2Ch 5 | BxrBBL2024 | STEP | Эзэнэй Һүмэ барилгын ажалай дүүрэһэнэй удаа Соломоон Давид эсэгынгээ Бурханда зорюулан үргэһэн алта, мүнгэ, эд зүйлнүүдые Бурханай гэрэй эрдэниин сан руу оруулан хадагалба.

‏ 2 Chronicles 5

1 Эзэнэй Һүмэ барилгын ажалай дүүрэһэнэй удаа Соломоон Давид эсэгынгээ Бурханда зорюулан үргэһэн алта, мүнгэ, эд зүйлнүүдые Бурханай гэрэй эрдэниин сан руу оруулан хадагалба.

Нангин ханзые зөөлгэ

(3 Хаан 8:1-13)

2 Соломоон Эзэнэй хэлсээнэй ханзые Давидай хото ^{▼▼ «Давидай хото» гээд Иерусалимай нэгэ хуби нэрлэгдэдэг байгаа, тэрэ хубиие Давид евүүсүүдһээ дайгаар абаа бэлэй.} болохо Сионһоо гарган абаашаха хэрэгээр Израилиин аха захатаниие, обогуудай удамаршадые, Израилиин угуудай амбан һайдые Иерусалим руу дуудаба. 3 Иигэжэ израильшууд бултадаа жэлэй долоодохи һарада һайндэрэй үедэ хаанда сугларан ерэбэ. 4 Израилиин бүхы ахамадуудай суглархада, левидүүд хэлсээнэй ханза үргэбэ, 5 Уулзалгын майхан һүмые, майхан соо байгааша нангин бүхы хэрэгсэлнүүдые, ханзые абаад, левит санаартад тэдэ бүгэдые тэлээд абаашаба. 6 Соломоон хаан болон Израилиин улад зон хэлсээнэй ханзын урда тээ алхалжа, тоо томшогүй угаа олон хони, буруугаар үргэл үргэжэ байгаа бэлэй. 7 Иигэжэ санаартан Эзэнэй хэлсээнэй ханзые Һүмын дотоодо таһалгада, Хамагай нангин газарта, херүүбүүдэй дали доро залаба. 8 Херүүбүүд хэлсээнэй ханза дээгүүр даляа дэбижэ, тэрэниие тэлээд ябадаг һургаагтайнь хамта хушан байба. 9 Ханзые тэлэжэ ябадаг һургаагууд аргагүй утанууд аад, Хамагай нангин газарай урда оршоһон дотоодо таһалгаһаа харагдадаг, харин газааһаа бултайжа харагдадаггүй бэлэй. Мүнөөшье болотор тиимэ зандаа. 10 Израилиин арад зоной Египедһээ гарахада, Хорээб хада дээрэ Эзэнэй тэдээнтэй хэлсээ баталжа, Моисейн тиишэнь хэһэн хоёр шулуун хабтаһанһаа бэшэ ондоо юумэн тэрэ ханза соо үгы һэн. 11 – 12 – 13 – 14 Тэндэ байгааша бүхы санаартад илгаагүй бултадаа урид бэеэ арюудхаад байгаа. Бүхы дууша левидүүд, тодорхойлбол, Асаап, Һэмаан, Едүтүүн, хүбүүдынь, аха дүүнэрынь үргэлэй шэрээгэй зүүн талада зогсоо бэлэй. Тэдэ нимгэн маалинга хубсаһа үмдэнхэй, ятага, хуур дээрэ наадажа, хэсэ хэнгэрэг сохижо байгаа, хажуудань үхэр бүреэ үлеэгшэ зуун хорин санаартан зогсоо. Иигэжэ тэдэ дуу дуулажа, хүгжэмлэжэ, Эзэниие магтан дуулажа байгаа. «Эзэн һайн, Тэрэнэй үршөөл хэтэ мүнхэ!» – гэжэ тэдэнэй нэгэн хүн мэтэ жэгдэ хоолойгоор дуулан магтан, хүгжэмлэжэ байхада, Эзэнэй Һүмые үүлэн бүрхөөн дүүргэбэ. Эзэнэй алдар солоор толорһон үүлэнэй Бурханай гэрые барандань бүрхөөһэн ушарһаа санаартан зогсожо, уялгануудаа дүүргэжэ шадахаяа болёод байгаа.