2Cor 8 | BxrBBL2024 | STEP | Аха дүүнэрнай, Бурханай үршөөл хайра Македониин һүзэглэгшэдэй бүлгэмүүдтэ ямар юумэ бүтээһые таанадта дуулганабди.

‏ 2 Corinthians 8

Иерусалимай һүзэглэгшэдтэ туһаламжа

1 Аха дүүнэрнай, Бурханай үршөөл хайра Македониин һүзэглэгшэдэй бүлгэмүүдтэ ямар юумэ бүтээһые таанадта дуулганабди. 2 Тэдэнэр бэрхэшээл зоболонгуудаар ехэтэ туршуулһаншье һаа, аргагүй ехэ баяртай байдаг. Тэдэнэр үгытэй ядуушье һаа, үгэхэдөө аргагүй баян бардам юм. 3 Тэдэнэр шадаха зэргээрээ, бүри шадахаһаа үлүү ехээр үгөө гэжэ би гэршэлнэб. Өөһэдынгөө һайн дураар тиигээ. 4 Иерусалимай һүзэглэгшэдтэ туһалха һанаатайгаар тэдэнэр маанадые аргагүй ехээр гуйһан байна. 5 Тэдэнһээ хүлеэжэ найдажа байһанһаамнай үлүү юумэ тэдэнэр хээ. Тэдэнэр өөһэдыгөө түрүүн Эзэндэ үргэбэ, һүүлдэнь Бурханай эрхэ хүсэлөөр маанадташье үргэбэ. 6 Тиимэһээ бидэ танайда хэжэ эхилһэн буянта ажалые түрүүн түгэсыш даа гэжэ Титые гуйбабди. 7 Таанад һүзэг этигэлээрээ, үгэ хүүрээрээ, мэдэлгээрээ, оролдосоороо, маанадта хандуулһан хайра дураараа аргагүй баян бардам хүнүүд гээшэт. Тиимэһээ энэшье үлзы һайн ажалаа хэнһээшье үлүү һайнаар дүүргэхыетнай хүсэнэбди.

8 Би таанадые захирнагүйб, гэхэтэй сасуу бусад зоной аргагүй ехээр туһалха дуратай байһые харуулан, хайра дурантнай гүнзэгы аа гү гэжэ туршанаб. 9 Таанад манай Эзэн Иисүүс Христоосой үршөөл хайрые мэдэнэт. Тэрэ баян байһан аад, танай аша туһада үгытэй ядуу болоо. Өөрынгөө үгытэй ядуу байдалаар Тэрэ таанадые баяжуулаа.

10 Таанадтай һаналаараа хубаалсахамни. Үнгэрһэн жэл эхилһэн юумэеэ мүнөө дүүргэбэлтнай, һайн лэ байха һэн. Таанад гансал хэхэдээ бэшэ, харин хэхэ гэжэ шиидэхэдээшье эхи табигшад һэнта. 11 Харин мүнөө ажалаа гүйсэдхэгты. Шадаха зэргээрээ туһаламжа хүргэбэл, үгэхэл гэжэ байһанаа үгэбэт гэжэ баталхат. 12 Туһалхые аргагүй хүсэжэ байбал, өөһэдтөө байхагүй юумэнһээ бэшэ, харин байһан юумэнһээ үгэхэт гэжэ Бурхан хүлеэнэ ха юм.

13 Би танай ажамидарал хүшэр хүндэ болгон, бусад зоной ажамидарал хүнгэлхэ гэжэ оролдоногүйб, харин нэгэ жэгдэ байлгахын тула тиигэнэб. 14 Мүнөө сагта таанадта элбэг дэлбэг байһан юумэн дуталдажа байһан зониие дэмжэхэ, харюудань тэдэ зон үлүү юумэтэй болоходоо, дуталдахадатнай, таанадтай хубаалсаха. Тиигэжэ булта нэгэ жэгдэ байха. 15 «Ехые суглуулһан хүн үлүү юумэгүй байгаа, багые суглуулһан хүн дутагдалгүй байгаа», – гэжэ Нангин Бэшэг соо бэшээтэй байдаг.

Тит ба тэрээнтэй хамта ажаллагшад

16 Бидэндэл адляар таанадта һанаагаа табиха боломжо Тидтэ олгоһон Бурханда баяр баясхалан хүргэнэб. 17 Тэрэ гансал манай гуйлтаар бэшэ, харин таанад тухай аргагүй бодожо байһан ушарһаа өөрынгөө һайн дураар таанадта ошохо гэжэ шиидээ. 18 Тэрээнтэй хамта бидэ Һайн Мэдээсэл номноһонойнгоо түлөө бүхы һүзэглэгшэдэй бүлгэмүүдтэ магтаалда хүртэжэ байһан һүзэглэгшэ дүүгээ ябуулнабди. 19 Тэрээнһээ гадна һүзэглэгшэдэй бүлгэмүүд тэрэ хүниие замаймнай нүхэр боложо, буянта хэрэгээ бүтээхэдэмнай маанадта туһалхаар һунган табяа юм. Энэ ажалаа бидэ Эзэнэй алдарай тулада ба Иерусалимда ажамидардаг Тэрэнэй хүнүүдтэ аргагүй ехээр туһалха дуратай байһанаа баталан дүүргэнэбди.

20 Маанадта даалгаһан элбэг баян үргэлэй түлөө хэншье маанадые шүүмжэлхэгүйн тула бидэ тэрэниие эльгээнэбди. 21 Ушарынь хэлэхэдэ, бидэ гансал Бурханай урда бэшэ, харин хүнүүдэй урда үнэн зүб юумэ хэхэ гэжэ оролдонобди.

22 Үнөөхи хоёр дүүнэрһээ гадна бидэ оло дахин туршуулһан, таанадта аргагүй этигэжэ байһан дээрэһээ тон ехээр туһалха дуратай үшөө нэгэ дүүгээ ябуулнабди. 23 Тит тухай хэлэбэл, тэрэ минии нүхэр, намтай хамта таанадта туһалдаг юм. Тэрээнтэй ябаһан нүгөө һүзэглэгшэ дүүнэр тухай хэлэбэл, тэдэнэр һүзэглэгшэдэй бүлгэмүүдэй түлөөлэгшэд, Христоосые алдаршуулагшад гээшэ. 24 Тиимэһээ һүзэглэгшэдэй бүлгэмүүдэй мэдэжэ байхаарнь тэдэндэ өөһэдын энэрэл хайрые харуулагты, манай бахархал байһанаа баталагты.