‏ 2 Chronicles 9

Шэбаагай хатан Соломоондо айлшална

(3 Хаан 10:1-29; 11:41-43; 2 Уг 1:14-17)

1Шэбаагай хатан Соломоон хаанай алдар соло тушаа дуулаад, таабаринууд мэтэ хүндэ асуудалнуудые тэрээндэ табижа туршахаяа һэдэбэ. Тиигээд тэрэ Иерусалим руу ехэ баялиг асарба: арюун хангалтай гүгэл уталгануудые, алта мүнгэ, эрдэни шулуунуудые дүүрэн ашаһан тэмээн хамбытай хүрэжэ ерэбэ. Соломоондо орожо, һанаһан тухайгаа асуужа, тэрээнтэй хөөрэлдэбэ ха. 2Соломоон бүхы асуудалнуудтань харюу үгэбэ. Хаанай мэдэхэгүй юумэн үгы байба. 3Шэбаагай хатан Соломооной сэсэн мэргэн байһые, бариһан ордонгыень, 4шэрээ дээрэхи эдеэ хоолыень, зарасанарайнь һуудаг һандалинуудые, хубсаһа хунар, эзэндээ хандасыень, манза баряашадайнь хубсаһа, маяг, мүн тиихэдэ Эзэнэй үргөө соо түгэс шатаалта ямар баян үргэл хаанай үргэдэгые хаража, угаа гайхан-гоёшоон байгаа бэлэй. 5Тиигээд тэрэ хаанда иигэжэ үгүүлбэ:

– Өөрынгөө газар дээрэ байхадаа танай хэрэгүүд болон сэсэн мэргэн ухаан тушаа дуулаһамни зүб байба. 6Гэбэшье өөрөө ерэжэ, өөрынгөө нюдөөр хараадүйдөө тэрэ үгэнүүдтэ этигэдэггүй байгааб. Мүнөө хаража байхадаа хахадыньшье дуулаагүй байгааб гэжэ һананаб, юуб гэхэдэ, сэсэн мэргэн ухаантнай минии дуулаһанһаа үлүү ехэ байнал. 7Зонтнай хэды жаргалтайб! Хажуудатнай байжа, сэсэн мэргэн үгүүлэлытнай шагнаха аргатай богоолнуудтнай хэды жаргалтайб! 8Энэрэл хайраа үзүүлэн, хаан шэрээдэ таниие заларуулагша Эзэн Бурхантнай үреэл магтаалда хүртэг лэ! Танай Бурхан Израильда дуратай байһандаа, мүн хэтэ мүнхэдөө тэрэниие баталха һаналтайгаар таниие үнэн шударга байхынтнай тула, үнэн зүбые үйлэдэхынтнай тула Тэрэ таниие хаанаар томилоол.

