‏ 2 Corinthians 5

1Энэ дэлхэйн майхан – манай бэе – һүнэн һандарбал, Бурхан бултандамнай хүнэй гараар бодхоогдоогүй, тэнгэридэ хэтын хэтэдэ оршожо байха гэр үгэхэ гэжэ бидэ мэдэнэбди. 2Тэрэ тэнгэриингээ гэртэ ажамидарха дуратай байһан дээрэһээ бидэ энэ дэлхэйдэ байха сагтаа ёолонобди. 3Бидэ тэрэ гэрээ хубсаһандал адляар өөр дээрээ нэмэрээд, нюсэгэн байхагүйе хүсэнэбди. 4Энэ бэеын майханда ажамидарха сагтаа бидэ дарлалтада ороод байһантай адли ёолонобди. Өөһэдынгөө бэе орхихо дуратай байһандаа бэшэ, харин тэнгэриин амидаралда хүртэхэ дуратай байһандаа тиигэжэ ёолонобди. Тиигэжэ үхэлые амидарал залгиха. 5Бурхан бидэниие эгээл тэрэ хубилалгада бэлдээд, хэхэ юумэеэ баталан маанадта Өөрын Һүлдые үгөө. 6Тиимэһээ бидэ ходо урма зоригтой байдагбди.

Бэе соогоо байха сагтаал бидэ Эзэнһээ холо байһанаа мэдэнэбди. 7Бидэ хаража байһан юумэндэ бэшэ, харин һүзэг этигэлдэ найдан ажамидарнабди. 8Бидэ зоригтой байнабди, эдэ бэенүүдээ орхёод, Эзэнтэй гэртэнь байха дуратай байнабди. 9Тиимэһээ эндэхи гэртээ байха сагтаашье, Бурханай тэнгэриин гэртэ байха үедөөшье бидэ бүхы хүсэ шадалаараа Тэрээндэ һайшаагдаха гэжэ оролдодогбди. 10Газар дэлхэй дээрэ ябахадаа муу, һайн юумэ хэһэнэйнгээ түлөө шүүлгэхын тула бидэ булта Христоосой зарга шүүбэридэ орохо ёһотойбди.

Бурхантай эбээ нэгэдэлгэ

11Эзэнһээ айн һүрдэхэнь ямар удхатайб гэжэ мэдэжэ байгаад, бидэ бусад зониие Тэрээндэ хандахаар идхаха гэжэ оролдонобди. Бурхан бидэниие бүрин мэдэхэ, тиин таанадшье бидэниие ямархан хүнүүд байһыемнай һайн мэдэнэт гэһэн найдалтай байнаб. 12Дахин өөһэдыгөө таанадта танилсуулха гэжэ бидэ бодоногүйбди. Харин маанадаар омогорхохо шалтаг таанадта үгэнэбди. Тиимэһээ таанад хүнүүдэй зосоохи байдалаар бэшэ, харин газаахи түхэл шэнжээр омогорходог хүнүүдтэ харюу үгэжэ шададаг байхат. 13Хэрбээ хэн нэгэнэй бидэниие ухаагаараа балартаа гэжэ һанабал, бидэ Бурханай аша туһада тиигээбди. Хэрбээ һаруул бодолтой байбал, таанадай аша туһада тиимэ байдагбди. 14Маанадые Христоосой хайра дуран захирна, тиин хүн бүхэнэй түлөө нэгэ хүнэй үхэбэл, тэрэ үхэлыень хүн бүхэн хубаалсана гэжэ бидэ мэдэнэбди. 15Бүхы хүнүүдэй түлөө Тэрэ үхөө. Тиимэһээ амиды байһан хүнүүд өөһэдынгөө түлөө ажамидарха бэшэ, харин тэдэнэй түлөө үхөөд, амидырһан Христоосойл түлөө ажамидарха ёһотой.

16Тиимэһээ бидэ энэ сагһаа эхилээд, хэнииешье энэ дэлхэйн заргаар бү шиидхэе. Нэгэтэ бидэ Христоосые энэ дэлхэйн заргаар шиидхэһэн байгаабди, мүнөө тиигэхэеэ болёобди. 17Христоостой нэгэдэһэн хүн бүхэн шэнэ хүнүүд гээшэ: урданай юумэнүүд һүнэгдөөд, бүхы юумэн шэнэдхэгдэбэ. 18Эдэ бүхы юумэнүүдые Бурхан бүтээгээ. Тэрэ маанадтай эбээ нэгэдхүүлхын тула Христоосые эльгээгээ, тиин эб нэгэдхүүлхэ тухай номнохые маанадта даалгаа. 19Бурхан Христоос соо оршожо, энэ дэлхэйн зонтой эбээ нэгэдхээ, нүгэлнүүдыень хүлисөө. Тиигээд эб нэгэдхэхэ тухай мэдээсэлээ маанадта даалгаа.

20Бидэ Христоосой бүрин эрхэтэ түлөөлэгшэд мүн, тиин Бурхан бидэнэрээр дамжан таанадта хандана. Бурхантай эбээ нэгэдхэгты гэжэ бидэ Христоосой нэрээр таанадые гуйнабди. 21Бурхан маанадай түлөө ямаршье нүгэлгүй байһан Христоосто манай нүгэлнүүдые ашаа. Тиигэжэ бидэ Христоостой нэгэдэн, Бурханда зохистой болообди.
Copyright information for BxrBBL2024