‏ 2 Kings 10

(2 Уг 22:7-9)

Ахаабай бүхы удамые Еһүү усадхана

1Еһүү Ахаабай томилһон сэрэгэй дарганарта, аха захатадта отолуулһан болон заһаагаа харуулшадта бэшэг бэшэжэ, тэрэнээ Самари хото эльгээбэ. Еһүү тэрэ бэшэг соогоо иигэжэ бэшэбэ:

2«…Таанад энэ бэшэг абабат. Таанадтай хамта таанадай эзэнэй хүбүүд, таанадта дайшалхы тэргэнүүд, морито сэрэгүүд, бэхижүүлэгдэһэн хотонууд болон зэр зэбсэгүүд бии. 3Өөһэдынгөө эзэнэй хүбүүдһээ эгээ бэрхыень, эгээ эрэлхэг зоригтойень һунгажа, эсэгынь хан шэрээдэ тунхаглаад, өөһэдынгөө эзэнэй түлөө тэмсэгты!»

4Тэдэнэр айшоод: «Хоёр хаан Еһүүтэй тэмсэжэ шадабагүй, харин бидэ тэрээнтэй яажа тэмсэхэбибди», – гэлсэбэд. 5Хаанай түшэмэлнүүд, хотын дарга, аха захатан болон һахюулай харуулшад Еһүүдэ иимэ харюу эльгээбэ: «Бидэ танай барлагуудби. Танай бидэндэ хэлэһэн юумэ бүримүһэн бүтээхэбди. Бидэ хэниишье хаан болгохогүйбди. Та яаха гэнэт, тэрэнээ бэелүүлэгты, бүтээгты».

6Еһүү тэдээндэ хоёрдохи бэшэгээ эльгээбэ. Тэрэ бэшэг соонь иигэжэ бэшээтэй:

«Хэрбээ таанад намайе үргэмжэлөө һаа, минии үгэ дуулажа, Ахаабай хүбүүдэй толгойнуудые таһар сабшаад, үглөөдэр энэл сагта тэдэнээ намда Езрээл асарагты!»

Далан хаан хүбүүд байгаа. Хотын мэдээжэ хүнүүд тэдэниие хүмүүжүүлжэ томо болгоо. 7Тэдэнэр тэрэ бэшэг абаад, хаанай далан хүбүүдые барижа, толгойнуудыень таһар сабшажа түрсүүгүүд соо хээд, тэдэнээ Езрээлдэ байһан Еһүүдэ эльгээбэд.

8Дуулган мэдээсэгшэ Еһүүдэ ерээд, иигэжэ хэлэбэ:

– Хан хүбүүдэй толгойнуудые асараабди.

– Тэдэнээ хотын хаалта үүдэнэй хажууда хоёр обоохой болгогты. Тэдэ обоохойнууд тэндэ үдэр болотор байг, – гэжэ Еһүү хэлэбэ.

9Үглөөгүүр Еһүү газаашаа гараад, арад зондо хандажа хэлэбэ:

– Таанад гэм зэмэгүйт, харин би ори гансааран эзэн хаанай урдаһаа эсэргүүсэн бодожо, тэрэниие алааб. Теэд эдэниие хэн алааб? 10Эзэнэй айладаһан үгэ заабол хүсэлдэдэг, Ахаабай гэр бүлын үгы хэгдэхэ тухай Эзэнэй Өөрынгөө барлаг Элияагаар арад зондо дамжуулһан бүхы үгэнүүд бэелүүлэгдэхэ гэжэ мэдэгты.

11Тиигээд Еһүү Езрээлдэ байһан Ахаабай гэр бүлын, тэрэнэй бүхы амбан һайдай, дүтын хүнүүдэй, санаартадай нэгэшье хүниие амиды үлөөнгүйгөөр алаба.

12Самари тээшэ ошобо. Тэрэ харгы замдаа Бэт-Ээкэд – Хароһиимэй хажууда тогтожо, 13Иудын хаан Ахазияагай уг удамуудтай уулзаад:

– Таанад хэд гээшэбта? – гэжэ һураба.

– Бидэ Ахазияагай аха дүүнэр болонобди. Бидэнэр хаанай хүбүүнэй, хатан эхын бэе тамир мэдэхэеэ ошожо ябанабди, – гэжэ тэдэнэр харюусабад.

14Еһүү сэрэгшэдтээ хандажа:

– Эдэниие амидыгаар баригты! – гэжэ захирба.

Тэдэниие амидыгаар барибад. Тэдэ дүшэн хоёр хүн байба. Тэдэниие Бэт-Ээкэдэй хажуудахи уһанай нүхэн соо нэгыньшье амиды үлөөнгүйгөөр алабад.

15Еһүү замаа үргэлжэлүүлжэ саашаа ошоходоо, урдаһаань ерэжэ ябаһан Рэхаабай хүбүүн Ёнадаабтай уулзаба. Еһүү тэрээндэ амар мэндэеэ хэлээд:

– Би шамтайб. Ши хэнтэйбши? – гэжэ һураба.

– Бишье шамтайб, – гэжэ Ёнадааб харюусаба.

– Тиигэбэл ши үнэн сэхэеэ баталжа, гараа намда һарбай, – гэжэ Еһүү хэлэбэ.

Ёнадааб тэрээндэ гараа һарбайба. Еһүү тэрэниие урижа дайшалхы тэргэ дээрээ гаргаад, 16тэрээндэ хандажа:

– Намтай ябалса. Ши минии Эзэндэ үнэн сэхэ байһые харахаш, – гэбэ.

Ёнадааб тэрээнтэй хамта ябалсаба.

