2Ch 16 | BxrBBL2024 | STEP | Асаа гэдэг хаанай гушан зургаадахи жэлээ Иудын хан түрые зонхилон байхада Израилиин хаан Баһашаа Иудын хан түрэдэ добтолон орожо, Асаагай хан түрэ руу хэнэйшье нэбтэрэн орохогүйн, мүн тэндэһээ хэнэйшье гарахагүйн тула Рамаа хото бүхэлжэ эхилбэ.

‏ 2 Chronicles 16

Асаа араамайхидһаа хамгаалалта гуйна

(3 Хаан 15:17-24)

1 Асаа гэдэг хаанай гушан зургаадахи жэлээ Иудын хан түрые зонхилон байхада Израилиин хаан Баһашаа Иудын хан түрэдэ добтолон орожо, Асаагай хан түрэ руу хэнэйшье нэбтэрэн орохогүйн, мүн тэндэһээ хэнэйшье гарахагүйн тула Рамаа хото бүхэлжэ эхилбэ. 2 Асаа хаан Эзэнэй нангин үргөө соохи болон хаан ордонойнгоо алта, мүнгэ гаргажа, Дамааск хотодо ажаһуугша Араамай хаан Бэн-Һадаадта эльгээжэ, иигэжэ хэлэхые захирба:

3 – Танай болон минии эсэгэнэрэй хоорондохи хэлсээндэл адли хэлсээ хоорондоо баталхые дурадханаб. Анхарыт, танда мүнгэ, алта эльгээбэб. Израилиин хаан Баһашаатай хэлсээгээ болюулжа, намһаа һалан ошохыень баадхыт.

4 Бэн-Һадаад Асаа хаанай үгэ анхаржа, Израилиин хотонуудта добтолхыень сэрэгэйнгээ дарганарые эльгэбэ. Сэрэгшэдынь Ийон, Даан, Абээл-Мааим болон Напталиигай бүхы хотонуудые эзэлбэ. 5 Энээн тушаа дуулахадаа, Баһашаа эхилһэн ажалаа хаяад, Рамаа хотые бүхэлхэеэ болибо. 6 Асаа хаан Иудын бүхы зониие дуудажа, Баһашаагай Рамаа хото барихадаа хэрэглэжэ байгааша бүхы модо шулууе хотоһоо гаргуулба. Тиигээд тэрээгээр Гээбэ хотые ба Мицпаа хотые барюулба. 7 Тэрэ үедэ Ханаани мэдэлшэн Иудын хаан Асаа руу ерэжэ, иигэжэ хэлэбэ:

– Эзэн Бурхандаа найдан байхын орондо ши Араамай хаанда найдан байгааш, тиимэһээ Араамай сэрэгые алдааш. 8 Эфиопиин болон Ливиин зон угаа хүсэтэй сэрэгтэй, дайшалхы ехэ олон тэргэнүүдтэй болон морин сэрэгтэй байгаа бэшэ аал? Теэд шинии Эзэндэ найдан байхада, Тэрэ тэдэниие шинии олзо болгоо. 9 Газар дэлхэйн Тэрээндэ үнэн этигэдэг зониие бултыень Эзэн хаража байдаг, тиигээд тэдээндэ Тэрэ туһалдаг. Мүнөө ши буруу юумэ хэбэш. Тиимэһээ энээнһээ хойшо шамда добтолон орогшод бии болохо.

10 Асаа энээнэйнь түлөө мэдэлшэндэ ехэ уурлажа, түрмэ шорондо хаяба. Тэрэ үедэ Асаа улад зоной зариманиие хашадаг харшалдаг байгаа.

Асаагай наһа баралга

(3 Хаан 15:23-24)

11 Асаагай бүхы үйлэ хэрэгүүд эхинһээ эсэс хүрэтэр Иудын болон Израилиин хаашуулай ном соо бэшээтэй юм. 12 Хааншалалгынгаа гушан юһэдэхи жэлдэ Асаа хүлэй үбшэнтэй боложо, үбшэниинь һүжэрэн, бэеэрнь дээшэлбэ. Теэд тэрэ үбдэжэ байхадаа Эзэнһээ туһа гуйгаа бэшэ, аргалаашадта хандаа һэн. 13 Тиигэжэ Асаа зонхилолгынгоо дүшэн нэгэдэхи жэлдэ наһа баража, элинсэг хулинсагтаа мордоо бэлэй. 14 Давидай хото соо өөртөө гэжэ тэрэнэй зохёогшо булаша бунхан соо тэрэниие хүдөөлүүлхэдөө, элдэб уталгануудаар, анхилма үнэртэй дабирхайнуудаар дүүргэһэн хүүр соо тэрэниие табяа бэлэй. Хүдөөлүүлхэдээ, иимэ уталгануудые угаа олоор мүн лэ ууюулаа һэн.