2Ch 22 | BxrBBL2024 | STEP | Арааб арадай сэрэг Иудын урдаһаа дайлалдажа байхадаа, Иораамай бүхы хүбүүдые алаһан байгаа. Гансал бага хүбүүниинь Ахазияа амиды үлөө һэн. Тиимэһээ Иерусалимай улад зон Ахазияа гэгшые хаан шэрээдэ дэбжэн һуулгаба.

‏ 2 Chronicles 22

Ахазияа – Иудын хаан

(4 Хаан 8:25-29; 9:14-29; 11:1-3)

1 Арааб арадай сэрэг Иудын урдаһаа дайлалдажа байхадаа, Иораамай бүхы хүбүүдые алаһан байгаа. Гансал бага хүбүүниинь Ахазияа амиды үлөө һэн. Тиимэһээ Иерусалимай улад зон Ахазияа гэгшые хаан шэрээдэ дэбжэн һуулгаба. 2 Ахазияа хорин хоёртойдоо хан шэрээдэ һуужа, нэгэ жэлэй туршада Иерусалимда засаглаба. Тэрэнэй эхэ Атаалияа Израилиин Омрии хаанай басаган һэн. 3 Эхэнь нүгэл үйлэдэхэ талаар тэрээндэ зүбшэл заабари үгэдэг байжа, тэрэ Ахаабай гэр бүлэдэл адляар хэрэгүүдые эрхилдэг байба. 4 Эсэгынь наһа бараһанай удаа гэр бүлынь гэшүүд тэрээндэ зүбшэл үгэдэг, хосорхо тээшэнь татадаг байжа, Ахаабай үри һадаһадтал адляар тэрэ Эзэнэй урда нүгэл үйлэдэбэ. 5 Тэдэнэй үгэ дуулажа, Ахазияа Израилиин хаан байгша Ахаабай хүбүүн Ёраамтай хамта Араамай хаан Хазаһээлтэй дайлалдахаяа Галаадай Рамоодто байлдаанда ошобо. Араамшууд тэндэ Ёраамые шархатуулба. 6 Тэрэ Рамоодто Араамай хаан Хазаһээлтэй дайлалдахадаа араамшуудта шархатуулһан шархаяа эмшэлхэеэ Езрээл бусаба. Иораамай хүбүүн Ахазияа Ахаабай хүбүүн Ёраамые эрьежэ ерээ һэн. 7 Ёраамда ерэһэн ушарыень Ахазияае һалгаха талаар Эзэн хэрэглээ бэлэй. Ахазияа ерэжэ, Ёраамтай хамта Нимшиигэй хүбүүн Еһүү гэгшын урдаһаа добтолбо. Харин тэрэ Еһүү гэгшые Ахаабай уг удам усадхагшаар Эзэн шэлэн түсэблэн, тоһоор түрхиһэн байгаа. 8 Ахаабай гэр бүлэ тушаа Эзэнэй зарлиг гүйсэдхэжэ байхадаа, Еһүү Иудын удамаршадые ба Ахазияагай аханарай хүбүүдые оложо алаһан юм. 9 «Ахазияа гэгшые бэдэрэгты!» гэжэ тэрэ захирба. Ахазияагай Самарида хоргодоод байһыень оложо, Еһүү гэгшэдэ тэрэниие асарба. Тиигээд Ахазияа тэндэ усадхагдаба, гэбэшье бэень хүдөөлүүлэгдөө һэн. Юуб гэбэл, «Эзэниие бүхы үнэнхэ зүрхэнһөө хүндэлэн шүтэдэг байһан Ёшапаат хаанай аша хүбүүн гээшэ» гэжэ зон тэрээн тушаа хэлсэдэг байгаа шуу. Хаан шэрээдэ заларха хүн Ахазияагай гэр бүлэдэ бэшэ үлөөгүй.

10 Ахазияагай эхэ Атаалияа хүбүүнэйнгээ алуулһые мэдэхэдээ, хан шэрээе эзэлхэ байһан Иудын хаанта гэр бүлын гэшүүдые бултыень алаха тухай захиралта үгэбэ. 11 Гэбэшье Иораамай хаанай басаган Ёшабээт алуулха хуби заяатай байһан хаанай хүбүүдэй дундаһаа Ёһаашые нюусаар хулуужа абарба, тэжээһэн эхэтэйнь хамта өөрынгөө унталгын таһалгада асаржа хоргодуулба. Иигэжэ Ахазияатай нэгэ эсэгэтэй, ондоо эхэнүүдтэй, тиимэһээ Ахазияагай эгэшэ, Ёядаа санаартанай һамган Ёшабээт Ёһаашые Атаалияаһаа нюужа, тэрэ амиды мэндэ үлөө бэлэй. 12 Атаалияагай хааншалха үедэ, зургаан жэлэй туршада, тэрэ Бурханай гэр соо хоргодобо.