2Cor 2 | BxrBBL2024 | STEP | Тиимэһээ гашуудхагүйнтнай тула би дахин таанадта ошохогүйб гэжэ шиидээб.

‏ 2 Corinthians 2

1 Тиимэһээ гашуудхагүйнтнай тула би дахин таанадта ошохогүйб гэжэ шиидээб. 2 Хэрбээ таанадые дахин гомдохооболни, намайе баярлуулха хүн танай дунда дахин олдохогүйл. 3 Дахин ошоод, намайе баярлуулха ёһотой хүнүүдһээ гашуудаха дурагүй байһандаал би түрүүн бэшэһэн байгааб. Минии баяртай байхада таанадшье булта баяртай байдагта гэһэн хатуу этигэлтэй байнаб. 4 Гашуудан голхорхынтнай тула бэшэ, харин аргагүй ехээр дуратай байһанаа мэдүүлхын тула би ехэл һанаа зобон, ехэл нулимсаа гоожуулан, таанадта бэшээб.

Гомдохоогшые хүлисэгты

5 Хэрбээ хэн нэгэн намайе гомдохообол, тэрэ хүн намһаа үлүү ехээр таанадые бултыетнай гомдохоогоо гэжэ хэлэбэл хэтэрүүлхэгүйб. 6 Тиимэ хүниие хэһэн аргаарнь лэ олонхинойтнай хэһээбэл, болохо. 7 Зүгөөр тэрэ нүхэрөө аргагүй ехээр уйдажа, сэдьхэлээрээ унахагүйнь тула хүлисөөд, һанааень заһабалтнай, таанадта дээрэ байха. 8 Үнэн дээрээ тэрээндээ дуратай байһанаа мэдүүлхыетнай таанадһаа гуйнаб. 9 Туршалгануудые хэр дабахатнай гээшэб, хэлэһэн юумэнүүдыемни ходо дүүргэхэтнай гү гэжэ харахын лэ тула би бэшээ хүнби. 10 Хэрбээ хэһэн муу юумэнэйнь түлөө хүниие хүлисэбэлтнай, бишье тэрэниие хүлисэнэб. Христоосой урда таанадай аша туһада хүлисэхэ ёһотой бүхы юумые би хүлисэнэб. 11 Тиигэбэл сатана маанадые мэхэлжэ шадахагүй. Бидэ булта тэрэнэй һанал бодолыень һайн мэдэнэ ха юмди.

12 Христоос тухай һайн мэдээсэл номнохоёо Троада хото ерэхэдэмни, Эзэн бүхы хэрэгүүдтэмни урагшатай байгаа. 13 Гэхэтэй сасуу, тэндэ Тит дүүгээ оложо ядахадаа, би ехээр һанаа зобооб. Тиимэһээ тэндэхи зондо баярлаһанаа мэдүүлээд, Македони ошооб. 14 Христоостой хамтарһан маанадые илалтада хүргэжэ байдаг Бурханда баяр баясхалан хүргэнэб. Бурхан баһал Христоос тухай мэдээе хангалтай хоншуу үнэртэл адляар хаа хаанагүй маанадаар дамжуулан тараадаг. 15 Ушарынь юуб гэхэдэ, бидэ абарагдажа болон хосоржо байһан зоной дунда Бурханай һанаашалһанаар Христоосой хангалынь болонобди. 16 Хосорһон зондо тэрэ хангал бузар үнэртэй байжа, үхэлдэ хүргэдэг, харин абарагдаһан зондо тэрэ хангал һайхан үнэртэй байдаг, амидарал үршөөдэг. Тиимэһээ хэн иимэ үүргэ гүйсэдхэхөөр бэлэн бэ? 17 Бидэ Бурханай мэдээсэл номнон өөһэдтөө олзо олодог хүнүүдтэл адли бэшэбди. Бидэ үнэн шударгаар ажалдагбди. Юундэб гэбэл, Бурхан бидэниие эльгээгээ, Бурхан манай гэршэ, тиин бидэ Христоосой зарасанарбди.