүдэн, суургатай Дээдэ болон Доодо Бэт-Һороониие тэрэ мүн лэ барюулба. 6Баһалаат гэжэ хото, эдеэ хоол нөөсэлһэн бүхы хотонуудые, моридые болон дайшалхы тэргэнүүдые хадагалһан хотонуудые, юрэдөө, Иерусалимда, Ливаанда, бүхы харьяата газар дээрээ барихаяа һанагша юумэеэ Соломоон барюулба. 7– 8Израилиин зон хээт, эмоор, пэриззии, хиив, евүүс яһатанда добтолжо, газарынь эзэмдээ бэлэй. Тэдэнэй амиды үлэһэн үлдөөсын үхи хүүгэдые, юрэдөө, Израилиин арадһаа бусад зониие, Соломоон зарасанар болгобо. Тэдэ мүнөөшье болотор зарасанарынь зандаа байна. 9Израилиин арад зониие Соломоон хара ажалда зарадаггүй, тэдэ сэрэгшэд, сэрэгэй ноёд, захирагшад, дайшалхы тэргэнүүдэй болон морин сэрэгэй ноёд болон ябадаг һэн. 10Соломооной барилгануудта хабаадагша арадые зонхилогшо табан зуун табин харгалзалагша тушаалтан табигдаа бэлэй.

11Һамгаяа, фараоной басагые, Соломоон Давидай хотодохи ордонһоо ондоо ордон руу, тусхай тэрээндэ гэжэ баригдаһан ордон руу, нүүлгэбэ. Тэрэ иигэжэ хэлээ бэлэй: «Минии һамганшье һаа, тэрэ Израилиин Давид хаанай ордон соо байха ёһогүй, юуб гэхэдэ, энэ газарта ханза оршоно, энэ арюудхагдаһан газар гээшэ».

12Һүмын урда тээ табюулһан үргэлэй шэрээ дээрэ Соломоон Эзэндэ түгэс шатаалта үргэл үргэбэ. 13Моисейн ёһо һургаалнуудые сахин, түгэс шатаалта үргэлнүүдые тусхай үдэрнүүдтэ – амаралтын үдэртэ, Һарын шэнэдэ, жэлэй гурбан ехэ һайндэрнүүдтэ: Эһээбэригүй хилээмэнэй һайндэртэ, Түрүүшын ургаса хуряалгын һайндэртэ ба Отогуудай һайндэртэ – үргэдэг байха гэжэ тэрэ дурадхаа һэн. 14Давид эсэгынгээ захиралта дүүргэн, санаартадай үдэр бүриин ажал, санаартадта туһалдаг левидүүдэй Бурханиие магтан дуулаха ажалаа жэншэдгүй ябуулхаар гурим Соломоон эмхидхэбэ. Һүмын хашаа бүхэндэ харуул тэрэ табюулаа. Бурханай хүн болохо Давид эсэгынь захяа тиимэ байгаа юм. 15Иигэжэ Давид хаанай санаартад болон левидүүд тухай, нөөсэнүүд тушаа захиралта жэншэдгүй сахигдаа һэн. 16Иигэжэ Соломоон барилга дүүргэбэ. Тэрэ Һүмын һуури табяа, тэрэл түгэсэтэрнь баряа. Эзэнэй Һүмэ дууһан бүтэн болоо бэлэй.

17Удаань Соломоон эдоом арадай газар дайдада оршодог далайн эрьедэхи Эциһоон-Гээбэр болон Элоот руу ошобо. 18Хураам тэрээндэ далайн онгосонуудые болон далайгаар тамархадаа дүршэлтэй зарасануудые эльгээгээ бэлэй. Соломооной албатад тэдэнэй онгосонуудта һуужа, Опиир орон руу тамаран ошожо, дүрбэн зуун табин талаант шэжэр алта Соломоон хаанда асараа һэн.
Copyright information for BxrBBL2024