2Ki 15 | BxrBBL2024 | STEP | Израилиин хаан Еробоһаамай хорин долоодохи жэлээ хан түрэеэ засаглажа байхада, Амацияагай хүбүүн Азаарияа Иудын хаан болобо.

‏ 2 Kings 15

(2 Уг 26:3-4, 21-23)

1 Израилиин хаан Еробоһаамай хорин долоодохи жэлээ хан түрэеэ засаглажа байхада, Амацияагай хүбүүн Азаарияа Иудын хаан болобо. 2 Тэрэ арбан зургаа наһатайдаа хаан боложо, табин хоёр жэлэй туршада Иерусалимда хан шэрээдэ һууба. Тэрэнэй эхэ Иерусалимһаа уг гарбалтай Ехоолия гэжэ нэрэтэй байгаа. 3 Тэрэ Амацияа эсэгэдээл адляар Эзэндэ таарамжатай зүб хэрэгүүдые эрхилдэг байгаа. 4 Гэбэшье тэрэ онгон бурхадта мүргэдэг обоонуудые усадхабагүй. Тиимэһээ арад зон урдынхи мэтээр тэдэ обоонуудые тахин, үхэр мал шарууһалжа, түгэс шатаалта үргэл хэдэг байгаа.

5 Эзэн Азаарияа хаанда үбшэн эльгээбэ. Саа үбшэн тэрэнэй бүхы бэеэр тараба. Тэрэ наһа баратараа саа үбшэндэ даруулаад, амяараа гэртэ Бэт-Хотшиитдо ажаһуугаа. Ётаам хүбүүниинь улас түрынгөө хэрэгүүдые эрхилжэ, арад зоноо ударидаба.

6 Азаарияагай бусад хэрэг ябуулганууд тухай «Иудын хаашуулай түүхын ном» соо бэшээтэй юм. 7 Азаарияагай наһа барахадань, тэрэниие үбгэ эсэгэнэртэйнь зэргэлүүлжэ, Давидай хотодо булашада хүдөөлүүлбэ. Тэрэнэй орондо хаан шэрээень Ётаам хүбүүниинь эзэлбэ.

Израилиин хаан – Захарияа

8 Иудын хаан Азаарияагай хан түрэеэ гушан наймадахи жэлээ засаглажа байхада, Еробоһаамай хүбүүн Захарияа Израилиин хаан болобо. Тэрэ Самарида зургаан һара хан түрэеэ засаглаба. 9 Тэрэнэй хэрэг ябуулганууд үбгэ эсэгэнэрэйнь хэдэг байһан ябуулганууд мэтэ Эзэндэ таарамжагүй байба. Ушар юуб гэхэдэ, Захарияа Израилиие нүгэлтэ зам руу дахуулһан Набаадай хүбүүн Еробоһаамдал адли нүгэл шэбэл үйлэдэжэ байба. 10 Ябээшэй хүбүүн Шаллуум Захарияада эсэргүү нюуса хэлсээ хэжэ, тэрэниие Иблэһаамда алаад, өөрөө хаан болобо.

11 Захарияагай бусад хэрэг ябуулганууд тухай «Израилиин хаашуулай түүхын ном» соо бэшээтэй юм. 12 Еһүүгээр дамжуулжа арад зондо тунхаглаһан Эзэнэй айладажа: «Шинии уг гарбал дүрбэдэхи үе хүрэтэр, хүбүүн, аша, гуша, дүшэнэр Израилиин хан шэрээдэ һууха», – гэжэ хэлэһэн үгэ бэелүүлэгдэбэ.

Израилиин хаан – Шаллуум

13 Иудын хаан Уззияагай гушан юһэдэхи жэлээ хан түрэеэ засаглажа байхада, Ябээшэй хүбүүн Шаллуум Израилиин хаан болобо. Тэрэ Самарида хан түрэеэ нэгэ һара засаглаба. 14 Гадиин хүбүүн Мэнааһэм Тирцааһаа гаража, Самарида ошоод, Ябээшэй хүбүүн Шаллуумые аламсаараа, өөрөө хаан болобо. 15 Шаллуумай хэрэг ябуулганууд, тэрэнэй нюуса хэлсээн тухай «Израилиин хаашуулай түүхын ном» соо бэшээтэй юм. 16 Тэрэнэй урда хотынгоо хаалта үүдые нээгээгүйн түлөө Мэнааһэм Таппууһаа хотые, тэрэ хотынхидые бултыень үгы хээд, Тирцаа хүрэтэрхи бүхы газар дайдые хооһоруулба. Тиихэдээ Мэнааһэм тэрэ хотодо байһан бүхы жэрмэһэн эхэнэрнүүдэй гэдэһые хаха зүһэжэ, зэрлиг муухайгаар алаба.

Израилиин хаан – Мэнааһэм

17 Иудын хаан Азаарияагай гушан юһэдэхи жэлээ хан түрэеэ засаглажа байхада, Гадиин хүбүүн Мэнааһэм Израилиин хаан болобо. Тэрэ Самарида арбан жэлэй туршада хаан шэрээ эзэлэн һууба. 18 Эзэндэ таарамжагүй тэрэнэй хэһэн хэрэг ябуулганууд Израилиие нүгэлтэ зам руу абаашаһан Набаадай хүбүүн Еробоһаамай хэһэн нүгэлнүүдһээ зайсабагүй.