9Тиигээд тэрэ хаанда асарһан бэлэгүүдээ барюулба: зуун хорин талаант шэжэр алта, үнэтэ эрдэни шулуунуудые, үнэтэ хангалтай гүгэлнүүдые. Соломоон хаанда Шэбаагай хатанай бэлэглэһэнтэй адли иимэ һайхан гүгэл бэшэ хэзээдэшье асаржа байгаагүй юм. 10Хураамай албатан болон Опиирһоо алта асарагша Соломооной албатан үнэтэ зандан модо болон эрдэни шулуунуудые мүн лэ асараа бэлэй. 11Тэрэ асарһан үнэтэ зандан модоор хаан Эзэнэй Һүмын болон хаанай ордоной гэшхүүрнүүдые дархалуулба. Мүн лэ хүгжэмшэдтэ ятага болон лимбэнүүдые тэрэ урлуулба. Иимэ юумэн Иудын газар дайдада хэзээшье харагдаа үзэгдөөгүй байгаа. 12Шэбаагай хатанай эриһэн, хүсэһэн бүхы юумыень, дээрэһээнь өөрын үгэхэ гэжэ һанаһан зүйлнүүдые нэмэжэ Соломоон хаан элбэг дэлбэг бэлэг барюулба. Тиигээд Шэбаагай хатан албатанаараа өөрын орон нютаг руу бусаба. 13Соломоон хаан жэл бүри зургаан зуун жаран зургаан талаант алта олзолдог һэн. 14Энээнһээ гадна аралжаа наймаа эрхилэгшэд, хүпеэсүүд, Аравиин хаашуул, можо нютагуудай ноёд Соломоондо алта мүнгэ асаржал байгаа бэлэй. 15Соломоон хаан шэжэр алтаар хоёр зуун мантан бамбай бүтээлгэбэ. Бамбай бүхэндэ зургаан зуун шээкэл алтан гаргашалагдаа. 16Хаан алтаар гурбан зуун багашаг бамбай бүтээлгэбэ. Бамбай бүхэндэ гурбан зуун шээкэл алтан гаргашалагдаа һэн. Хаан тэдэ бамбайнуудые Ливаанай үнэтэ модоор шэмэглэгдэһэн таһалга соо табиба. 17Тэрэ заанай һоёогоор мантан хан шэрээ бүтээлгэбэ. Тиигээд тэрэ шэрээе шэжэр алтаар шэмэглүүлбэ. 18Хан шэрээ руу ошоһон зургаан гэшхүүр, шэрээ доро алтан табсан, шэрээгэй хоёр талаар гар табиха табсангууд, хажуугаарнь зогсоһон хоёр арсалан, 19тиихэдэ тэрэ зургаан гэшхүүр дээрэ арбан хоёр арсалангай дүрсэнүүд хоёр талаарнь дархалуулагдаба. Иимэ үзэсхэлэнтэ зүйлые ямаршье хан түрэдэ урдань урлаагүй бэлэй. 20Соломоон хаанай бүхы аяганууд алтан, Ливаанай үнэтэ модоор шэмэглэгдээтэй таһалгада бүхы амһартанууд алтан һэн. Мүнгэн Соломооной үе сагта үнэтэйдэ тоологдодоггүй бэлэй. Тиимэһээ мүнгөөр бүтээгдэһэн юуншье тэрээндэ байгаагүй. 21Хаанай далайн онгосонууд Хураам хаанай онгосонуудтай хамта Таршииш хүрэтэр тамардаг, гурбан жэлдээ нэгэ удаа алта, мүнгэ, заанай һоёо, һармагшан, тугас шубуудые асардаг бэлэй.

22Соломоон хаан дэлхэйн бүхы хаашуулһаа үлүү баялигаараа, сэсэн мэргэн ухаагаараа шалгараа һэн. 23Тиимэһээ бүхы дэлхэйн хаашуул Соломоонтой уулзаха, Эзэн Бурханай заяаһан сэсэн мэргэн ухааень шагнаха гэжэ эрмэлзэдэг байгаа. 24Жэлһээ жэлдэ хаанда ерэһэн хүн бүхэн бэлэг асардаг һэн: алта, мүнгэн амһартануудые, хубсаһа хунар, дайнай зэбсэгүүдые, үнэтэ гүгэлнүүдые, хурдан моридые, лууснуудые бэлэг болгон баридаг байгаа. 25Моридой болон дайшалхы тэргэнүүдэй дүрбэ мянган байра, арбан хоёр мянган морин сэрэг Соломоондо байгаа. Тэрэ тэдэнээ дайшалхы тэргэнүүдэй хотонуудаар, Иерусалимда өөрын хажууда байрлуулба. 26Иигэжэ тэрэ Евфрат мүрэнһөө эхилээд, Пилиштын газар дайда хүрэтэр, Египет орон хүрэтэр бүхы хаашуулые зонхилон һуугаа. 27Тэрэнэй зонхилон байха үедэ Иерусалимда мүнгэн юрын шулуундал адли тоологдодог, харин үнэтэ хуша модод набтар газараар ургадаг һөөг бургааһандал адли үдхэн ургадаг бэлэй. 28Соломоондо моридые Египедһээ, мүн бүхы орон нютагуудһаа худалдан абадаг һэн.

29Соломооной хэһэн бусад хэрэгүүд, эхинһээ эсэс хүрэтэр, Натаан лүндэншын бэшэгүүд соо, мүн Шилооной Ахияагай лүндэн соо, лүндэншэ Иддоо гэгшын Набаадай хүбүүн Еробоһаам хаан тухай хараһан зүн соонь зураглагданхай. 30Бүхы Израилиие зонхилжо, дүшэн жэлэй туршада Соломоон Иерусалим соо хааншалаа. 31Тэрэ наһа баража, Давид эсэгынгээ хотодо элинсэгүүдтэйгээ хамта хүдөөлүүлэгдэбэ. Удаань тэрэнэй орондо хан шэрээдэ Рэхобаам хүбүүниинь залараа бэлэй.