17Еһүү Самарида ерэмсээрээ, Ахаабай гэр бүлэһөө үлэһэн бүхы уг удамуудыень алаба. Тиигэжэ Элияагаар дамжуулагша Эзэнэй айлдаһан захяа үгэ бэелүүлэгдэбэ.

Баалда алба хэгшэдые Еһүү усадхана

18Еһүү арад зониие суглуулаад:

– Ахааб Баалда багал алба хэһэн байна. Харин Еһүү тэрээндэ оролдосотойгоор алба хэхэ! 19Мүнөө таанад нэгэшье хүниие үлөөнгүй, Баалай лүндэншэдые, тэрэнэй бүхы санаартадые суглуулжа, намда асарагты! Би Баалда агууехэ үргэл үргэхэ гэбэб! Өөрынгөө дураар намда ерээгүй хүнэй толгой таһарха! – гэжэ хэлэбэ.

Үнэн дээрээ, Еһүү Баалда шүтэн мүргэгшэдые бултыень үгы хэхэ гэһэн иимэ мэхэ гаргаһан байба.

20Еһүү арад зондо хандажа:

– Баалай һайндэрэй нангин суглаа үнгэргэхые зарлагты! – гэжэ захирба.

Энээн тухай соносхогдобо. 21Еһүү суглаа зарлаха хүнүүдые Израилиин бүхы орон нютагта эльгээбэ. Баалай бүхы албатадай нэгэншье үлэнгүй, тэрэнэй һүмэ соо багтажа ядан сугларба.

22Еһүү тэдэнэй хубсаһа хадагалдаг хүндэ хандажа:

– Баалай бүхы албатадта хубсаһануудыень тараа, – гэжэ захирба.

Тэрэ хүн хубсаһануудые асаржа, Баалай албатадта тарааба.

23Еһүү Рэхаабай угай Ёнадаабтай Баалай һүмэдэ ороод, Баалай албатадта хандажа:

– Баалда алба хэгшэд эндэ гансал үлэхэ ёһотой. Тиимэһээ таанадай дунда Эзэндэ алба хэгшэдһээ хэн нэгэнэй байһан үгые шалгажа, бэе бэеэ харагты, – гэжэ хэлэбэ.

24Тиигээд тэрэ үргэлнүүдтэ болон түгэс шатаалта үргэлнүүдтэ бэлэдхэл хүүлэжэ эхилбэ.

Еһүү наян сэрэгшэдые һүмын хүреэнэй газаа зогсоогоод, тэдээндэ хандажа:

– Би таанадай гарта сэхэ үгэхэеэ эдэниие ерүүлээб. Эдэнэй хэн нэгэнэй эндэһээ һэмээхэн гаража арилаа һаа, таанад толгойгоороо харюусахат, – гэжэ хэлэбэ.

25Еһүү түгэс шатаалта үргэл дүүргээд, бэе хамгаалуулагшадайнгаа ба харуулайнгаа дарганарта хандажа:

– Досоонь орогты! Бултыень хюдагты! Тэдэнэй хэншье һүмэһөө амиды гараха ёһогүй! – гэжэ захирба.

Тэдэнэр һэлмээрээ һүмэ соо байгшадые дууһан алажа, үхэһэн бэенүүдыень эндэ тэндэ орхёод, Баалай һүмын нангин таһалгада оробод. 26Тиигээд тэдэнэр тэндэһээ Баалай нангин бэшэгтэй хабтагар шулуунуудые газаа гаргаад, бута сохижо галдабад.

27Тиигэжэ тэдэнэр Баалай нангин шулуунуудые ба һүмые үгы хээд, тэрэ һууридань шабхан бариба.

Еһүүгэй хааншалга

28Тиигэжэ Еһүү Баалые Израильда үгы хэжэ усадхаба. 29Еһүү Израилиин газар дээрэ үйлэдэһэн Набаадай хүбүүн Еробоһаамай хэһэн нүгэл хилэнсэгүүдһээ дууһан арсангүй, Бэт-Ээл ба Даанда байһан алтан тугалнуудые үгы хэнгүй, орхёо юм.

30Эзэн Еһүүдэ хандажа:

– Ши Намда таарамжатай ба һайн хэрэг ябуулгануудые Минии һанагшаар, Ахаабай бүхы уг удамуудые зүбөөр үгы хэбэш. Тиимэһээ шинии уг гарбал дүрбэдэхи үе хүрэтэр Израилиин хан шэрээдэ һууха болтогой! – гэжэ айладаба.

31Теэд Еһүү үнэн зүрхэнһөө Израилиин Бурханай, Эзэнэй нангин хуулинуудые сахибагүй. Тэрэ Израильда нүгэл хэһэн Еробоһаамай үйлэдэһэн нүгэлнүүдһээ арсабагүй.

32Тэрэ сагта Израильһаа хэсэг газарнуудые түрүүшынхиеэ таһалан үгэбэ. Араамай хаан Хазаһээл Израилиин эзэлжэ байһан бүхы газарые: 33Иорданһаа зүүлжээ Галаадай бүхы (Гаадай, Рэүбээнэй, Мэнашшээгэй) Арнооной хабшал дээгүүрхи Ароһээр, Галаад болон Башаан хүрэтэрхи газарнуудые дайгаар добтолон абаба.

34Еһүүгэй хэһэн бусад хэрэгүүд, эрэлхэг баатаршалганууд «Израилиин хаашуулай түүхын ном» соо бэшээтэй юм. 35Еһүүгэй үхэхэдэ, тэрэниие үбгэ эсэгэнэртэйнь зэргэлүүлжэ, Самарида хүдөөлүүлбэ. Тэрэнэй наһа бараһанай һүүлээр, тэрэнэй хүбүүн Ёахааз хаан болобо.

36Израилиин хаан Еһүү хорин найман жэлдэ Самарида хан түрэеэ засаглаһан юм.