‏ 2 Chronicles 18

Михай Ахаабай эсрэг лүндэн табина

(3 Хаан 22:1-35)

1Иигэжэ Ёшапаат баян, алдар солотой болоходоо, Израилиин хаан Ахаабтай үхи хүүгэдээ гэрлүүлбэ. 2Нэгэ хэды жэлэй үнгэрһэнэй удаа тэрэ Самари руу Ахаабта айлшалба. Тэрээниие болон хамта ерэгшэ зонииень хүндэлэн, Ахааб хони, үхэр угаа олоор үүсэлбэ. Галаадта оршодог Рамоот хотодо добтолон орохо тухай дурадхал Ахааб тэрээндэ оруулба.

3– Галаадай Рамоодто добтолхоёо намтай хамта гараха гүш? – гэжэ Израилиин хаан Ахааб Иудын хаан Ёшапаадһаа асуугаа бэлэй.

Тиихэдэнь Ёшапаат Израилиин хаанда:

– Ши хайшаа ябахабши, бишье тиишээ ябахаб. Минии сэрэг шинии сэрэгэй хойноһоо ябаха. Би шамтай хамта дайнда ябахаб! – гэжэ харюусаба.

4Удаань Ёшапаат Израилиин хаанда:

– Түрүүн Эзэнһээ зүбшөөл һурыш, – гэбэ.

5Израилиин хаан дүрбэн зуугаад лүндэншые суглуулжа:

– Галаадай Рамоодто добтолхомнай гү, али үгы гү? – гэжэ асууба.

Тэдэ:

– Добтологты, Бурхан тэрэниие танай гарта үгэжэ байна, – гээд харюусаба. 6Харин Ёшапаат:

– Эзэнһээ асууха үшөө ондоо лүндэншэ эндэ бии гээшэ гү? – гээд асууба. 7Израилиин хаан Ёшапаадта:

– Эзэнэй харюу дамжуулан хэлэдэг үшөө нэгэ хүн биил даа, теэд би тэрээндэ дурагүйб, юуб гэхэдэ, тэрэ нам тушаа гансал муугаар уридшалан хэлэдэг, һайн юумэ хэлээгүй. Имлаагай хүбүүн Михай гээшэ, – гэбэ. Ёшапаат тэрээндэ:

– Үгы, хаан, тиигэжэ бү хэлыш, – гэбэ. 8Тиихэдэнь Израилиин хаан нэгэ түшэмэлөө дуудажа:

– Имлаагай хүбүүн Михай гээшые түргөөр дуудажа асара, – гэбэ. 9Израилиин хаан болон Иудын Ёшапаат хаан хаан хубсаһаяа үмдэнхэй, Самари хотын талмай дээрэ, хаалгануудай хажууда өөр өөрын хаан шэрээдэ заларанхай һуугаа. Бүхы лүндэншэд урдань абарал буулгажа байгаа бэлэй. 10Хэнаанаагай хүбүүн Цэдэкиия өөртөө түмэр эбэрнүүдые хэжэ, иигэжэ соносхобо:

– Эзэн мүн айладхана: Араамай улад зониие иимэ эбэрнүүдээр мүргэжэ, дууһан хюдахаш.

11Бүхы лүндэншэдшье тон тиимээр уридшалан айладхажа байгаа:

– Галаадай Рамоодто добтолон орогты, амжалта туйлахат, Эзэн тэрэниие танай гарта үгэнэ.

12Михай гэгшые дуудахаяа ошогшо нэгэн:

– Михай, лүндэншэд нэгэн хүн мэтэ бултадаа хаанда һайн мэдээ дуулган, лүндэн табина. Танайшье үгэ тэдээндэл адли байг лэ, һайн мэдээ дуулгыт даа, – гэбэ.

13Михай:

– Эзэнэй нэрээр тангаригланаб! Эзэн Бурханайгаал айладаһан үгэ би дамжуулхаб, – гэбэ.

14Тэрэ хаанда ерэбэ. Хаан тэрээнһээ:

– Михай, Галаадай Рамоодто добтолон орохомнай гү, али үгы гү? – гэжэ асууба. Тэрэ:

– Добтолон орогты, амжалта туйлахат, Эзэн тэрэниие танай гарта үгэнэ, – гэбэ.

15Хаан тэрээндэ:

– Эзэнэй нэрэһээ дуугархадаа, ши намда зүбхэн үнэн сэхые дуулга гэжэ хэды дахин шамда тарнидан хэлэхэбиб? – гэхэдэнь.

