2Ch 20 | BxrBBL2024 | STEP | Нэгэ хэды сагай үнгэрһэнэй удаа моһаабууд болон аммоонууд, тиихэдэ зарим мэүүнүүд Ёшапаадта добтолон оробо.

‏ 2 Chronicles 20

Ёшапаат аммоонуудтай, моһаабуудтай, Сэһиирэй хадаар ажаһуудаг зонтой дайлалдана

1 Нэгэ хэды сагай үнгэрһэнэй удаа моһаабууд болон аммоонууд, тиихэдэ зарим мэүүнүүд Ёшапаадта добтолон оробо. 2 Зон Ёшапаадта ерэжэ, иигэжэ дуулгаба:

– Далайн эрьеһээ, Эдоомһоо угаа ехэ сэрэг тан руу ерэжэ ябана. Тэдэ мүнөө Хацацоон-Тамаарые гэхэ гү, али Эн-Гээди гэгшые эзэлбэ.

3 Ёшапаат айжа, Эзэндэ мүргэжэ эхилбэ. Тиигээд тэрэ Иудын улад зондо масаг бариха тухай захиралта буулгаба. 4 Эзэнһээ туһа гуйхаяа Иудын хан түрын бүхы хотонуудһаа зон Иерусалимда яаралтай сугларба. 5 Иудын болон Иерусалимай улад зоной Эзэнэй Һүмэ соо суглархада, Ёшапаат шэнэ суглаанай урда гаража, 6 иигэжэ зальбарба:

– Үбгэ эсэгэнэрэймнай Эзэн Бурхан! Огторгойһоо дэлхэйн арадуудые зонхилон байнат. Та агууехэ хүсэ шадалтайт, урдаһаатнай хэншье тулажа шадахагүй! 7 Бурхамнай, Өөрын арад түмэн Израилиин энэ газар уһан руу нүүжэ ерэхэдэ, Та эндэ урда сагһаа ажаһуугааша арадуудые үлдэн намнажа, энэ орон нютагые Өөрын нүхэр Абраһаамай үри һадаһадта хэтэ мүнхэдөө үгөө бэлэйт. 8 Тэдэ эндэ һуурижажа, Танда соло дуудаха нангин үргөө барижа, иигэжэ мэдэжэ байгаа: 9 «Ямар нэгэн гай тодхор – дайн гү, тахал үбшэн гү, али үлэсхэлэн хооһон байдал тохёолдоо хадань, бидэ энэ нангин үргөө соо Эзэндэ гуйлта үргэн зальбархабди, Тэрэ бидэниие дуулажа, абарха». 10 Мүнөө хадаа Аммооной, Моһаабай болон Сэһиирэй хадаар ажаһуудаг сэрэгүүд маанадта добтолон оробо. Манай үбгэ эсэгэнэрэй Египет орон нютагһаа гараад ябажа байхада тэдэнэй газар дээгүүр гарахыень Та зүбшөөгөөгүй бэлэйт. Тиимэһээ үбгэ эсэгэнэрнай хажуугаарнь үнгэржэ, тэдэниие хюдаагүй бэлэйл. 11 Харыт, Танай бидэндэ үгэһэн угай газар нютагһаа тэдэ бидэниие үлдэхэеэ ерэбэл! 12 Манай Бурхан! Тэдэниие усадхыт! Маанадта добтологшо иимэ ехэ сэрэгэй урдаһаа тулаха хүсэн бидэндэ байхагүй. Юугээшье хэхэеэ бидэ мэдэнэгүйбди, харин Тандаал найданабди!

13 Иудын бүхы эрэшүүл һамгадтаяа, үхи хүүгэдтэеэ хамта Эзэнэй нангин үргөө соо зогсон байгаа бэлэй. 14 Гэнтэ Эзэнэй Һүлдэ Асаапай угай тэндэ зогсожо байгааша левит хүн Яхазиһээлдэ шэнгэн оробо. Яхазиһээл хадаа Захарияагай, Захарияа Бэнайяагай, Бэнайяа Еиһээлэй, Еиһээл Маттаанияагай хүбүүн бэлэй. 15 Яхазиһээл иигэжэ хэлэбэ:

– Үндэр түрэлтэ Ёшапаат хаан, Иудын болон Иерусалимай бүхы арад зон, анхаралтайгаар шагныта! Энэ ехэ сэрэгһээ бү айгты, бү һүрдэгты гэжэ Эзэн таанадта айладхана. Энэ дайнай үрэ дүн таанадһаа бэшэ, Бурханһаа сэхэ дулдыдаха. 16 Үглөөдэр тэдэнэй урдаһаа добтолон орогты. Тэдэ мүнөө Цииц гэжэ гүбээ дээрэ гаража байна. Ерүһээл гэжэ зэлүүд хооһон талын урда, нюруу газарай эсэстэ тэдэниие олохот. 17 Энэ удаа таанад дайлалдана бэшэт, һуурияа эзэлэн зогсожо, Эзэнэй таанадта үршөөһэн илалта харан байгты. Иудын болон Иерусалимай улад зон, бү айгты, һүрдэн бү сошогты. Үглөөдэр тэдэнэй урдаһаа добтологты, Эзэн таанадтай хамта!

