2Cor 12 | BxrBBL2024 | STEP | Һайрхахада ямаршье ашаг туһагүй байбашье, би һайрхаха ёһотойб. Зүгөөр мүнөө Эзэнэй элирүүлһэн үзэгдэл ба гэршэлгэнүүд тухай хэлэхэмни.

‏ 2 Corinthians 12

Павелай хараһан үзэгдэл

1 Һайрхахада ямаршье ашаг туһагүй байбашье, би һайрхаха ёһотойб. Зүгөөр мүнөө Эзэнэй элирүүлһэн үзэгдэл ба гэршэлгэнүүд тухай хэлэхэмни. 2 Арбан дүрбэн жэлэй саада тээ дээдын гурбадахи тэнгэридэ дэгдүүлэгдэһэн Христоосто һүзэглэгшэ хүниие би мэдэхэб. (Үнэхөөрөө тэрэ дэгдүүлэгдэһэн байгаа гү, али үзэгдэл хараа гү, би мэдэнэгүйб, гансал Бурхан тэрэниие мэдэхэ.) 3 Түрүүн хэлээшээрни тэрэ хүн үнэхөөрөө дэгдүүлэгдэһэн байгаа гү, али үзэгдэл хараа гү, би мэдэнэгүйб, гансал Бурхан тэрэниие мэдэхэ. 4 Зүгөөр тэрэ Диваажинда дэгдүүлэгдээд, тэндэ дуулгажа болохогүй хэзээшье хэлэгдээгүй юумэнүүдые соносоо гэжэ би мэдэнэб. 5 Тиимэһээ би тэрэ хүнөөр бахархахамни, харин өөрынгөө ахир һула байһанһаа бэшэ юумээр бахархахагүйб. 6 – 7 Хэрбээ бахархахаяа һанабал, би тэнэг бэшэ байха һэнби, ушарынь юуб гэбэл, би үнэн зүбые хэлэхэ һэнби. Харин би бахархахагүйб, юундэб гэбэл, минии хараһан олон үзэгдэлнүүдээр бэшэ, харин хэжэ байһан юумэнүүдээрни, хэлэжэ байһан үгэнүүдээрни хүнүүд нам тухай тухайлһай гэжэ бодоноб.

Агууехэ үзэгдэлнүүдые хараһанаараа бахархажа, дээгүүр үргэгдэхэгүймни тула бэендэмни үбшэнтэй хадхуур хадхаатай: сатанагай эльгээмэлдэл намайе хадхажа туляадаг юм. 8 Би энээн тухай Эзэндэ гурба дахин зальбарааб, тэрэ хадхуурые намһаа абажа хаяхыень гуйгааб. 9 «Минии үршөөл хайрал шамда яһала хангалтатай хүрэхэ, һүр хүсэн ахир һула байхада аргагүй һайнаар элирэн харагдадаг юм», – гэжэ Тэрэ намда харюусаа. Тиимэһээ би Христоосой хүсэ шадалаар дүүрэхын тулада ахир һула байһанаараа бахархаха ехэл дуратай байнаб. 10 Христоосой түлөө ахир һула байхадаа, доромжолуулхадаа, юумээр дутажа ябахадаа, хашуулан мүрдүүлхэдээ, зүдэржэ зобожо ябахадаа, би баяртай байдаг хүнби. Ушарынь юуб гэбэл, һулахан байхадаа би хүсэ шадалтай байдагби.

11 Би өөрыгөө тэнэг болгооб, зүгөөр тиигэһэмни таанадай зэмэ юм. Таанад нам тухай һайн үгэнүүдые хэлэхэ ёһотой байгаат. Би хэншье бэшэшье һаа, тэдэ «дээдын элшэнэрһээ» юугээрээшье дутанагүйб. 12 Танай дунда байхадаа, би бодото элшэн байһанаа баталан үсэд сухаришагүй байгааб, олон гайхамшагта үзэгдэлнүүдые, үйлэ хэрэгүүдые бүтээгээб. 13 Намда мүнгөөр туһалаагүйһөө гадна таанад бусад һүзэглэгшэдэй бүлгэмүүдһээ юугээр доро байгаабта? Таанадта ашаан болоогүй тэрэ гэмыемни хүлисөөрэйт даа.

Павел Коринфын һүзэглэгшэдтэй гурбадахияа уулзана

14 Гурбадахияа таанадтай ошожо уулзахаяа би бэлэн байнаб, тиихэдээ ашаан болохогүйб. Би алта мүнгэндэтнай һанаарханагүйб, харин өөһэдыетнай бэдэрнэб. Үхибүүд аба эжыдээ алта мүнгэ суглуулха бэшэ, харин аба эжынь үхибүүдтээ суглуулжа байха ёһотой. 15 Би өөрыгөө, намда байһан юумээ дууһан баяртайгаар таанадай түлөө үрихэ байнаб. Минии таанадта аргагүй ехээр дуратай байхада таанад намда багаар дуратай байха аалта?

16 Таанадта ашаан болоогүйб, тэрэ тон зүб, гэхэтэй сасуу мэхэ гохо гарган, хууран таанадые гартаа оруулааб гэжэ хэлэхэдээ болохот. 17 Таанадта ябуулһан хүнүүдэй гараар таанадһаа ашаг олзо олодог һэн гүб? 18 Таанадта Титэй ошохые гуйгаа һэнби, тэрээнтэй хамта нэгэ һүзэглэгшэ дүүгээ ябуулааб. Тит таанадһаа ашаг олзо олоо гү? Тит бидэ хоёр нэгэ һүлдөөр хүтэлүүлэн, нэгэ замаар ябадаг һэмди.

19 Таанадай урда бэеэ хамгаалнабди гэжэ ман тухай таанад саг үргэлжэ бодонот гэжэ би мэдэнэб. Бидэ Бурханай урда Христоосой маанадһаа дуулаха дуратай юумыел хэлэнэбди. Инаг хайрата аха дүүнэрни, маанадай бэшэжэ байһан юумэнүүд таанадайл аша туһада бэшэгдэнэ. 20 Таанадта ошоходоо, бидэ бэе бэедээ урмаа хухарна гүбди гэжэ һэргылнэб. Таанадай дунда хэрүүл ама, атаа жүтөө, уур сухал, хэрэлдээ, хардалга, хоблолго, омогорхолго, журамгүй байдал гараагүй аабза гэжэ айнаб. 21 Дахинаа таанадта ошоходомни, таанадай урда намайе Бурхамни эшээхэгүй аал, тиин урдань нүгэл шэбэлдэ унаад, хэһэн бузар муухай ябадалнуудаа, зальхайралга забхайралгаяа, ташаяан хурисалаа орхижо гэмшээгүй хүнүүд тухай би шаналан уйлахагүй аалби гэжэ айн болгоомжолноб.