‏ 2 Corinthians 11

Павел, мүн хуурмаг элшэнэр

1Тэнэг зан гаргахадамни тэсэбэритэй байһайт гэжэ хүсэнэб. Хэрэг дээрээ тиимэл байдаг ха юмта даа. 2Би Бурхандал адляар таанадта һанаагаа табинаб. Таанадые хүнэй гар хүрөөгүй, арюун басагандал мэтэ гансал хүндэ, Христоосто хадамда үгэхэ гэжэ үгөө үгэһэн байнаб. 3Могой мэхэ гохо гарган, Евые яажа мэхэлээ һэм, тон тиигэжэл таанад мэхэлүүлээд, Христоосто үнэн сэхэ, арюун сэбэр һанал бодолнуудаа хубилгана гүт гэжэ би айнаб. 4Хэрбээ хэн нэгэнэй таанадта маанадай номноһонһоо ондоо Иисүүсые номнобол, али маанадһаа тогтоожо абаһанһаа илгаатай ондоо һүлдые, һайн мэдээсэлые үгэбэл, таанад тэдэнииень амархан абахаар байнат.

5Тэдэ «агууехэ элшэнэр» гэгдэдэг зонһоо би юугээрээшье дутанагүйб гэжэ бодоноб. 6Би уран гоё хэлэтэй бэшэб, гэхэтэй сасуу эрдэм мэдэлгэтэйб. Таанад өөһэдөөшье энээниие элдэб ушарнуудһаа тухайлһан мэдэһэн байнат.

7Таанадые дээшэнь үргэхын тула өөрыгөө доошонь даража байхадаа, Бурханай Һайн Мэдээсэлые түлөөһэгүйгөөр номноходоо, би буруу юумэ хээ гүб? 8Ондоо һүзэглэгшэдэй бүлгэмүүдые дээрмэдэн, тэдэнһээ түлөөһэ абажа байгаад, би таанадта алба хэжэ байгааб. 9Хамта байхадаа, мүнгөөр дуталдаха сагтаашье таанадта ашаан болодоггүй һэм. Македониһоо ерэһэн һүзэглэгшэд намда хэрэгтэй юумэ асаржа үгөө һэн. Урдань таанадые дарамталхагүй гэжэ оролдодог хэбээрээл саашадаашье байхаб. 10Энэ бахархалыемни Ахайяын нэгэшье хүн буляажа шадахагүй гэжэ зосоомни оршодог Христоосой үнэн зүбөөр баталан хэлэнэб. 11Таанадта дурагүй байһандаа иимэ юумэ хэлэнэ гүб? Таанадта аргагүй ехээр дуратай байһыемни Бурхан мэдэхэ.

12Тэдэ бусад «элшэнэрэй» маанадтайл адли юумэ хэнэбди гэжэ бахархаха боломжогүй байхын тула мүнөө хэжэ байһан юумэеэл хэжэ байхаб. 13Тэдэ худалша ажалшад, хуурмаг элшэнэр Христоосой бодото элшэнэр байһан хэбэр үзүүлдэг. 14Эндэ гайхалтай юумэн үгы: сатана өөрөөшье гэрэл туяагай Эльгээмэлэй дүрэ дүрсэлэн мэхэлдэг ха юм. 15Тиимэһээ тэрэнэй зарасанарай үнэн зүбэй зарасанарай дүрэ дүрсэлэн, тэдээндэл адляар харагдахада, ямаршье гайхамаар юумэн үгы. Эсэстээ тэдэнэр хэһэн юумэнүүдэйнгээл үрэ дүнгые абаха.

