‏ 2 Kings 19

(Иса 37:1-8)

1Хэзэкияа хаан эдэ бүгэдые дууламсаараа, уйдхар гашуудалаа мэдүүлэн хубсаһаа урижа, таар үмдөөд, Эзэнэй һүмэдэ ошобо. 2Тиигээд ордоной захирагша Элиакиимые, бэшээшэ Шэбнаае ба ахамад санаартадые таар хубсаһа үмэдхүүлээд, Амооцой хүбүүн, лүндэншэ Исайда эльгээбэ.

3Хэзэкияа Исайда иимэ мэдээсэл дуулгахыень тэдээндэ даалгаа бэлэй: «Энэ үдэр болбол гай гасалангай, хэһээлтын, нэрэ хүндөө бууралгын үдэр. Нарайлхаяа байһан аад, түрэхэ арга шадалгүй эхэнэртэл адли байнабди. 4Ассириин хаан ахамад түшэмэлөө амиды Бурханиие доромжолхо-баһахын тула эльгээгээ. Эзэн Бурхантнай баһаһан тэдэ үгэнүүдые соносожо, хэлэһэн хүнүүдыень хэһээхэ бэзэ. Амиды мэндэ үлэһэн өөһэдынгөө зон тушаа Бурхандаа зальбарыт».

5Хэзэкияа хаанай түшэмэлнүүдэй Исайда ерэхэдэ, 6иимэ харюу һөөргэнь эльгээбэ: «Ассириин хаанай зарасануудай Намайе баһажа доромжолһон үгэнүүдые дуулаад бү ай гэжэ Эзэн танда айладхал буулгана. 7Би Ассириин хаанда һүлдэ эльгээхэб, тэрэ нэгэ мэдээсэл абамсаараа, өөрынгөө орон нютаг руу бусаха. Тиигээд Би тэрэниие тэндэнь һэлмээр сабшан һүнөөхэб».

Ассириин шэнэ заналтанууд

8Ассириин түшэмэл ноён хаанайнгаа Лахииш хото орхиһон, мүнөө Либнаа хотые сэрэгүүдээрээ тойрон бүһэлһэн тушаа дуулаад, тиишээ ошобо. 9Күүшэй хаан Тирһаакаагай дайгаар ерэжэ байһан тухай Ассириин хаан дуулажа, элшэнэрые иимэ бэшэгтэйгээр Хэзэкияа хаанда эльгээбэ: 10Иудын хаан Хэзэкияада иигэжэ дамжуулагты:

– Этигэн найдадаг Бурханшни Иерусалим Ассириин хаанай мэдэлэй болохогүй гэжэ айладхажа, шамайе бү мэхэлэг. 11Анхараарай, Ассириин хаашуулай бүхы орон нютагуудтай юу хэһые дуулаһан байхаш: дууһан усадхаа! Тиигээд ши амиды мэндэ үлэхэ гэжэ гү?! 12Бусад арадуудай бурхад тэдэниие абаржа шадаагүй юм! Минии үбгэ эсэгэнэр Гозаан ба Харраанай арадуудые, Рээцэп хотынхидые, Тэлассаарта байдаг Ээдэн хотынхидые үгы хээ! 13Хамаат ба Арпаадай болон Сэпарваһиим хотын хаашуул мүнөө хаанаб? Һэнаагай ба Ивваагай хаашуул хаана байнаб?

Хэзэкияагай зальбарал

14Хэзэкияа элшэнэрһээ хуймал бэшэг абажа уншаад, Эзэнэй һүмэдэ орожо, тэрэнээ Эзэнэй урда дэлгэбэ.

15Тиигээд тэрэ Эзэндэ зальбарба:

– Херүүбүүд дээрэ заларагша, Түмэн Сэрэгтэ Израилиин Эзэн Бурхан! Та ори гансаараа газар дээрэхи бүхы хан түрэнүүдэй Бурхан болонот! Та огторгой, газарые бүтээгээт! 16Мүнөө шэхээ табижа, шагныт, нюдөө нээжэ, харыт! Амиды Бурханиие доромжолхо гэжэ элшэдээ эльгээһэн Сэннахэриибэй үгые соносыт! 17Эзэмни, нээрээшье, Ассириин хаашуул эдэ бүхы арадуудые үгы хээ, орон нютагуудыень һандаргаа, хооһолоол. 18Тэдэнэй бурхадые шатаагаал! Ушар юуб гэхэдэ, тэдэ бурхад бэшэ, харин хүнэй гараар бүтээгдэһэн модод ба шулуунууд байшоол! Тиимэһээ тэдэ юумэд усадхагдаа! 19Эзэн Бурхамни, Та болбол ори ганса Бурхан, бэшэ Бурхан байхагүй гээшые дэлхэйн бүхы хан түрэнүүд мэдэхын тула мүнөө маанадые дайсадһаамнай абарыт!

Сэннахэриибэй үхэхэ тухай Исайн зүгнэлгэ

20Амооцой хүбүүн Исай иимэ захяа Хэзэкияада дамжуулхые захирба:

– Эзэн, Израилиин Бурхан иигэжэ айладана: «Ши Ассириин хаан Сэннахэриибтэ гомдоһоноо мэдүүлэн, Намда зальбарбаш. Би дуулааб».

