‏ 2 Kings 1

Элияа ба Израилиин хаан Ахазияа

1Ахаабай наһа бараһанай һүүлдэ моһаабууд Израилиин урдаһаа эсэргүүсэн бодобо.

2Ахазияа Самаридахи өөрынгөө ордоной дээдэ дабхарһаа унажа, хэрэлсынгээ тохойлуур эбдэжэ бэрхэтээд, «Энэ бэрхэтэлгэһээ һайжарха гүб гэжэ Экрооной бурхан Баалзэбүүлһээ һурагты» гэһэн даабаритайгаар элшэдээ эльгээбэ. 3Эзэнэй Эльгээмэл Самариин хаанай элшэдые угтаха ба иигэжэ асууха захиралта Тишбиигэй Элияада үгэбэ: «Израильда Бурхан үгы юм аал? Экрооной шүтөөн Баалзэбүүлһээ үршөөл хайра һураха гэжэ юундэ ерэбэ гээшэбта? 4Эзэн иигэжэ айладана: ши хэбтэһэн оронһоо буунгүй үхэхэш!» Элияа тэдэнэй урдаһаа ошобо.

5Хаанай элшэнэр хаандаа бусабад.

– Таанад юундэ бусабат? – гэжэ хаан асууба.

6Тэдэнэр иигэжэ харюусабад:

– Бидэнэй урдаһаа нэгэ хүн угтажа гараад: «Таанадые эльгээһэн хаандаа бусагты. Эзэн иигэжэ айладана гээд дамжуулагты: „Израильда Бурхан үгы юм аал? Ши Экрооной шүтөөн Баалзэбүүлһээ үршөөл хайра гуйхаяа эдэ элшэдээ намда эльгээбэ гүш? Ши энээнэйнгээ түлөө оронһоо буунгүй үхэхэш!“» – гэжэ хэлээ.

7Хаан тэдээнһээ иигэжэ асууба:

– Таанадые угтагша, эдэ бүгэдые хэлэгшэ хүн ямар түхэлтэй байгааб?

8Тэдэнэр иигэжэ хаанда харюусабад:

– Тэрэ хүн хониной арһан дэгэлтэй, бэлхүүһэндээ һур бүһэ бүһэлһэн байгаа.

– Тэрэ Тишбиигэй Элияа, – гээд хаан 9тэрээн руу табитын даргые табин сэрэгшэдтэйнь хамта эльгээбэ.

Табитын дарга хадын орой дээрэ һууһан Элияада ерэбэ.

– Бурханай хүн, – гэжэ тэрэ Элияада хандаба. – Доошоо буу гэжэ хаан шамда захирна!

10Элияа тэрээндэ иигэжэ хэлэбэ:

– Хэрбэеэ би Бурханай хүн байбални, гал тэнгэриһээ буужа, шамайе болон шинии табин сэрэгшэдые үнэһэн шандаруу болотор шатааг!

Гал тэнгэриһээ буужа, тэрэниие болон тэрэнэй табин сэрэгшэдые үнэһэн шандаруу болотор шатааба. 11Хаан ондоо табинай даргые табин сэрэгшэдтэйнь хамта Элияада дахин эльгээбэ.

Тэрэ сэрэгэй дарга Элияада ерээд:

– Бурханай хүн! Түргэн доошоо буу гэжэ хаан шамда захирна, – гэбэ.

12Элияа тэрээндэ иигэжэ хэлэбэ:

– Хэрбэеэ би Бурханай хүн байбални, гал тэнгэриһээ буужа, шамайе табин сэрэгшэдтэйшни хамта үнэһэн шандаруу болотор шатааг!

Бурханай гал тэнгэриһээ буужа, тэрэниие табин сэрэгшэдтэйнь хамта үнэһэн шандаруу болотор шатааба.

13Хаан гурбадахи табинайнгаа даргые табин сэрэгшэдтэйнь хамта тэрээндэ эльгээбэ. Тэрэ дарга үндэрлиг өөдэ гаража, Элияагай урда үбдэглэн һуугаад:

– Бурханай хүн! Минии ба танай барлагуудай – энэ табин зоной ами наһые хайрлыт! 14Тэнгэриһээ бууһан гал түрүүшын хоёр табитын даргые сэрэгшэдтэйнь хамта үнэһэн шадаруу болотор шатаагаа. Харин мүнөө та минии амиды мэндэ ябахые үршөөгыт! – гэжэ гуйба.

15Эзэнэй Эльгээмэл Элияада иигэжэ зонхилбо:

– Доошоо буу, тэрээнтэй ошолдо, тэрээнһээ бү ай.

Элияа бодоод, табитын даргатай хамта хаанда ошожо, 16иигэжэ хэлэбэ:

– Эзэн иигэжэ айладана: Израильда Бурхан үгы юм шэнги Экрооной шүтөөн Баалзэбүүлһээ үршөөл хайра гуйхаяа элшэдээ эльгээһэнэйнгээ түлөө ши хэбтэһэн орон дээрэһээ бодонгүй үхэхэш!

17Ахазияа Эзэнэй Элияада айладаһан аргаар үхэбэ. Тэрэнэй хүбүүгүй байһан тула Ёраам хаан болобо. Ёшапаадай хүбүүн Иораамай Иудын хан шэрээдэ хоёр жэл һуугаад байхада энэ ушар болоо.

18Ахазияагай хэһэн бусад үйлэ хэрэгүүд Израилиин хаашуулай угай ном соо бэшээтэй юм.
Copyright information for BxrBBL2024