18 Ёшапаат хаан нюураараа газар хүрэтэр мүргэбэ. Иудын болон Иерусалимай бүхы арад зон Эзэндэ зальбаран, мүн лэ унажа мүргөө бэлэй. 19 Кэһаадай болон Коорахай угай левидүүд Израилиин Эзэн Бурханда угаа шангаар магтаал үргэхэеэ бодоо һэн.

20 Нүгөө үглөө тэдэ эртэ бодожо, Тэкооһа гэдэг зэлүүд хооһон газар руу зорибо. Зорихын урда тээ Ёшапаат хаан зогсожо, иигэжэ бултанда хэлэбэ:

– Иудын болон Иерусалимай улад зон, намайе шагныта! Эзэн Бурхандаа үнэнхэ зүрхэнһөө этигэн байгты! Тэрэнэй лүндэншэдтэ этигэгты! Тиигэбэл, амжалта туйлахат.

21 Тиигээд тэрэ арад түмэнтэй зүбшэжэ, «Эзэндэ магтаал үргэгты! Юуб гэбэл, Тэрэнэй хайра үршөөл хэтэ мүнхын!» гэжэ магтан дуулаха нангин хубсаһатай дуушадые сэрэгэй урда табиба. 22 Тэдэнэй магтан дуулажа эхилхэдэ, Эзэн Иудада дайгаар ороһон аммоонуудай ба моһаабуудай урдаһаа, Сэһиир хадын уласай урдаһаа сэрэгшэдые ябуулба. Тиигээд дайсад усадхагдаа бэлэй. 23 Яагаад бэ гэбэл, Аммоон ба Моһаабай сэрэгүүд Сэһиир хадын уласта добтолжо, эсэслэн усадхаба. Удаань тэдэ бэе бэетэеэ дайлалдаа бэлэй. 24 Иудын сэрэг зэлүүд хооһон газарта байгааша самхаг руу дүтэлжэ хараба: дайсадай сэрэг бултадаа үхэнхэй газар дээрэ хэбтэжэ байба. 25 Ёшапаат түшэмэлнүүдтэеэ хамта олзо оложо абаашахаяа ерэхэдээ, угаа ехэ эд зөөри, мал адууһа, хубсаһа хунар ба бусад үнэтэй зөөри оложо, гурбан үдэрэй туршада абаашаашье хадаа бултыень абаашажа шадабагүй. 26 Дүрбэдэхи үдэрөө тэдэ Берахаа ^{▼▼ Берахаа: еврей хэлэн дээрэ энэ нэрэ «магтаал» гэһэн удхатай.} гэдэг нюруу газарта сугларжа, Эзэндэ магтаал үргэн зальбарба. Тиимэһээ энэ нюруу газар Берахаа гэжэ нэршэһэн юм. 27 Иуда болон Иерусалимые толгойлһон Ёшапаат түшэмэлнүүдтэеэ хамта Иерусалим руу бусахадаа, угаа хүхижэ ябаа. Юуб гэбэл, дайсадыень Эзэн даран диилүүлээ бшуу. 28 Иигэжэ тэдэ Иерусалим хотоор үнгэрэн, Эзэнэй Һүмэ хүрэтэр ятага, үхэр бүреэ дээрэ хүгжэмлэн ябаа һэн. 29 Израилиин дайсадтай Эзэнэй дайлалдаһан тушаа дэлхэйн арадууд дуулахадаа, ехэ һүрдэбэ. 30 Ёшапаадай хааншалалга саашадаа амгалан тайбан байдалда үргэлжэлбэ. Бурхан тэрэниие алишье талаһаань аршалан байгаа һэн.

Ёшапаадай засаглалай эсэс

(3 Хаан 22:41-50)

31 Ёшапаат гушан табатайдаа Иудын хаан болоһон юм. Тэрэ Иерусалимда хорин табан жэлэй туршада хааншалаа. Эхэнь Шилхиигэй басаган Азубаа бэлэй. 32 Тэрэ Асаа эсэгынгээ жэшээ даган, Эзэндэ таатай хэрэгүүдые эрхилэн ябаа. 33 Гансал обоонуудта үргэл үргэхэ гээшэ болюулагдаагүй, арад зон үбгэ эсэгэнэрэйнгээ мүргэдэг Бурханда гүйсэд хандаагүй байгаа.

34 Ёшапаадай бүхы хэрэгүүдые, эхинһээ эхилээд һүүл хүрэтэр, Ханааниин хүбүүн Еһүү бэшэн дансалаа бэлэй. Тиигээд тэрэнь Израилиин хаашуулай түүхэ тушаа ном соо оруулагдаа һэн.

35 Иудын Ёшапаат хаан нэгэ үедэ Израилиин Ахазияа хаантай эб холбоотой байһан юм. Харин Ахазияа олон муу муухай хэрэгүүдые хээ. 36 Тэнгис далайгаар Таршииш руу тамарха мантан онгосонуудые хамта бариха гэжэ тэдэ хэлсэбэ. Тэрэ мантан онгосонуудые Эциһоон-Гээбэртэ тэдэ баряа һэн. 37 Гэбэшье Марэшаа хотын Додаваһуугай хүбүүн Элиээзэр Ёшапаат тушаа иимэ лүндэн табиба: «Ахазияатай холбоотой байһанайш түлөө Эзэн шинии хэһэн юумэ һалгааба». Мантан онгосонууд бутаржа, Таршииш руу тамаржа шадахаар бэшэ болоо бэлэй.