‏ 2 Corinthians 4

Шабар домбо соо байһан баялиг

1Бурханай үршөөл хайраар бидэ иимэ ажал хэнэбди, тиихэдээ урмаа хухарнагүйбди. 2Бидэ нюужа байхаар эшхэбтэр хэрэгүүдые хэхэеэ болёобди, хүниие мэхэлхэ хуурахаяа гү, али Бурханай үгэ хазагайруулхаяа оролдоногүйбди. Үнэн зүб тухай айладхажа байһыемнай Бурхан гэршэлхэ. Тиимэһээ маанадта этигэжэ найдажа болохо юм. 3Хэрбээ манай номножо байһан Һайн Мэдээсэл далда байгаа һаа, тэрэ гансал хосоржо байһан зондо далда байха. 4Һүзэглэдэггүй зоной ухаан бодолыень энэ дэлхэйе захиржа байһан нүгэлтэ бурхан харанхы мунхагаар хушаа, тиимэһээ тэдэ балар һохор зон Бурханай дүрэнь болохо Христоосой алдар тухай һайн мэдээсэлһээ сасарһан гэрэл туяае хараха аргагүй байгаа. 5Бидэ өөһэдыгөө айладханагүйбди, харин Иисүүс Христоосые Эзэн гэжэ, бидэ Иисүүсэй аша туһада танай зарасанарбди гэжэ номнонобди. 6«Гэрэл туяагай харанхыһаа гэрэлтэхэнь болтогой», – гэжэ Бурхан хэлээ. Мүнөө тэрэл Бурхан манай сэдьхэлдэ гэрэлтэжэ, Христоосто оршожо байһан Бурханай алдарай мэдээгээр бидэниие гэгээрүүлээ.

7Бидэ энэ баялиг хадагалһан шабар домбонуудта адли хүмди. Тиимэһээ бодото һүр хүсэн маанадһаа бэшэ, харин Бурханһаа эхи абадаг. 8Бидэ оло дахин хашуулан зобонобди, гэхэтэй сасуу дарагдаагүйбди. Юу хэхэеэ мэдэхэеэшье болёод байхадаа, бидэнэр урмаа хухардаггүйбди. 9Бидэниие мүрдэбэшье, бидэ нүхэдгүй үлэдэггүйбди. Даруулбашье, бидэ үхөөгүйбди. 10– 11Иисүүсэй амидаралай маанад соо элирхэйлэгдэхын тула бидэ Тэрэнэй түлөө үдэр бүхэн үхэлтэй ушардагбди. Иисүүсэй амидарал манай богони гэнэн амидаралда харагдажа байхын тула бидэ амиды зон Тэрэнэй түлөө үхэлтэй ходо ушардагбди. 12Энэнь үхэл маанад соо, харин амидарал таанад соо ажаллана гэһэн удхатай юм.

13«Би хэлээшье һаа, этигэһэн зандааб», – гэжэ Нангин Бэшэг соо бэшээтэй байдаг. Бидэ тэрэл һүзэгэй һүлдэтэй байжа һүзэглэһэндөө хэлэнэбди. 14Эзэн Иисүүсые амидыруулһан Бурхан Иисүүстэй хамта бидэниие амидыруулха, тиигээд та бидэниие Өөрынгөө урда байлгаха гэжэ бидэ мэдэнэбди. 15Эдэ бүхэн таанадай аша туһада хэгдээ. Тиигэжэл бүри олон зоной Бурханиие магтажа, алдарыень дуудаһан ушарһаань Бурханай үршөөл хайра элбэгжэжэл байха.

Һүзэг этигэлээрээ амидаралга

16Иимэһээл бидэ хэзээшье урмаа хухардаггүйбди. Бэемнай хуушаржа байбашье, досоогоо үдэрһөө үдэртэ бидэ шэнэлнэбди. 17Тиимэ ойро зуурын бэрхэшээл зоболонгууд маанадта угаа ехэ мүнхын алдар асардаг. 18Харагдадаг юумэнүүд саг лэ зуура оршодог, харин харагдадаггүй юумэнүүд хэтын хэтэдэ оршодог. Тиимэһээл бидэ харагдадаг юумэнүүдтэ бэшэ, харин харагдадаггүй юумэнүүдтэ анхаралаа хандуулнабди.
Copyright information for BxrBBL2024