16Михай хэлэбэ:

– Хонишонгүй хонид мэтэ хада уулаар таранхай Израилиин сэрэг харанаб. «Тэдэ удамаршагүй. Дай үүдхэнгүй, гэр руугаа амиды мэндэ бусаг лэ», – гэжэ Эзэн айладана.

17Израилиин хаан Ёшапаадта:

– Тэрэ нам тушаа һайнаар бэшэ, гансал муугаар уридшалан айладхадаг гэжэ би хэлээ бэшэ һэн гүб? – гэбэ.

18Михай харюудань:

– Эзэнэй айладхал шагна! Эзэнэй сэнтиидээ залараад, хажуудань баруун, зүүн гараарнь Огторгойн сэрэг барандаа зогсон байна гэжэ би харааб. 19Эзэн иигэжэ асууба: «Израилиин хаан Ахаабай хорхойень хэн хүдэлгэжэ, Галаадай Рамоот руу абаашажа шадахаб? Тэрэ тэндэ хосорхо һэн». Булта өөр өөрын һанамжануудые дурадхажа байхада, 20нэгэ һүнэһэн урагшаа гаража, Эзэнэй урда зогсоод, «Би шадахаб» гэбэ. «Ямар аргаар?» гэжэ Эзэн тэрээнһээ асууба. 21Тэрэ «Би ошожо, тэрэнэй бүхы лүндэншэдые худал абарал буулгадаг болгохоб» гэбэ. Эзэн «Шадахаш. Ошожо, энээнээ бүтээ» гээ һэн. 22Тиигээд мүнөө Эзэн шинии лүндэншэдые худал хэлэдэг болгоо. Тэрэ шамда гай тодхор ушаруулха гээд шиидээ.

23Хэнаанаагай хүбүүн Цэдэкиия гэгшэ дүтэлөөд, Михай гэгшын хасар альгадаад:

– Эзэн намда бэшэ, гансал шамда айладана гэжэ нээрээ һанажа байна гүш? – гэбэ.

24Михай хэлэбэ:

– Хорохо газар бэдэржэ, нэгэ таһалгаһаа нүгөө таһалга руу гүйжэ байхадаа энээниие мэдэхэш даа. 25Израилиин хаан захирба:

– Михайые баригты! Тиигээд хотын дарга Аммоондо болон хаанай хүбүүн Ёһаашда абаашагты! 26Энээниие шорондо хаяжа, минии амиды мэндэ бусатар хилээмэ, уһаар үл залгуулан байгты гээд хаан захирна гэжэ хэлэгты.

27Михай хэлэбэ:

– Амиды мэндэ бусаа һааш, Эзэн намда айладаагүй гээд элирхэ. Тиигээд тэрэ иигэжэ зондо соносхобо:

– Бултадаа энээниие шагнаад, хадуужа абагты!

Ахааб харбуулжа наһа барана

(3 Хаан 22:29-35)

28Израилиин хаан Ахааб болон Иудын хаан Ёшапаат сэрэгээ дахуулан, Галаадай Рамоот хотодо добтолхоёо ошобо. 29Ахааб Ёшапаадта иигэжэ хэлэбэ:

– Би хубсаһаа һэлгээд, байлдаанда орохом. Харин ши хаанай хубсаһа үмдөөд бай.

Израилиин хаан ондоогоор хубсалжа, байлдаан руу оробо. 30Араамай хаан дайшалхы тэргэнүүдэйнгээ ноёдто иигэжэ захирба:

– Юрын сэрэгтэйшье, сэрэгэй ноёдтойшье бү тулалдаарайгты, гансал Израилиин хаанда добтолооройгты. 31Дайшалхы тэргэнүүдэй ноёд Ёшапаадые хараад, «Израилиин хаан энэ мүн» гэжэ һанажа, тэрээнтэй тулалдахаа хотирбо. Теэд Ёшапаадай хашхархада, Эзэн тэрээндэ туһалжа, добтологшодыень зайсуулба. 32Дайшалхы тэргэнүүдэй ноёд тэрэнэй Израилиин хаан бэшэ байһые харахадаа, тэрээнһээ хотироо һэн.

33Араамай нэгэ сэрэгшэ һурша номоор харбахадаа, өөрөөшье ойлгонгүй Израилиин хааниие хуягайнь забһарай нүхэ оножо шархатуулба. Тэрэ дайшалхы тэргын жолоо баригшада:

– Эрьеэрэй, байлдаанһаа намайе гарга. Би шархатааб, – гэбэ. 34Теэд тулалдаан тэрэ үдэр бүри эршэдэжэ, Израилиин хаан Ахааб Араамай сэрэгэй урдаһаа харан, дайшалхы тэргэ соогоо үдэшэ болотор байха баатай боложо, наранай орохо үедэ хаан наһа бараба.