‏ 2 Kings 13

(2 Уг 24:23-27)

Израилиин хаан – Ёахааз

1Ахазияагай хүбүүн Иудын хаан Ёһаашай хорин гурбан жэлдэ хан түрэеэ засаглажа байхада, Еһүүгэй хүбүүн Ёахааз Самарида Израилиин хаан болобо. Тэрэ арбан долоон жэлдэ хан түрэеэ засаглаба. 2Тэрэ Израилиие нүгэлтэ зам уруу хүтэлбэрилһэн Набаадай хүбүүн Еробоһаамай үйлэдэжэ хэһэн хэрэг ябуулгануудые үргэлжэлүүлбэ. 3Тиихэдэнь Эзэн Израильда сухалдаад, тэрэниие Араамай хаан Хазаһээлэй ба Хазаһээлэй хүбүүн Бэн-Һадаадай гарта удаанаар үгэбэ.

4Ёахааз туһа эрижэ, Эзэндэ мүргэбэ. Эзэн тэрэнэй гуйлтые дуулаба. Тиигээд Тэрэ Араамай хаанай Израилиие зобоохыень хараба. 5Эзэн Израилиие абархын түлөө абарагшые эльгээжэ, израильшуудые Араамай дарлалтаһаа сүлөөлбэ. Тиихэдэнь израильшууд урдандаа байһан шэнги өөһэдынгөө орон нютагта амгалан тайбан ажаһуудаг болобо. 6Гэбэшье израильшуудые нүгэлтэ зам руу хүтэлбэрилһэн Еробоһаамай гэр бүлэ нүгэл хэхэеэ болибогүй. Самаридахи Ашэраагай бахана модон тэрэл зандаа үлөөбэ.

7Ёахаазай сэрэгүүд үгы хэгдэбэ: оройдоол табин морито сэрэгшэд, арбан дайшалхы тэргэ, арба мянган ябаган сэрэгшэд үлэбэ. Араамай хаан израильшуудые үй бута сохижо, харгын тооһон мэтээр тэдэниие дэбһэжэ байба.

8Ёахаазай хэһэн бусад хэрэгүүд болон эрэлхэг баатаршалганууд тухай «Израилиин хаашуулай түүхын ном» соо бэшээтэй юм. 9Ёахааз наһа бараба. Тэрэниие Самариин булашадахи үбгэ эсэгэнэртэйнь зэргэлүүлжэ хүдөөлүүлбэ. Тэрэнэй хүбүүн Ехоһааш эсэгынгээ орондо хаан болобо.

Израилиин хаан – Ехоһааш

10Иудын хаан Ёһаашай гушан долоон жэлдэ хан түрэеэ засаглажа байхада, Ёахаазай хүбүүн Ехоһааш Самарида Израилиин хаан болобо. Тэрэ арбан зургаан жэлдэ хан түрэеэ засаглаба. 11Тэрэ Эзэнэй дура гутаадаг харата хэрэгүүдые үйлэдэдэг байба. Тэрэ израильшуудые нүгэлтэ ябадалнуудта түлхиһэн Набаадай хүбүүн Еробоһаамай нүгэл шэбэлһээ зайсангүй, тэрэ нүгэлтэ ябадалнуудые үргэлжэлүүлбэ.

12Ехоһаашай хэһэн бусад агууехэ хэрэгүүд (Иудын хаан Амацияатай дайлалдалга), тэрэнэй баатаршалганууд тухай «Израилиин хаашуулай түүхын ном» соо бэшээтэй юм. 13Ехоһааш үбгэ эсэгэнэртэеэ хамта булаша бунханда нойрсобо. Еробоһаам тэрэнэй хан шэрээе эзэлбэ. Ехоһааш Самариин булашада Израилиин хаашуултай хамта хүдөөлүүлэгдэбэ.

Элишаагай наһа баралга

14Элишаа үбшэлөөд, арай амиды хэбтэбэ. Тиихэдэнь Израилиин хаан Ехоһааш тэрэниие эрьежэ ерэмсээрээ, тэрэнэй дээрэнь тонгойгоод:

– Эсэгэ минии! Эсэгэ минии! Израилиин дайшалхы тэргэнүүд тантай хахасаха дурагүйл, – гэжэ шаналан уйлаба.

15– 16– 17Элишаа тэрэнэй гар дээрэ гараа табяад:

– Һурша ном, годли аба, – гэжэ гуйба.

Ехоһааш һурша ном годли хоёрые абаба.

– Мүнөө ши зүүн сонхо нээ, – гэжэ Элишаа гуйба.

Ехоһааш тэрэ гэрэйнь зүүн сонхо нээбэ.

– Һурша номой хүбшэргэйе татаад, нээлтэтэй сонхоор харба, – гэжэ Элишаа гуйба.

Ехоһааш харбаба.

Элишаа тэрээндэ иигэжэ хэлэбэ: – Энэ годли Эзэнэй илалта!
Энэ годли Араамые диилэлгын илалта!
Ши араамшуудые Апээгтэ бултыень үгы хэхэш!

18Тиигээд Элишаа Израилиин хаанда дахин хандажа:

– Харбаһан годлиёо аба, – гэжэ гуйба.

Ехоһааш харбаһан годлиёо абаба.

– Тэрээгээрээ газар сохи! – гэжэ Элишаа гуйба.

Ехоһааш тэрэ годлёор гурба дахин газар сохибо.

19Бурханай хүн сухалдаад:

– Хэрбээ ши таба-зургаа дахин газар сохёо һаа, араамшуудые бултыень алаха байгааш. Харин мүнөө ши араамшуудые гурба дахин диилэхэш, – гэжэ хэлэбэ.

20Элишаа наһа бараба. Тэрэниие хүдөөлүүлбэ.

Тэрэ сагта үй түмэн моһаабууд жэл бүхэндэ дайгаар добтолон орожо, израильшуудые намнадаг байба. 21Нэгэтэ ямар нэгэ хүниие хүдөөлүүлжэ байһан хүнүүд моһаабуудай бүлэг сэрэгшэдые хараад, тэдээнһээ айһан һүрдэһэнһөө боложо, тэрэ хүнэйнгөө үхэһэн бэеые Элишаагай агы нүхэн хуурсагта хаяад, тэрьедэн гүйлдэшэбэ. Тиихэдэнь үхэһэн тэрэ хүнэй бэе Элишаагай араг яһануудые дайража амидыраад, хүл дээрээ бодошобо.

Израиль Араамтай дайлалдана

22Ёахаазай хан түрэеэ засаглажа байхада, Араамай хаан Хазаһээл дайгаар добтолжо, Израилиие дарамталжа байба. 23Теэд Эзэн Абраһаам, Исаак болон Яковтай үнэн сэхэ байха тухай хэлсээ баталһанаа гэршэлжэ, израильшуудые хайрладаг, тэдэнэй хэһэн гэм зэмые хүлисэдэг байба. Тиимэһээ тэрэ үе сагта Эзэн израильшуудые эсэслэн үгы хэхэ гэжэ Өөрһөө үшөө холо болгобогүй. 24Араамай хаан Хазаһээл наһа бараба. Тэрэнэй хүбүүн Бэн-Һадаад хаан болобо. 25Тиихэдэнь Ёахаазай хүбүүн Ехоһааш Хазаһээлэй булимтаран абаһан хотонуудые тэрэнэй хүбүүн Бэн-Һадаадһаа дайгаар бусаажа абаба. Ехоһааш араамшуудта гурба дахин дайгаар добтолжо, тэдэниие үй бута сохёод, Израилиин хотонуудые бусааба.