‏ 2 Corinthians 3

Шэнэ Хэлсээнэй зараса

1Бидэ дахин өөһэдыгөө таанадта танилсуулха болоно гүбди? Али зарим хүнүүдтэ адляар бидэ өөһэд дундаа зүбшөөһэн танилсуулгын бэшэгүүдые харуулха ёһотой гүбди? 2Таанад өөһэдөө бүхы хүнүүдтэ уншаха ойлгохоор манай сэдьхэлдэ бэшэгдэһэн бэшэг гээшэт. 3Христоосой Өөрөө энэ бэшэг бэшээд маанадаар дамжуулһаниинь эли байна. Энэ бэшэг бэхээр бэшэ, харин амиды Бурханай Һүлдөөр бэшээтэй, шулуун хабтагайнууд дээрэ бэшэ, харин хүнүүдэй сэдьхэлдэнь бэшээтэй.

4Бидэ эдэ бүхэн үнэн зүб байна гэжэ Бурханай урда Христоосой ашаар бата этигэлтэй байнабди. 5Энэ ажал бүтээхэ аргатайбди гэжэ бидэ өөрынгөө нэрэһээ баталха эрхэгүйбди. Бурхан лэ бидэндэ тиимэ арга боломжо үгэдэг. 6Тэрэл Бурхан бэшээтэй Хуули дээрэ бэшэ, харин Арюун Һүлдэ дээрэ һуури татаһан Шэнэ Хэлсээнэй зарасанар байха боломжо бидэндэ олгоо. Юундэб гэхэдэ, Хуули үхэл асардаг, харин Һүлдэ амидарал үршөөдэг.

7Шулуун хабтагайнууд дээрэ үзэгүүдээр Хуули һиилэхэдэнь, тэндэнь Бурханай алдар толороо, Израилиин арадай харахын аргагүй һаргама гэрэлээр Моисейн нюурынь гэрэлтээ. Үхэл асардаг Хуули хүсэндөө байхадаа иимэ ехэ алдар үзүүлдэг байбал, 8Һүлдэһөө эхитэй юумэн бүришье ехэ алдартай байха бэшэ аал? 9Гэмнэлгэдэ хүргэжэ байһан юумэнэй алдартай байбал, үнэн зүб тээшэ хүтэлһэн ябадал бүришье ехэ алдартай байха бэшэ аал? 10Анхан алдартай байһан юумые мүнөөнэй тон һаргама алдартай сасуулбал, тэрэ ямаршье алдаргүй гэжэ хэлэхэдэ болохо. 11Саг зуура оршодог юумэнэй алдартай байбал, хэтын хэтэдэ оршодог юумэн бүришье ехэ алдартай байха бэшэ аал?

12Иимэ эрхим һайн найдалгатай байхадаа бидэ ехэл зоригтой байнабди. 13Ойр зуурын һүр жабхалангай буурахые Израилиин арадай харахагүйн тула бидэ нюураа бүдөөр хааһан Моисейдэл адли бэшэбди. 14Үнэхөөрөө тэдэ зоной ухаан бодолынь хаалтатай байгаа. Манайшье үдэрнүүд хүрэтэр Хуушан Хэлсээе уншахадань, үнөөхи хушалтань абтаагүй байна. Гансал Христоос тэрэ хушалтые абаха аргатай. 15Мүнөөдэршье, тэдэнэй ямаршье сагта Моисейн Хуули уншахадань, зүрхэ сэдьхэлынь үшөөл хаалтатай байдаг. 16Зүгөөр тэрэ хушалта хүнэй Эзэндэ хандаһан лэ сагтань абтажа хаягдадаг. 17Эзэн – Һүлдэ мүн, тиин Эзэнэй Һүлдын оршожо байһан газарта эрхэ сүлөө бии. 18Тиимэһээ бидэ булта халхалагдаагүй нюураараа Эзэнэй алдарые харанабди. Эзэнэй Һүлдэ Эзэнэй алдарта бүри ойртуулан маанадые хубилгана.
Copyright information for BxrBBL2024