19 Ассириин хаан Пүүл ^{▼▼ Пүүл – саашадаа энэ хаан Тиглаат-Пилэсээр гэжэ нэрлэгдэхэ.} Мэнааһэмэй хан түрэеэ засаглажа байһан Израильда дайгаар добтолон оробо. Мэнааһэм өөрынгөө хаан түрые абаран үлөөхэ, өөһэдыгөө аршалуулан үмэгшүүлхэ гэжэ, Пүүлдэ мянган талаант мүнгэ барюулха болобо. 20 Мэнааһэм тэды мүнгэ тэрээндэ үгэхын тула Израилиин бүхы баяшуулһаа албата татабари суглуулба. Тэдэнэй хүн бүхэн табин шээкэл мүнгэ Ассириин хаанда үгэбэ. Ассириин хаан эрьелдээд, өөрынгөө орон нютаг ошобо.

21 Мэнааһэмэй бусад хэрэг ябуулганууд тухай «Израилиин хаашуулай түүхын ном» соо бэшээтэй юм.

22 Мэнааһэм наһа баража, өөрынгөө үбгэ эсэгэнэртэй зэргэлэн хүдөөлүүлэгдэбэ. Тэрэнэй орондо тэрэнэй хүбүүн Пэкайяа хаан болобо.

Израилиин хаан – Пэкайяа

23 Иудын хаан Азаарияагай табин жэлдэ хан түрэеэ засаглажа байхада, Мэнааһэмэй хүбүүн Пэкайяа Израилиин хаан болобо. Тэрэ Самаридахи хан шэрээдэ хоёр жэл һууба. 24 Тэрэнэй хэһэн Эзэндэ таарамжагүй хэрэг ябуулганууд Израилиие нүгэлтэ зам руу абаашаһан Набаадай хүбүүн Еробоһаамай нүгэлнүүдһээ зайсажа, огтошье холо болобогүй. 25 Харуулшадай дарга Рэмаалияагай хүбүүн Пээкаа Пэкайяада нюуса эсэргүү хэлсээ эмхидхэжэ, Самаридахи ордон соогоо амардаг таһалгадань тэрэниие алаба. Энэ хэрэг үйлэдэлгэндэ табин галаадууд тэрээндэ хамһалсаба. Пээкаа Пэкайяае алаад, өөрөө орондонь хаан болобо.

26 Пэкайяагай бусад хэрэг ябуулганууд тухай «Израилиин хаашуулай түүхын ном» соо бэшээтэй юм.

Израилиин хаан – Пээкаа

27 Иудын хаан Азаарияагай табин хоёрдохи жэлээ хан түрэеэ засаглажа байхада, Рэмаалияагай хүбүүн Пээкаа Израилиин хаан болобо. Тиин тэрэ Самарида хорин жэлэй туршада хаан шэрээдэ һууба. 28 Тэрэнэй хэһэн Эзэндэ таарамжагүй хэрэг ябуулганууд Израилиие нүгэлтэ зам руу абаашаһан Набаадай хүбүүн Еробоһаамай нүгэлнүүдһээ зайсажа, огтошье холо болобогүй.

29 Израилиин хаан Пээкаагай амиды байхада, Ассириин хаан Тиглаат-Пилэсээр дайгаар добтолжо, Абээл-Бэт-Маһахаа, Ийон, Напталиигай Яноох, Кээдэш, Хацоор, Галаад, Галилей болон бусад бүхы газарнуудыень эзэмдэн абаба. Тэрэ тэдэ газарнуудай хүнүүдые олзолон абаад, Ассиридэ абаашаба.

30 Элаагай хүбүүн Һошээ Рэмаалияагай хүбүүн Пээкаада нюуса эсэргүү хэлсээ эмхидхэжэ, тэрэниие алаба. Уззияагай хүбүүн Ётаамай хоридохи жэлээ хан түрэеэ засаглажа байхада, Һошээ Пээкаае алаад, тэрэнэй орондо хаан болобо. 31 Пээкаагай хэһэн бусад хэрэг ябуулганууд тухай «Израилиин хаашуулай түүхын ном» соо бэшээтэй юм.

Иудын хаан – Ётаам

32 Израилиин хаан Рэмаалияагай хүбүүн Пээкаагай хоёрдохи жэлээ хан түрэеэ засаглажа байхада, Уззияагай хүбүүн Ётаам Иудын хаан болобо. 33 Ётаам хорин таба наһатайдаа хаан боложо, арбан зургаан жэлэй туршада Иерусалимда хааншалаа. Цадоогой басаган Ерушаагай хүбүүн һэн бэлэй. 34 Уззияа эсэгэдээл адли Эзэндэ таарамжатай үйлэ хэрэгүүдые хэжэ байгаа. 35 Гэбэшье тэрэ онгон бурхадта мүргэдэг обоонуудые усадхабагүй. Тиимэһээ арад зон урдынхи мэтээр тэдэ обоонуудые тахин, үхэр мал шарууһалжа, түгэс шатаалта үргэл хэдэг байгаа.

Тэрэ Эзэнэй һүмын Дээдэ хаалта үүдэ барюулба.

36 Ётаамай бусад хэрэгүүд тушаа «Иудын хаашуулай түүхын ном» соо бэшэгдэнхэй.

37 Тэрэнэй амиды байхада, Эзэн эхин түрүүшынхиеэ Араамай хаан Рэцииниие, Рэмаалияагай хүбүүн Пээкаае Иудын хаан орондо дайгаар эльгээбэ.

38 Ётаамай наһа барахада, тэрэниие Давидай хото соо үбгэ эсэгэнэрэйнь хажууда хүдөөлүүлбэ. Орондонь Ахааз хүбүүниинь хаан шэрээдэ заларба.