‏ 2 Chronicles 10

Израильшууд Рэхобаам хаанай урдаһаа эсэргүүсэнэ

(3 Хаан 12:1-24)

1Бүхы израильшууд Рэхобаамые хаан болгохо гэжэ Шэхээмдэ сугларһан байгаа. Тиимэһээ Рэхобаам Шэхээмдэ ерэбэ. 2Набаадай хүбүүн Еробоһаам Соломоон хаанһаа тэрьедэн Египет руу ошоһон аад, тэрээн тушаа дуулахадаа, һөөргөө бусаба. 3Израилиин улад зон Еробоһаамда дуудажа ерүүлээд, хамта Рэхобаам хаанда ошожо, иигэжэ хэлээ бэлэй:

4– Танай эсэгэ маанадые ехэ хүндөөр дарлаһан юм. Харин та эсэгынгээ шэрүүн зарлиг зөөлэрүүлжэ, маанад дээрэ тээһэн хүндэ ашаае хүнгэрүүлжэ, ажалыемнай хүнгэдхөө гээшэ һаатнай, бидэ танда албалан байхалди, – гэжэ хэлэбэ.

5– Гурбан хоногой һүүлээр дахин намда ерээрэйт, – гэжэ Рэхобаам тэдээндэ харюусаба.

Арад түмэн тараба. 6Эсэгынь амиды байхада албалжа байгаа аха захатантай Рэхобаам зүбшэжэ:

– Ямар харюу энэ арад түмэндэ хэлэхэбиб? – гэжэ асууба.

7– Хэрбээ энэ улад зондоо һайнаар хандан, эрилтэнүүдыень дүүргэн, зүбшөөһэн харюу үгэбэлтнай, тэдэ хэтын хэтэдэ танай зарасанар байхал, – гэжэ тэдэ хэлээ һэн. 8Харин Рэхобаам тэдэнэй зүбшэл хараада абангүй, өөртэйнь хамта үдэһэн, мүнөө өөрынь түшэмэлнүүд болоһон залуу зонтой зүбшэл бариба.

9– Эсэгынтнай маанад дээрэ ашаһан хүндэ ажалые хүнгэлыт гэжэ намда хэлэжэ байгааша арад зондо юун гэжэ харюу үгэхэбиб, намда зүбшэл хэлэгты, – гэжэ тэрэ тэдээндэ хандаба.

10Өөртэйнь хамта үдэһэн залуу зон тэрээндэ иигэжэ хэлэбэ:

– Эсэгэтнай маанад дээрэ хүндэ ажал ашаа, тэрэниие хүнгэлыт гэжэ танда хэлэжэ байгааша тэрэ улад зондо иимэ харюу үгэгты: «Минии шэгшы хурган эсэгымни бэлхүүһэнһээ бүдүүн юм! 11Зай, минии эсэгэ таанарта хүндэ ажал хүүлээ юм гээшэ һаань, би тэрэ ажалые бүри хүндэ бологохоб! Минии эсэгын таанадые ташуураар сохёо хадань би таанадые адаалхай түмэр түдэгөөр хэһээхэб!»

12Гурбадахи үдэртөө намда ерээрэйгты гэжэ хаанай захирһанай ёһоор Еробоһаам ба бүхы израилиин улад зон Рэхобаамда гурбадахи үдэртөө ерэбэ. 13Хаан аха захатанай зүбшэл анхарангүй, арад зондо хатуу шэрүүн харюу үгэбэ. 14Тэрэ залуу зоной зүбшэл хараада абажа, иигэжэ хэлэбэ:

– Минии эсэгэ таанадта хүндэ ажал хүүлээ, би тэрэниие бүри хүндэ болгохоб! Эсэгэмни таанадые ташуураар сохидог байгаа, би таанадые адаалхай түмэр түдэгөөр хэһээхэб!

15Иигэжэ хаан арад зоной гуйлтые анхарбагүй. Ушар юуб гэхэдэ, иимэ аргаар Шилооной Ахияа гэгшээр дамжуулан, Набаадай Еробоһаам хүбүүндэ Эзэнэй айладхагша иигэжэ хүсэлдэхэ байгаа бшуу.

16Хаан маанадай гуйлта анхарбагүй гэжэ Израилиин зон бултадаа ойлгоходоо, иигэжэ дуугаралдаба:

– Давидай гэр бүлэ маанадта хэд болохоб?! Ишайн хүбүүн маанадта хуби үлөөхэгүйл. Израилиин зон, гэртээ тарая даа! Рэхобаам өөрынгөө арадые зонхилон байг, маанадта бү хамаархаг.

Тиигэжэ Израилиин бүхы улад зон гэр гэртээ тараа бэлэй. 17Рэхобаам иигэжэ гансал Иудын обогой хотонууд дээрэ хаан болон зонхилжо үлөө бэлэй. 18Зараса хүдэлмэришэдые хинагша Адораамые Рэхобаамай эльгээхэдэ, израильшууд тэрээниие шулуудан алажархиба. Харин Рэхобаам хаан тэргэдээ яаралтай һуужа, Иерусалим руу тэрьедээ бэлэй. 19Иигэжэ тэрэ сагһаа мүнөө хүрэтэр Израилиин зон Давидай үри һадаһадта эсэргүү байдаг.
Copyright information for BxrBBL2024