‏ 2 Chronicles 27

Ётаам – Иудын хаан

(4 Хаан 15:32-38)

1Ётаам хорин таба наһатайдаа хаан боложо, арбан зургаан жэлэй туршада Иерусалимда хааншалаа. Цадоогой басаган Ерушаагай хүбүүн һэн. 2Уззияа эсэгэдээл адли Эзэндэ таарамжатай үйлэ хэрэгүүдые хэжэ байгаа. Гэбэшье Эзэнэй һүмэ руу ородоггүй бэлэй. Теэд арад түмэн нүгэл хэдэгээрээл хэжэ байгаа. 3Ётаам Эзэнэй һүмын Дээдэ хаалта үүдэ барюулба, мүн Оопэл гүбээ дээрэхи ханые заһабарилха ехэ ажал ябуулаа. 4Иудын хаданууд дээгүүр хотонуудые, ой модон соогуур ордон, хэрэм самхагуудые тэрэ баряа бэлэй. 5Аммоонуудтай тэрэ дайлалдажа, диилээ. Тиигэжэ аммоонууд тэрээндэ жэл бүри, гурбан жэлэй туршада, зуун талаант мүнгэ, арбан мянган кооро шэниисэ, мүн лэ тиимэ хэмжүүртэй ешмээн үгэжэ байгаа. 6Эзэн Бурхандаа этигэл дүүрэн байһандаа Ётаам угаа хүсэ шадалтай хаан болоо һэн. 7Ётаамай бусад хэрэгүүд тушаа Израилиин болон Иудын хаашуулай ном соо бэшэгдэнхэй. 8Ётаам хорин таба наһатайдаа хаан боложо, арбан зургаан жэлэй туршада Иерусалимда хааншалаа. 9Ётаамай наһа барахада, тэрэниие Давидай хото соо үбгэ эсэгэнэрэйнь хажууда хүдөөлүүлбэ. Орондонь Ахааз хүбүүниинь хаан шэрээдэ заларба.
Copyright information for BxrBBL2024