21Сэннахэриибтэ айладаһан Эзэнэй үгэ иимэ: Шамайе Сионой басаган үзэн ядана,
шамайе наада барижа энеэнэ!
Шинии хойноһоо хаража,
Иерусалим толгойгоо һэжэрнэ.
22Хэниие доромжолон-наадалан байһанаа мэдэнэ гүш?
Хэн руу шангаар бадашажа,
хэн руу бардамлан харанабши?!
Намайе, Израилиин арюун Бурханиие,
дайран доромжолоош.
23Элшэдээрээ дамжуулан ши
Эзэниие гомодхообош!
Ши иигэжэ хэлэбэш:
Тэргэнүүд намда олон,
тэдэнтэеэ хамта хаданууд дээрэ,
Ливаанай шэлэ хүтэлнүүд дээрэ гарааб.
Ливаанай үндэр хушануудые,
Тэрэнэй эгээн һайн кипарис
модонуудые таһа сабшааб.
Тэдэнэй эгээн саада орьёлнуудта гарааб,
тэдэнэй эгээн буртаг шэрэнгитэй,
хүбшэ ойдо орооб.
24Худагуудые малтажа,
хариин газарта уһа уугааб,
хүлэйнгөө улаар Египедэй голнуудые
дэбһэн гаража хатаагааб.
25Минии эдэ бүгэдые үнинэй түсэблэһэн тушаа
ши дуулаагүй юм гүш?
Мүнөө энээниие бэелүүлбэ гээшэб.
Бүхэлэгдэһэн хотонуудые
обоохой шулуун боложо һандаргаха
арга боломжо таанадта үгөөб.
26Зүүн зүгэй һалхинһаа хаташаһан
зүлгэ ногоон мэтэ,
хээрэ талада хагдаршаһан
хатаһан ногооной эшэ мэтэ,
гэрэй хушалта дээрэ ургажа,
найгахын урда тээ
хатаһан үрмэдүүл мэтэ болоо,
тэндэхи хүнүүд хүсэ шадалгүй,
тэнсэлгүйгөөр айһанһаа нэрэеэ хухараа.
27Гэбэшье Би шинии һууха-бодохые,
гараха-орохые болон
Минии урдаһаа бушаганахые дууһан мэдэнэб.
28Минии шэхэндэ соностоһон
Намда эсэргүүсэн уурлаһанайш түлөө,
дээрэлхүү ааша зангайш түлөө
шинии хамарта гохо хадхаад,
шинии аманда хазаар үмэдхөөд,
шамайе ерэгшэ харгыгааршни бусаахаб!

Тэрэ сагта гохоһоонь ооһорлоод, олзолһон хүнүүдые туужа, орон нютагаа абаашадаг байгаа.

29Хэзэкияа, шамда юун болохоб гэжэ харуулһан дүлгэ тэмдэг үгтэнэ: Түрүүшын жэлдэ зэрлиг таряанһаа
ургаһан ороооһо түүгты!
Тиигээд хойто жэлдэ
өөрөө ургаһан орооһо суглуулагты!
Гурбадахи жэлдээ тариһан таряагаа
хуряагаад, эдигты!
Уһан жэмэсэй эшэнүүдые һуулгаад,
уһан жэмэсэй үрэһэ эдигты!
30Иудын уг удамай амиды үлэгшэд
дахин доогуураа үндэһэлэн,
дээгүүрээ үрэ жэмэс гаргаха юм.
31Амиды үлэгшэд Иерусалимһаа гараха,
амин бэеэ абарагшад Сион хадаһаа бууха.
Түмэн Сэрэгтэ Эзэн энээниие
заабол бэелүүлхэл.

32Ассириин хаан тушаа Эзэн айладхаба: Тэрэ энэ хото руу орохогүй,
тиишэнь ном годлинуудаа харбахагүй.
Хотын урдаһаа бамбай бариһан
сэрэгынь ерэхэгүй,
бүһэлүүр обоошье бодхоохогүй!
33Тэрэ ерэһэн замаараа тэхэрихэ,
энэ хото руу орохогүй, –
гэжэ Эзэн айладхана мүн!
34Өөрынгөө түлөө,
Минии барлаг Давидай түлөө
Би энэ хотые аршалан абархаб!

Ассириин сэрэг диилдэбэ

35Тэрэ һүни Эзэнэй Эльгээмэл бии боложо, Ассириин сэрэгэй хүреэндэ зуун наян таба мянган сэрэгшые алаба. Үглөөдэрынь үүр сайхада харахада, оршон тойрон үхэһэн хүнүүдэй бэенүүд хэбтэбэ.

36Ассириин хаан Сэннахэрииб сухарижа, гэр тээшээ тэрьедэн зугадаһаар, Нинэвээдэ бусаба. 37Нэгэтэ тэрэнэй өөрынгөө Нисроох бурханай һүмэ соо мүргэл хэжэ байхада, тэрэнэй Адраммээлэх, Шарээцэр гэжэ хоёр хүбүүд эсэгээ һэлмээр сабшан алаад, өөһэдөө Арараат нютаг руу зугадаба. Сэннахэриибэй орондо Эсархаддоон гэжэ хүбүүниинь хаан шэрээ эзэлээ һэн.