Христоосой түлөө Павелай зоболго

16Хэншье намайе тэнэг байна гэжэ бү бодуужа гээд дахин дабтанаб. Харин тиигэжэ бодоо һаа, тэнэгтэхэ, бага зэргэ өөрөөрөө бахархаха боломжо үгыт даа. 17Тиигэжэ бахархахадаа, би Эзэнэй һанаһанаар бахархаагүй байһамни мэдээжэ, харин үнэхөөрөө тэнэг байһандал хэлэнэб. 18Олон зон уг гарбалаараа бахархадаг, тиин бишье тиигэжэл бахархахамни. 19Таанад өөһэдөө ехэл сэсэн ухаантай, тиин тэнэг үбэштэй зондо ехэл тэсэбэритэй байдаг ха юмта! 20Таанадые богоолшолходо, али ашаглахада, али мэхэлхэдэ, али дээрэһээтнай харахада, али нюурыетнай альгадахада, таанад үнэндөө тэсэбэритэй байдагта. 21Тиигэжэ өөһэдыгөө абажа ябадаг зөөлэн һуланууд байгаабди гэжэ эшэжэ хэлэнэб!

Хэрбээ бусадай өөһэдөөрөө бахархахаяа зүрхэлбэл, бишье зүрхэлнэб. Тиихэдээ минии тэнэг байһамни мэдээжэ. 22Тэдэнэр еврейнүүдбди гэнэ гү? Тиин бишье тиимэ хүмби. Тэдэнэр израильшууд гү? Тиин бишье тиимэ хүмби. Тэдэнэр Абраһаамай үри һадаһад гү? Тиин бишье тиимэб. 23Тэдэнэр Христоосой зарасанар гү? Тиихэдэ би тэдэнһээ үлүү һайн зарасань гээшэб. Тиигэжэ үбэштэйрһэндэл хэлэһэмни мэдээжэ. Би тэдэ зонһоо үлүү ехээр ажаллажа, бүри оло дахин түрмэдэ орооб, тоогүй оло дахин ташуурдуулан хэһээлгээд, үхэн алдааби. 24Иудейнүүд намайе табан удаа гушан юһэ дахин ташуурдаа. 25Гурба дахин намайе модоор сохёо, нэгэтэ һайса шулуудаа. Гурба дахин би кораблиин хүмэрилгэдэ орооб, нэгэтэ би нэгэ үдэрэй, нэгэ һүниин туршада далайн уһан соо байгааб. 26Оло дахин аяншалхадаа, би аюул оһолдо орожо байгааб: мүрэнүүдые гаталхадаа, дээрмэшэдтэй дайралдахадаа, өөрын яһатан зонтой һуухадаа, бусад яһатанаар байхадаа, хотодо ябахадаа, сүл губида ябахадаа, далайгаар тамархадаа, хуурмаг һүзэгтэнтэй уулзахадаа, аюул оһолдо орожо байгааб. 27Би ажаллажа, тулин зүдэржэ, нойро зүүдэгүйшье ябааб, үлэн хооһон, эдихэ хоолгүй, ууха ундагүйшье байгааб, хүйтэн нойтондо, нюсэгэн салдаганшье ябааб. 28Бусад юумэнүүдые тоолонгүй хэлэбэл, би бүхы һүзэглэгшэдэй бүлгэмүүдтэ һанаагаа табиха үдэр бүриин үүргэтэй хүм. 29Хэн нэгэнэй һулархада, бишье һуларһан шэнги байдагби. Хэн нэгэнэй хорхойтолгодо абтан нүгэл үйлэдэхэдэ, бишье тэрэнэй түлөө сухалдадагби.

30Хэрбээ бахархаха ёһотой байбал, минии һула байһыемни харуулһан юумэнүүдээр бахархахаб. 31Бурхан болон Эзэн Иисүүсэй Эсэгэ хэтын хэтэдэ үреэл магтаалда хүртэжэ байһай: хэзээшье худалаар хэлэдэггүй байһыемни Тэрэ мэдэхэ. 32Дамааскда байхадамни, Арээт хаанай захирагшань намайе барихын тула хотын хаалгые һахяа. 33Харин намайе ханада хэгдэһэн нүхөөр түрсүүг соо һуулгаад доошонь буулгаа юм. Тиигэжэ би зугадааб.